Read Alladian LUK 24 Bible Online

LUK 24 - Alladian bible

LUK 24

¹Hopta lokke kerayalum longe delo rokomope, mime kídíde buluke iruunam késiképa em bomla agolo gíto.

²Bulu ago delokke líídungem longgétuupe kaato,

³idokom bulu aala kaaname, Ruutum Jisuke simang dem kaapamato.

⁴Bulu dem kapei emla míídungem, menang asak yaari kísape punname ina ege gena midum annyiko buluke ampe delo dakdope kaato.

⁵Pesue ikolok mime kídíde buluke mingmue amobelo gubadola lebíng konila igeto, depe iduem ami annyide bulum poto, “Nolu kapeila turnem sinakídí gooralo matadune?

⁶Bí so kayimang; bí gerep kaku! Bíkke nolum Galillo yébo sudungem ponam agomem míípang suto langku.

⁷Tanike Uem paab gena ami gooralo melíkla, pansaala iyérung idola longum nanalo bím kiirepyéku!”

⁸Delokrongem bulu bíkke agom ponam kídíem míípang sutoku.

⁹Edílo bulu ago delokke aalat sutokudí, delo bulu sim atí takam sim Íying kolang atel demlang abíd kídí takam emteng pokanto.

¹⁰Mari Magdalini lang Joana emnam Jemske ane Marilang bulum gíbosuna kídíde Tomlíknam kídíem sim pokan bitoku.

¹¹Idokom bulu mime kídí agomdem arope míímato, kapeila buluke agom kídar dem pesa pelape bulu tatto.

¹²Pitor bí, depe idokom, darepla agodelo dukkai. Tungadola, bí kaatoname maayét petomde doodo, delokke bí kape iparunai emla míílangala gítoku.

¹³Depe iduem buluke aralok midum annyiko Jirusalem lokke mail kínít mootengko Emmaus emnam doolungkolo endagai.

¹⁴Bínyi kape kape itodí dem takam pobosula enbo sudungai.

¹⁵Bulu sim legasim luposula, endungem Jisu bí agíe aala bulum gíbosuto;

¹⁶depe idokom bínyim bí kangkén kosumato.

¹⁷Bí bínyim íngkíto, “Nolu enbo sudula ingkueke lupo sudune?” Bínyi terín totín dakto, bínyike mingmue ngemgíp geto.

¹⁸Akonde Kleopa emnamde bím íngkíto, “Jirusalemlo aana takam lokke gíkaana loonyi longum araso inam legang kídísim no petomía kénmane?”

¹⁹“Ingkona atíeke” emla bí íngkíto. Bulu poyansukai, “Najarethlo duuna Jisuke legang emna. Bí kaaluna mirikuai. Shédíke kera lolang ami takam keralo agom lolang delokke agérlo pauar kana rungkuai.

²⁰Rínekídí elang ngoluke yégebona ruutum kídíe bím petdope luyinla, delo bulu bím pansaato.

²¹Idakkom ngolu bím Israel kídíem mopít kupena ruutume emla míínam sutuai. Delokke teyolo sok atí takam sokke ironge silo longum ekai.

²²Sok teyolo ngoluke mime ayokone ngolum kapei emla míímoto. Bulu siro rokomope agodelo gítoka

²³idola bíkke simangem mapa tomang. Bulu píílangkula ngolum pobikuname, ngolu teyong kotokieke kaato, bulu Jisu bí turdung emdo emla pobodoku.

²⁴Delokrongem ngoluke angong kídare ayokone agolo gíla kaaname mimekídí delokke ponam kísa pakpe ido, idokom bím bulu kaapa tomang.”

²⁵Amide bínyim pokai, “Nolu mide rungeke, delokke kaaluna miri kídí pobinam takamem noluk aange aro menam kísa míídung!

²⁶Kristo bí dem takam adírem dírgela delokrongem bíkke angun ralnamlo angku manía?”

²⁷Delokke Mosikelok ilangala kaaluna miri takamem, Dooying kitabe bíkke legang ponam kídarem bí bulum pobeng bito.

²⁸Buluke gípeko doolung delo bínyi píínín yédem Jisu bí angu konlok enpe ito.

²⁹Idakkom bínyi bím ankírupe rogudola poto, “Ngolukíng duutola, supak adenge idakbong, longe gídakbong.” Dekepe iname bí bínyikíng aala duubosuto.

³⁰Bí bínyim tébullo dotké dobo suduem, bí rotiem laala, yidgedola dem pento delo bulum orpe emla ilento.

³¹Delo buluke amige darlang kula bím kangkéntoku, delokrongem bí buluke keradelok nyokkaku.

³²Bínyi pobosuto, “Bedalo endula ngolum luposula Dooying kitablokke agomem sorkaabola iduem ngoluke aange gumanía?”

³³Bulu darepla delokke Jirusalempe ensémtoku. Delo bulu Midum Íying kolang atel delokke duudumsuna kídíem kaarík sulangkula

³⁴poto, “Si arodung! Ruutum bí gerep langkula Simonme ríksutoku.”

³⁵Delokrongem annyi si bedalo legí-legang takamem pobosuto, delo Jisume bulu rotiem penpe idagem kangkéntoku.

³⁶Bulu dekepe pobo sudungem, Jisu bí agíe buluke gooralo dagadola poto, “Nolu aipe duulangka.”

³⁷Bulu uromko kaadung emla mííla mamam sula pesue ito.

³⁸Bí bulum pokai, “Nolu kapeila mííne míngodune?

³⁹Ngokke alag emlang alem kaatola. Si ngo agísuemino! Ngom ukkíla kaatola, noluke ngom kaanam kísape uromde adín along kamayé.”

⁴⁰Bí sim depe pogeyéla bí bulum agí alagemlang alem lengkansuto.

⁴¹Bulu ashéngeku pesueku ikolok delote bulu dem aro míímape iduem bí bulum íngkíto, “Noluke so dopenam atíko kadunía?”

⁴²Bulu bím ngosanko laabito,

⁴³delo bí dem laala buluke kangkodelo dobito.

⁴⁴Bí bulum pokai, “Ngokke nolukíng duubo sudungem si ngokke nolum poname: Mosike ayonlo, kaaluna mirikídí agomlo delokke Mirilunggu kídílo atnam takamem apíí moperung aiyé.”

⁴⁵Delokrongem bí Dooying kitabem tatkén dope emla buluke aapíem berokmoto.

⁴⁶Bí bulum poto, “Simin atnam kídíde; Kristo bí adír geyé delokke longum nanalo sikolokke gerepyéku,

⁴⁷delokke Jirusalem lokke ilangala opín takamlo bíkke amínlok míílat kupenam emlang delokke maab kupenamem pogooyé.

⁴⁸Nolu sok atí takam sokke hakiipe iyé.

⁴⁹Ngokke Yayike pébisunam atíem ngo nolukíng melík yéku; idola teyo telokke pauarlok bomsang kumang tetengem taon so duupo langka.”

⁵⁰Edílo bí bulum Bethani rísulo gílen botodí, delo bíkke alage lengonla bulum lubéélíkto.

⁵¹Bí bulum lubéé líkrongem, gínyotoku delokke bím teyong amope laasatoku.

⁵²Delokrongem bulu bím kumsukai delokke Jirusalemlo séngéépe ashénge ilangala entoku.

⁵³Delokrongem bulu kumkeng ekum delo Shédíme yidgela duuyar bomkai.