Read Alladian LUK 6 Bible Online

LUK 6 - Alladian bible

LUK 6

¹Apééla nyodí longekonem, Jisuke arík raadalok gídagem bíkkelo luyilsuna kídíde ambengem lakpyolo yirla ambínem doto.

²Pharisi kídíe íngkíto, “Sabbath longelo ibaa manam atíem nolu kapeila idune?”

³Jisu bí bulum poyansuto, “Dabidlang bíkke angong kídíe kenoduem inamem nolu porimanía?

⁴Bí Shédíke ekumlo aala mirikídí petomke dope namem Shédíkíng binam ettíngem laala doto. Delo bí bíkke angong kídí emte bisuto, dem nolu porimanía?”

⁵Delo Jisu bí bulum poto, “Tanike Oode Sabbath lokke Ruutume.”

⁶Sabbath longe konlo bí kumkeng ekumlo gíla luyil dungem, lakbík alage sina amiko katuai.

⁷Pharisi kídíe kelang ukil kídíeke Jisu bí Sabbath longelo ipíyédí ipímadí emla, bím lupe géépeko pongkok matala bím kanggap bomdungai.

⁸Idokom bulu ingkueke mííbom dungadí dem Jisu bí kénto delokke alag sina amidem poto, “Takam keralo dakreptola.” Delo bí gerepla delo dakbito.

⁹Delo Jisu bí bulum poto, “Ngo nolum íngkídung; Sabbath longelo aina agér inamdía ma, atímana agér inamdía, turnamem mosing kunamdía ma, nyokmo namdía aiyane?”

¹⁰Bí bulum kanggo supala amidem poto, “Nokke alage yamtarto.” Bí depe ibito, delo bíkke alagde aikaku.

¹¹Idola bulu marla Jisume kape imíloi emla buluke aralo pobo sulenkai.

¹²Depe iduem Jisu bí etpang teyolo kumsukape emla saala, yoh rubungem delo Shédíme kumsula duutíto.

¹³Roh píange karyédem, bí bíkkelo luyilsuna kídíem tomnín supala delo íying kolang annyidem ullento, dem bí Tomlíknam emla amín mínlíkto:

¹⁴Simon (bím bí Pitor emto), bíkke bíro Andria, Jems, Joan, Philip, Bartholoma,

¹⁵Mati, Thoma, Alphaike oo jems, Simon Jilot,

¹⁶Jemske oo Juda delokke míírí míínyona Judas Iskariot bulu.

¹⁷Bí bulum lekope oibosu langkula yiibe amongkolo dakto. Bíkkelo luyilsuna kídíke ami mílí delo yédo, delokke Jirusalem lokke aana Judia ami kídíe, siyéng ampelo duuna Tur lokkelang Sidon lokke ami kídíe,

¹⁸bíkke ngiitomem tatpe emla delokke buluke kinamem ipí kosupe emla aadumsuto.

¹⁹Ralname bíkke lok gílenla bulum takam ipíkolok, takame bím ukkípe emla iyinto.

²⁰Bíkkelo luyilsuna kídíem kaasudola, bí poto, “Opanna nolu gérne, kapeila Shédíke amode noluke.

²¹Supakke akii kenona nolu gérne, kapeila nolu keno yimayé. Supakke kapna nolu gérne, kapeila nolu ngilyéku.

²²Tanike Oo legape tani kídíke kangkinam nolu, lupu luyééla mepaknam nolu atímana amín gena nolu gérne.

²³“Delo longedelo nolu ashénge séngéé langka, kapeila teyotelo bottena amanem nolu paayé. Buluke abu kídíe kaaluna miri kídíem sikepe ito.

²⁴“Idakkom mirem kídía, nolu ankí kenoyé; kapeila nolu noluke ashéngem paatobong.

²⁵Supakke dodarna kídía kapeila nolu kenoyéku;

²⁶Supakke ngilna kídía kapeila nolu ankí kenola kapyéku. Kapeila noluke abukídíe, yadgoona kotoki kídíem depe ito.”

