Read Alladian LUK 5 Bible Online

LUK 5 - Alladian bible

LUK 5

¹Longe konem Jisu bí Gennesaret[7] Sine paatang robelo Shédíke agomem pobo namem talla bím gargong bomna miti milingem dakbosula dakdungem,

²asi sibe delo esab kuuna kídíeke etkungem annyiko metula buluke esabem puubíndope bí kaato.

³Etkung annyi delokke Simonke etkudelo bí reesala, asi arang danpe anyongko yudadope bulum poto. Delo bí etkudelo duudola ami kídíem ngiitomem poyilto.

⁴Bíkke ngiitomem poyinrongem, Simonme bí “Etku sim asi eeríkolo yudala esabem kuulíktola” emto.

⁵Simon bí poyansuto, “Saare, ngolu yoh rubungem kuulate atíkote kuupamang. Idokom nok agompe kungkíyé.”

⁶Bulu dekepe itoname, deddína enguem kuula buluke esabe bédgepe ikai.

⁷Dekepe iname bulu etkung konlo duuna angong kídíem iguldope ruuto, delo bulu aala etkudelo bíísétko yarname etkude giilum gepe ito.

⁸Simon Pitor bí dem kaayédem Jisuke keralo lebíng koníla poto, “Ruutume, no ngokke kerasokke gíto langku; ngo paabna amiko!”

⁹Kapeila bílang bíkke angong kídí takame buluke deddípe kuunam enguem kaala irisinyo kísape mííto,

¹⁰delokke dekepe Jebedike oo Jems lang Joan bínyi, delokke Simonke yéjon kídí dete irisinyo kísape kaato. Delokrongem Jisu bí Simonme, “Pesomapeka, supak kelokke no amiem kuuyé,” emla pokai.

¹¹Dekepe iname bulu etkung annyidem sibelo yudang langkula atí takamem mesu geyéla bíkkíng gímín geto.

¹²Longe konem Jisuke taonkolo yégo dungem, tííd gena amikone bíkkíng aato. Bí Jisume kaayéname, lebíng koníla, “Ruutume, nokke míísang emílo, no ngom deemo laayéku,” emto.

¹³Jisu bí alage meetardola amidem ukkíto. “Ngo míísadung, deelangkuka!” bí emto. Delo menang asak tíídde bíkke lokke nyokkaku.

¹⁴Delo Jisu bí bím “Sékomete pomapeka, idakkom no gíla miriem lengkan sulang kuka delokke nokke aikunamem ami keralo lengkan sudope, Mosike pokampe Shédíkíng amanem bisu tolangku.”

¹⁵Depe ilate bíkke agérde pakyape byargoola, deddína amie, agomem tatpe emla, delokke kinamem ipí kosupe emla aato.

¹⁶Idola Jisu bí leko leko rongngamko amolo gíla kumsuto.

¹⁷Longeko bí ngiitom luyilla dungai, delo Galil lokke, Judialokke, delokke Jirusalem lokke doolung miyolok aana Pharisi kídí ekelang ukil kídíekete duumín geto. Ruutumke pauare kina kídíem ipí dokupe bíkkíng duuto.

¹⁸Pittempe kina amikonem amieke ayoko ketpu pakpe jootaksula Jisuke keralo ekum aralo jongadope emla ralkíto.

¹⁹Milung aralok jonga bompeko kamang iyédem, bulu ekabem atyala, ami takam gooradelo Jisuke keralo ketpu pakpe joila meto.

²⁰Jisu bí buluke míngkengem kaayédem, bí poto, “Angonge, nokke paab kídíem maab tobong.”

²¹Pharisi kídíelang ukil kídíe sikepe agí agísue míísu lento, “Sékoi si Shédíme lupéésuna ami si? Sékote paab kídíem maab bilana kamang, Shédí petommin dem iladune?”

²²Buluke mííbo lubo sunamem taddola Jisu bí bulum luto, “Kapeila nolu noluke aanglo dekepe míídune?

²³Ingkuei pobaa yaname, ‘Nokke paabem maab bito’ emnamdía, ma, ‘Gerepla gítolangku emnamdía?’

²⁴Depe ina me Tanike Ue tani amoso paabem maab bilanana ralnam kadung emnam dem nolu kéndope emla idung.” Bí pittempe kina amidem poto, “Ngo nom podung, gerepla nokke ketkeng dem joosula gíka langku.”

²⁵Menang asak amikídí keralo tíkrepla bíkke ketpuem laala Shédíme yidge langaala ekumpe gíkaku.

²⁶Takame irisinyope mííla Shédíme yidgeto. Bulu pesue idola pokai, “Silo ngolu kaarí kaanyo atíko kaato.”

²⁷Sok méélampe, Jisuke luyupe lendo kuem, kajanang ulgoona Lebi emnam amikonem bíkke agér iko opislo duupe kaato. “Ngokkíng gímín getola” emla Jisu bí bím tomto,

²⁸delo Lebi bí takamem mesutola bíkkíng gímín geto.

²⁹Delokrongem Lebi bí Jisume agí ekumlo doman dobosupe emla aabotoku. Delokke delo kajanang ulna kídí elang amie bojé kokai bím dobosuto.

³⁰Idakkom Pharisi kídí elang buluke opéé ukil kídíe bíkkelo luyilsuna kídíem, “Kajanang ulna kídí lolang ‘Paab gena’ kídílo nolu kapeila dobo tííbo sudune?” emla ííto.

³¹Jisu bí bulum poyansuto, “Ekerna kídíde daktor míímang idola kina ami kídí emin daktor míídune.

³²Ngo deena kídíem tomkape aamang, idakkom paabna kídíe míílat suyékupe emlamin aadune.”

³³Bulu bím poto, “Joankelo luyilsuna kídíe leko leko domape nyola, kumsudung delokke dekepe Pharisi kídíke luyilsuna kídíete idung, idola nokke kídísi doyar tííyarla yédung.”

³⁴Jisu bí poyansuto, “Angong kídílokke magbue duumín gedungem bulum dobomape duurom boyénía?

³⁵Idakkom longeko buluke magbuem laapakdíe pííyé; delo bulu domape nyoyé.”

³⁶Bí bulum luyiisunam ngiitom kote pobito, “Sékoteng ege anílok alopko pétla, ege akulo omtem líkna kamang. Dekepe bí imílo ege anídem bétmoyé, delokke ege aníde ege akudelo gyapmang.

³⁷Delokke sékote ayo kaksur akulo onggur alang aníem pílíkna kamang. Bí depe imílo onggur alang aníde ayuem bukkéla, alangde toolenyé delokke kaksurde bukkéyé.

³⁸Ma, aní alangdem aní kaksurlo písiipe aido.

³⁹Delokke aku alangem tíípala sékote aní alangem tíílína kamang, kapeila bí ‘Akusi aiyadung’ empoyé.”