Read Alladian LUK 4 Bible Online

LUK 4 - Alladian bible

LUK 4

¹Jisu bí Deena Aidlok bíísétla Jordan korong delok gílentoku delokke mootum moorang amolo Aide gíboto,

²delo bím looying appikope uyue aapí aang langkato. Bí delo longe kídídelo atí doma tíímape yéto, delo méélam yalumdelo bí kenoto.

³Darkaana uyude bím pokai, “No Shédíke Uemílo sim elísim ettípe ikímoto.”

⁴Jisu bí poyansuto, “Ngiitome podung, ‘Tanie ettíng petomlok turgemang.’ ”

⁵Delo Piyyang Uyude bím kedonko amolo gíbola delokke tani among tabu sim letellok lengkanboto.

⁶Delo bí bím pokai, “Nom ngo sim kaanam takam sokke mirem emlang ralnamem biyé, sim ngom bitung, delokke sékomedí ngo bipe mííyéne bím ngo biladung.

⁷Iname no ngokke keralo lebíng koníla kumsu yémílo si takam si nokkepe iyé.”

⁸Jisu bí poyansuto, “Ngiitome podung, ‘Nokke Shédí ruutum petomme kumsu langka, bím petom míngke sulangka.’ ”

⁹Piyyang Uyude bím Jirusalemlo gíbola kumkeng ekum delokke míílong tupnyulo saabo dola poto, “No Shédíke Uemílo sokke no agíe yopyi kítoku

¹⁰kapeila Ngiitome podung; ‘Nom aipakpe gakbompena kotokiem Shédí bí políkyé.

¹¹Bulu nom buluke alaglok gakrepyéku, demamílo nokke alem no elínglo tunyam supelo.’ ”

¹²Jisu bí poyansuto, “Ngiitome podung, ‘Nokke agíke Shédíme darkang mapeka.’ ”

¹³Edílo uyude sim atí takam aapí aang ikaa penamem iyintodí delo moodíkon legape mepala gíkaku.

¹⁴Dekepe irodem Deena Aid pauarlok Jisu bí Galillo entoku, delo bíkke kobore rego miyolo byargongkai.

¹⁵Bí buluke kumkeng ekumlo gígoola ngiitomem sikbila takam kelok yidnamem paato.

¹⁶Bí bíkke siisangko Najarethlo gíla Sabbath longelo kumkeng ekumlo bíkke iyasupe gíto. Delo bí poripe emla gerepto.

¹⁷Shédíke Kaaluna miri Isaiahke kitabem bím bito. Dem sorkaala sikepe atnamsim paato.

¹⁸“Ruutumke Aide ngokkelo dung. Kapeila bí ngom ngiitomem opan kídílo pogoo bidope tosaktung. Bí ngom pateklo duuna kídíem delokke mingmanem kaapa dokupe, iréénam kídíem mopít dokupe emla pogoodope lulíkto.

¹⁹Delokke Shédíke ipít díku longem pokan bidope lulíkto.”

²⁰Delokrongem bí kitabdem leklumla amidem bilat supa langkula dungatoku. Kumkeng ekumlo duuna miyode bím kanggapto,

²¹delo bí sikepe bulum polen boto, “Silo si dooying agomsi noluke tatkolo arokai.”

²²Delokrongem takamde bím yitto delokke bíkke aiana agomem tatla bulu tarí tannyo kísarupe tatto. “Si Josephke oo mangía?” emla bulu ííbosuto.

²³Jisu bí bulum pokai, “Berokrupe nolu ngom so agom so pokesuyé! ‘Daktor no agísue ipí sulangka! Nokke Kapernaumlo inamem ngoluke tatnam kídí emkom agí doolunglo ilangka.’ ”

²⁴“Nolum ngo aruem podung” emla bí pongundola poto, “Kaaluna miriem sékomete agí doolulo aipe torík sumang,

²⁵Tatgaptola, Elijahke longelo dítag angum kolang poolo akkéko pedong oimape dírí kenue botterupe iduem, Israello bojéko meyéngpe ine kato.

²⁶Idakkom Elijahme buluke aralo séko kíngkom melíkmato, idola Sidon amolo duuna Sarepta doolung lokke meyéng atel kolomin melíktone.

²⁷Delokke Kaaluna miri Elijahke longedelo Israello tííd gene bojéko kato, idakkom sékometeng ipímato, idola Siria lokke Naaman petom memin ipítone.”

²⁸Dem tadrongem kumkeng ekumdelo duuna ami takame marto.

²⁹Bulu gerepla, taon luyulo gílen bolangkula taon delokke dungko yorbe delok nííbongkupe emla míídola teyodelo saaboto.

³⁰Idokom bí buluke pénsamlok pénnyok langaala gínyoktoku.

³¹Delokrongem bí Kapernaumlo enla Galil lokke taonkolo gíto. Sabbath longelo amikídíem bí ngiitom luyil polen bokai.

³²Bulu bíkke ngiitom pobonamem tatla tarí tannyo kísarupe tatto, kapeila bíkke agom dem miramrupe bí poto.

³³Kumkeng ekumdelo uyupe tumna amiko deemana aid duubom namko kato. Bí goktoola pokai,

³⁴“Ei, Najareth lokke Jisu no ngolum ingkoko ipe emla aadune? No ngolum nyokmope emlangía aadune? No sékodí ngo kéndung. No Shédíke Deena Amiko!”

³⁵Delo Jisu bí “Asoope duulangka, amisok lento langku” emla ralnampe luto. Delo uyude amidem ami takam keradelo amolo gelet geyéla tarí iketmape gíkaku.

³⁶Dem kaana ami takame irisinyo kísarupe kaala mipil miyonge pobosukai, “Sikena agomsi ingkuei? Ralnam loklang pauarlok bí uyuem hukum bila len géédokupe idune!”

³⁷Delokrongem bíkke legange ayir agong takamlo byargongkai.

³⁸Jisu bí kumkeng ekum delokke gílen langkula Simonke ekumlo gítoku. Depe iduem Simonke ayode ramnam kila duudo, delo bulu kinamdem monpakla iguldope Jisume roguto.

³⁹Depe iname bí gubadola ramnam dem lutoname, delo de nyokkaku. Bí menang asak darep langkula bulum ibo saabotoku.

⁴⁰Doonyie uadodem, séko buludí atí atí kina ramna kídíem aabotone, bulukíng Jisu bí agí alage leetanla kinamem ipítoku.

⁴¹Uyue ayokon kinamlok “Nomino Shédíke Ue” emla gokdola lenkaku. Idakkom bí bulum lutumto delokke bulum agom pomomang, kapeila bí Kristo emla bulu kénto.

⁴²Píange iyédem Jisu bí rongngamko among kolo gílento. Ami kídíe bím matala bíkke dungkuem kaayédem bí bulum gínyo kumadope emla bulu ralkíto.

⁴³Idakkom bí poto, “Ngo angukon taon kídí lokom Shédíke yéta legangem tatpona ngiitomem pogoo biperung aiyé, kapeila delok legapemin ngom melíktune.”

⁴⁴Delokrongem bí Judia[6] lokke kumkeng ekumlo ngiitom poyar boto.