Read Alladian LUK 22 Bible Online

LUK 22 - Alladian bible

LUK 22

¹Supak siiyé líkmanam ettíng dodíe gíbong gíídíe píído,

²delokke rínekídí elang ukil kídíe Jisume umdomílo emla míídung idola, bulu amikídíem pesoto.

³Delo Soitane midum íying kolang annyi lokke akon Judas Iskariot kíng angkai.

⁴Delokrongem Judas bí ríne ruutum kídílo gíla kape kísa Jisume bulukíng yadlík ladodí dem luposuto.

⁵Bulu airupe mííla bím murkong bidope tolíkbosuto.

⁶Judas bí dem tolíksula, delokke ami kamangem Jisume bulukíng melíkpe emla pongkok matíto.

⁷Delo siiyé líkmanam roti dodíe mér bénuem palíkpeko gíídíe píídak.

⁸Jisu bí Pitor melang Joanme melíkdola pokai, “Gíkala ngoluke Gíbong gíídí dopekuem iruu tolangka.”

⁹“No ingkolo ngolum iruu saaru dope míídon?” emla bulu íngkíto.

¹⁰Jisu bí poto, “Nolu taonkolo enayém amiko asi kiiling bomnako nolum ríksuyé. Bíkkíng ekumlo gímín gela,

¹¹delokke ekum atodem potoka, ‘Poyilna bí íngkído; ingkolodí mibo doopeko ruume, ingkoloi ngo ngokkelo luyilsuna kídíem lekope Gíbong gíídí domanem dobo supekue?’

¹²Bí nolum teyong danlo ruum bottenako atí takame kayin sunako lengkanyé. Delo irung sarung tolangka.”

¹³Bulu gíla atí kídíem Jisuke bulum ponam kísa pakpe ito. Dekepe iname bulu Gíbong gíídíem leemoto.

¹⁴Moodíe piiyédem, Jisulang bíkke tomlíknam kídíe dopéé atelkope dobosuto,

¹⁵Delo bí bulum poto, “Ngokke adír gemang adape nolum sim Gíbong gíídí doman sim dobo sudope míídung.

¹⁶Kapeila ngo nolum podung, Shédíke amongem apíídope kaasumang tetengem, ngo lekoda sim dopang kumayé.”

¹⁷Batidem laala, yidge pala, “sim laalangka delokke noluke aralo orsulangka.

¹⁸Kapeila ngo nolum podung Shédíke amonge píímang tetengem sim onggur alang sim tíípang kumayé.”

¹⁹Delokrongem bí rotiem laala yidge pala pento, delokke dem bulum bidola pokai, “Simin noluke legape binam ngokke amíle; sim ngom míípang sunape igelangka.”

²⁰Dekepe, dotkéyem dogeyéla bí batidem laadola pokai, “Si bati si nolukíng pílíknam ngokke iyyiloke aní daaponge.

²¹“Idakkom ngom míírí míínyona ami alagde ngokke dopéélo duubo sudung.

²²Tanike Ue atla menam kísape iyé, idakkom bím míírí míínyona amide ankí kenoyé.”

²³Buluke aralo agí agísue dekepe ipenade sékodí emla pobosuto.

²⁴Buluke gooralo sékoi botte yalumnade emnam agom legalo akmín sukai.

²⁵Jisu bí bulum poto, “Mipak kídílokke roja kídíe bulum yébodung; delokke buluke teyolo ruutumbona kídí emin paanedone.

²⁶Idakkom noludan dekepe ipemane. Dem megeyéla noluke gooralo botte yalumnade amé yalumnape ipe aido, yébonade yébonam kísape ipe aido,

²⁷kapeila sékoi botte yalumnade tébullo duunadía ma, igulna bééradía? Idola ngodan noluke gooralo agér géryana béérang kísanako.

²⁸Nolu ngom darkaado delo dakmín gena kídíe.

²⁹Delokke ngom ngokke Abue binam kísape, ngo nolum amongko bidung,

³⁰delo nolu ngokke amolo ngokke dokolo dola tííla palenglo duula, midum íying kolang annyi Israel opínem bisaryé.

³¹“Simon, Simon, Soitane nolum ainem atímalok langusupe emla, arík ina amie agíem amyalok langu sunam kísape nolum takam ikaa darkaape emla tolík namem paatung.

³²Idakla Simon, ngomin nok míngkenge pííram madope nokke legape kumtone. Delokke edílo no míílat suyékudí, nokke bíro kídíem edíí molangka.”

³³Idola bí poyansuto, “Ruutume ngo umko sudokom delokke petdokom nokkíng gímín gepe míídung.”

³⁴Jisu bí poyansukai, “Pitore, ngo nom aruem pobidung, siiyoh peroge kokmang adape, no ngom lengumko kéndola kénmang emla possuyé.”

³⁵Delo Jisu bí bulum íngkíto, “Ngokke nolum paipoisar, nyogon, demangkom leyuk bitak sumape melík dagem nolu pííram neke katonía?” “Atí pííram kamang” emla bulu poyansuto.

³⁶Bí bulum pokai, “Idakkom supak noluke murkonge kadumílo dem bomtola, delokke noluke yoksa kamílote agí egem kogeyéla ako retola.

