Read Alladian LUK 7 Bible Online

LUK 7 - Alladian bible

LUK 7

¹Jisu bí bíkke ponam takamem ami tatna kídí keralo poyin rongem Kapernaumlo bí aato.

²Depe iduem Sipaying migom lokke ayarunam béérang kone kila sita pakto.

³Sipaying migomde Jisuke legangem talla Judai miro amieke, aala bím ipí dokupe rogutoka emla bí tomdope melíkto.

⁴Bulu Jisukíng aayédelo, bím ankírupe rogudola pokai, “Si ami si nokke igulem paapenako,

⁵kapeila bí ngoluke amiem, ayala noluke kumkeng ekum emteng mobito.”

⁶Dekepe iname Jisu bí bulukíng gímín geto. Bí ekum ayirlo pííyédem, sipaying migomde bíkke angong kídíem Jisume lutumdope políkto, “Ruutume, ankípe isumapeka; kapeila nom ngokke ekum aralo aabidope inamdem ngo annyipe míísudung.

⁷Dekepe ikolokmin ngo agíete nokkíng aapenamem annyipe míísutone, idakkom agomko pobimílo ngokke béérang si ekeryéku.

⁸Kapeila ngo agíe ngompemílo botteyana migom rumkílo dung, delokke ngokke rumkí lokom sipayinge kadung. Ngo akonem, ‘gílangka’ emmílo bí gído, delokke ‘aalangka’ emmílo bí aabido. Ngo ngokke béérangem, ‘Sim ilangka’ emmílo bí dem ido.”

⁹Jisu bí dem tarí tannyope tatpala, bíkkíng gímín gena miludem kanggo sudola poto, “Nolum ngo podung, Israel aralokom bíkke kísana bottepe míngkeng kana kaapamang.”

¹⁰Delokrongem bím tomdope melíknam ami kídíde ekumlo enlangkula kaaname béérade aikaku.

¹¹Ool doomape méélamdem Jisu bí Nain emnam taon kolo gíto, delo bíkkelo luyilsuna kídí elang delokke miti milinge bíkkíng gímín geto.

¹²Bí taon yapgo delo píínín yédem, ami sinako joobom dakpe kaato. Sinade anelokke oo atele, delokke anede meyéngko. Delo delok taonlokke deddína amie bíkkíng gímín geto.

¹³Ruutum bí bím kaayédem, bíkke aangde bím ayangkane “Kapmapeka” bím emto.

¹⁴Delo bí gíala, simang ketko bakos dem ukkíto, delo ami joona kídíe dakkai. Bí poto, “Yaamé koo nom ngo podung, gerep langka!”

¹⁵Sina amide duurepla luposuto delo Jisu bí bíkke anelo melat subitoku.

¹⁶Bulu takame pesue idola Shédíme yidgeto. “Ngoluke gooraso botteruna kaaluna miriko lenkai, Shédí bí bíkke amiem igulkape aadung” emla bulu poto.

¹⁷Jisuke inam sokke legange Judia tabung lolang dunggoona moole takamlo byarying gongkai.

¹⁸Si takam si Joanke bíkkíng luyilsuna kídíem poname: Annyi konem tomla,

¹⁹bí bulum Ruutumme sikepe íngkídope emla melíkto, “Noya aayé embomname, demangkom ngolu angukon angku penako toyapía?”

²⁰Bínyike píírong dem, bínyi poto, “Joan Baptist bí ngolum nom tatkídope melíktung, Aapenade nua, demangkom angu konkua ngolu toyapene?”

²¹Depe iduem Jisu bí kina ramnemlang urompe tumnem bojéko ipíla mingmana kídíemte bojéko ipítoku.

²²Dekepe iname bí kotoki kídíem sikepe polík toku, “Gílangkula noluke kaanam tannamem Joanme pobi tokuka: ‘Mingmane migdar dungku, letu lebééne gídungku, tííd gena kídíe aikaku, ruubéne tatkaku, sinakídíe gerep kaku, delokke tatpona ngiitomem opan kídílo pogoodung.’

²³Ngokke legalok olet kumana tanide gérne.”

²⁴Joanke kotoki kídíde gírongkuem, Jisu bí milung gooradelo polenboto: “Nolu ingkueke kaape emla mooruk amolo gílentone?