²⁷“Ngokke agomem tatna kídí nolum podung: Noluke miruem ayalangka, nolum kangkina kídíem aina agér ibilangka,

²⁸nolum bééna rolna kídíem lubéé langka, nolum míírí míínyona kídíem kumbilangka.

²⁹Akone kémkém konem piyémílo akonemte geka subilangka. Akone noluke galugem rotbín yémílo, bím iyasumape dem laamotoka.

³⁰Nolukelok kona miyongem bilangka, delokke akone noluke ekurangem laadumílo, dem kolat suku mapeka.

³¹Amie nolum kape kísa ibiduama emla nolu míídudí dekepe nolukom amiem ilangka.

³²“Nolum ayana petomem, nolu ayayémílo kape kísa yidnamem paayéne? Ayanem paab gena kídíete ayado!

³³Nolum aipe ina petomem nolu aipe iyan sumílo, ingkona areko nolu paayén? Paabna kídíete dem idung.

³⁴Delokke noluke paayan supeko petomlo nolu atíem biyémílo noluke ingko areko kadun? ‘Paab gena’ kídíete bitonam aduem apíípe paadokupe emla paab gena ami terengem bido.

³⁵Idakkom noluke miruem ayalangka, bulum aina atíem ibilangka, bulukelok atíem pangkupe emla míímape atíem bilangka. Delo noluke amane botteyé, delokke nolu kedon yalumna Shédíke oope iyé, kapeila bí mikit sorit kídí lolang atímana kídílote ayadung.

³⁶Yaasam langka, noluke Abuekom yaasamdung.

³⁷“Bisar bosu mapeka, demílomin nolumkom lukaa mayéne; maab bosulangka, demílomin nolumkom maab biyéne.

³⁸Bibosutoka, demílomin dem nolumkom biyéne. Aipakpe kíkíla, níísiila, ngensiila, delokke bíípok dope noluke bayélo toolík biyéne. Nolu ingkolok kíkí dudí delok nolumkom kíkíyéku.”

³⁹Bí luyiisunam lokte sikepe pokanto: “Mingmana tanide mingmanem gíbo layénía? Annyi pakde deerulo olík mayé langa?

⁴⁰Porikoode pori babuem kedon yamang idakkom apíípe terníng ina miyode bíkke pori babu kísape iyé.

⁴¹“Agíke amig takodem kénsumape, noluke bíro lokke amig takodem nolu kapeila kangkane?

⁴²Kape kísa nolu noluke bíruem ‘Bírue nokke amig takodem ngom laalenmoi’ emyéne? Nolu agí agíke amig takodem kaasu lamang. Aromana nolu, kerape noluke amig takodem laabín sutola demílomin noluke bírolokke amig takodem laabíndope kaapayéne.

⁴³“Ardana esiide ardamana ayé éémang, ardamana esing dekom ardana ayé éémang.

⁴⁴Esing miyodem ayé engkorlok kangkéndung. Tanie taanyum payémlok tapang ayém, demangkom onggur ayém pílmang.

⁴⁵Aina amide aina aanglok aina atíem laalen sudung, idola atímana amide atímana aanglok atímana atíem laalen sudung. Kapeila bíkke aapí aang míngad emmin nappalok polendune.

⁴⁶“Nolu kapeila ngom, ‘Ruutume, Ruutume, emla gokkane, idola ngokke ponampe imane?

⁴⁷Ngokkíng aala, ngokke agomem talla, delokke dekedem igedudí, bulu kapenedí dem ngo nolum lengkanyé.

⁴⁸Sékodí agíke ekumem modungem eerídope koopala, ekumem líírelo molíkdune, bíkke kísape ine bí. Méélamdem asi puumue aabomla, gumnamde níída sulate ekumde beleemang, kapeila dem edíírupe motung.

⁴⁹Idakkom séko ngokke agomem taddola dem ige madudí de amide ekum gaangem amolo aipe díílíkmane. Méélamdem gumname aala ekumdem nííname, ekume bénla delokke bénmík sukai.’ ”