³⁷Sim sikepe atbitung: ‘Bíme imemna kídílo santak suto; delokke ngo nolum podung de ngokkíng berokpe arolíkyé; E, ngokke legangem atbomnam atíe arope ipí dakbong.’ ”

³⁸Luyilsuna kídíde pokai, “Ruutum, sina yoksa annyiko.” “De alummang”, emla bí poyansuto.

³⁹Jisu bí iyang iyape Olib Díítelo gílento, delo bíkkelo luyilsuna kídíete mamín geto.

⁴⁰Amodelo pííla bí bulum poto, “Nolu darkaalo omadope kumlangka.”

⁴¹Bí dabu kékonlo gubdola lebíng koníla kumto,

⁴²“Yayie, no míísa dumílo sim bati sim ngokke lokke laabín toika; depe idokom ngokke míínammang, nokke míínampe idak langka.”

⁴³Teyong kotokiko teyotelok aala bím ralnamem bito.

⁴⁴Delo duuk adíre idola, bí aabanpe kumto kukéng, delo bíkke ílnam doodíe amolo oletne iyyi doodí kísa ibomsukai.[24]

⁴⁵Bí kumko lokke gerep langkula luyilsuna kídílo aala kaaname, bulum ipla, bengale idope kaapato.

⁴⁶“Nolu kapeila ipdune?” emla bí bulum luto. “Gereplangkula nolu ikaa darkaalo olík madope kumto langku” emto.

⁴⁷Bí agomem podung adape, miti milinge pííla, delokke Judas emnam, Midum íying kolang annyi lokke akonde bulum gíbodo. Bí Jisume mumpuppe emla aanínto,

⁴⁸idokom Jisu bí bím tatkíto, “Judas, no Tanike Uem mumpup dolangía mirulo yadlíkdune?”

⁴⁹Jisukíng gímín gena kídíe depe inamem kaala, pokai, “Ruutume, ngolu ngoluke yoksalok patopeya?”

⁵⁰Delo buluke akone ríne ruutum béérang konem nyorungem papakto.

⁵¹Idakkom Jisu bí pobikai, “Sikepe iyimapeka!” Delo bí ami delokke nyorungem ukkídola bím ipítoku.

⁵²Delokrongem Jisu bí rínekídí emlang kumkeng ekum kaabomna migom kídí emlang delokke miro aana kídíem poto, “Ngo ebín bona ruutum kolanga, nolu gíníng yoksa bomla aabomdune?

⁵³Lolope ngo nolukíng kumkeng ekumlo yébosuto, delo nolu ngom ummang. Idakkom edílo kaamue idudí delomin noluke umdíe.”

⁵⁴Delokrongem bím umla, bulu gíbola ríne ruutum ekumdelo aabosutoku. Pitor bí méélamope gímín geto.

⁵⁵Idola bulu guradelo eme parla duudum suduem, Pitorte bulukíng duumín geto.

⁵⁶Mime béérangko bím eme angun delo duudope kaato. Bí Pitorme kangí seríla kangge yéla pokai, “Si amisi Jisukíng yémín gene.”

⁵⁷Idakkom bí dem togemang, “Mime, ngo bím kénmang” emto.

⁵⁸Anyongko doorongem amikonko bím kaala pokai, “Nokom buluke akonpe idung.” “Ngomang” emla Pitor bí poyansuto.

⁵⁹Gontako doorongem amikonko bím sutgap bomkai, “Berokrupe si ami sikom bíkkíng yétuai, kapeila bí Galil lokkeko.”

⁶⁰Pitor bí poyansuto, “No amino kape mandunai, no ingkuem podudí ngo tatkénmang!” Bíkke pongo dungadape peroge kokkai.

⁶¹Ruutum bí ngéélat sulangkula Pitorme jonnampe kaasuto. Delopak Ruutumke bím potonam agomem míípang sutoku: “Peroge kokmang adape siiyoh, no ngom lengum kokai possuyé.”

⁶²Delokrongem bí luyulo gílenlangkula agí kapgísutoku.

⁶³Jisume kaabomna amikídíe dííla mola iyéé silééla bím ibomkai.

⁶⁴Bulu amigem yéngkap geyéla “Sékoi nom kíttone” pokíto emla luto.

⁶⁵Delokrongem kom bulu deddí kokai luyéé luléénam agom kídíemte luto.

⁶⁶Píange iyédem kebang ami kídíe, rínekídí elang delokke ukil kídíe dumsula, delo Jisume buluke keralo langaato.

⁶⁷“No Kristomílo, ngolum potola,” emla bulu mankai. Jisu bí poyansukai, “Ngo nolum podokom, nolu ngom arope míímayé,

⁶⁸delokke ngo nolum agomko íngkídokom nolu ngom pobimayé.

⁶⁹Idakkom supak kelokke ila Tanike Ue tolna Shédíke lakbíklo duuyéku.”

⁷⁰Bulu takam íngkíto, “No demílo Shédíke ua?” Bí poyansukai, “Nolu ngom depe emnamde aropage.”

⁷¹Delokrongem bulu pokai, “Ingkona hakii yangko ngolu míídun? Ngolu bíkke nappalok tatyinsuto.”