²⁵Demamílo ingkueke nolu kangkape emla gílentone? Ege galuk kampona gena amikua? Ma, arekanarung ege galuk genade roja ekumlo doman tíísan lamin duudune.

²⁶Idakkom ingkoko kaape emla nolu gílen tuane? Kaaluna mirikua? E, ngo nolum podung, kaaluna miriem botte yanako.

²⁷Si sikepe ami delokke legangem potung: ‘Ngo noluke kerape ngokke kotokiem megelíkyé, bí noluke kerape noluke bedangem iruubiyé.’

²⁸“Ngo nolum podung, ‘Mime kídíke onam aralo Joanme botte yana kamang; depe idokom Shédíke amolo améyalumna bí Joan mete botteyane.’ ”

²⁹(Ami takame, kajanang ulna kídíete Jisuke agom kídíem tayyédem, bulu Joankíng baptis ikosula, Shédíke bedasi ainako emla mííto.

³⁰Idakkom Pharisi kídí elang ayon kénna kídíe buluke legape Shédíke mííbom namem tomangkai, kapeila bulu Joankíng baptis ikosumang.)

³¹“Ingkoloi sok yérum sokke ami kídísim demílo poyii supene? Bulu kape kísaneke?

³²Bulu dukan bojarlo angong tomgoosula ina kookídí kísane: ‘Ngolu nolukepe tapung muttuai idola miri momang; ngolu pengé lutuai, idola nolu kapmato.’

³³“Kapeila Baptist Joan bí atí domape delokke apong tíímape nyola aato, delo nolu, ‘Bíkkíng uyuko kadung’ emto.

³⁴Tanike Ue dola tííla yéto, idokom nolu bím ‘Bí domon tíímon nako, kajanang ulna delokke paab gena kídíke angongko’ emla manto.

³⁵Idakkom arope toríksuna takamlo Shédíke aro menamem lengkandung.”

³⁶Depe iduem Pharisi akonde dotké dobosupe emla Jisume tomto, depe iname bí Pharisi delokke ekumlo aala delo apim dobosuto.

³⁷Paab agér itína mimeko doolung delo dungai. Pharisi delokke ekumdelo Jisu bí dobo dogoola duudung emnam dem tatla namporuna téleke temakolo bomala;

³⁸Jisuke alem méélam danlo dagala kapdola, Jisuke alelo mimede agí miksiem tíllíkto. Delokrongem bí dem bíkke dumítlok títbín dola mumpupto, delokke tél nyooto.

³⁹Bím dobo tomna Pharisi de dem kaayédem, bí agíe míísuto, “Si ami si kaaluna miri komílo bím ukkína amidem kénsuyé delokke kapena paab agérlo yéna mimekoi dem kényé.”

⁴⁰Jisu bí poyansuto, “Simon, ngo nom agom popenamko kadung.” “Saare, potola” bí emto.

⁴¹“Midum annyiko amilo ajéng gedungai. Akonde abale língoko delokke akonde balying pilngoko.

⁴²Annyi delokke sékote bím bilat kulana katomang, depe iname bí annyi delokke ajéngem mepak bito. supak annyi delokke séko bím bojépe ayang yayén?”

⁴³Simon bí poyansukai, “Ngokke mííname ajéng bojéyape gena mesam bikunam amide.” “No lujipakdo” emla Jisu bí pobito.

⁴⁴Delokrongem bí mimedem kaasudola delokke Simonme poto, “No sim mime sim kaadunía? Ngo nokke ekumlo aato. No ngokke alem arbín nape asi kokom bimang idola si mime si ngokke alem bíkke miksilok arbínla delokke bíkke dumítlok títbínto.

⁴⁵No ngom mumpupmang, idokom bí ngokke alem aado delokke ila meyimape mumpup puptídung.

⁴⁶No ngokke dumpooso tél pílíkmang, idakkom bí ngokke alem nampona tél píkatto.

⁴⁷Delok legape, ngo nolum podung, bíkke paabem bojéko maab bito kapeila bí airupe ayato. Idola séko bulum anyope maab bitodí de ayang anyolok ikai.”

⁴⁸Delo Jisu bí mimedem poto, “Nokke paab kídíem maab tobong.”

⁴⁹Angong duujon kídíde buluke aralo sikepe pobosukai, “Sékoi si amisi paab kídíemte maab bidune?”

⁵⁰Jisu bí mimedem poto, “Nokke míngkenge nom iturtoku; aipe gíka langku.”