Read Alladian POBENG BINAM 10 Bible Online

POBENG BINAM 10 - Alladian bible

POBENG BINAM 10

¹“Depe irodem RUUTUM bí ngom poto, ‘Kerangke kísa, líítam annyiko gatlen palang kula dííteso ngokkíng saalangkuka. Deke delokke kékonlo, esinglok sondukko dem mekengpe omlangka.

²Nokke kerangke benpaktonam líítam annyi delo atnam agom kídídem ngo atlík biyéku. Dekepe irodem, dekedem no sonduk arang delo melangka.’

³Depe pokolok ngo akasia esiilok sondukko omlangkula, kerangke kísana líítam annyiko gatlen langkula, dem líítam annyi dem ngok alag so bomla díítepe resaatoku.

⁴Dííte lebelo gídumsudo longe delo, nolume eme aralok ponam RUUTUM ke dííte delo kerape Lulígnam Ngiitom Íying atnam deme líítam annyi delo RUUTUM bí atlíktoku. Depe atkupala RUUTUM ke ngom birongkuem,

⁵ngo dííte delok oilangkula, líítam annyi deme sonduk aradelo RUUTUM ke ngom políknampe mesiitoku. Dekede supakkom delo duudung.”

⁶(Delokke Israel kídíe Jaakan ami kídí lokke asi déérung kídí delok gílen langkula Moserahlo pííto. Delo Aaron bí sila bím yuto. Bíkke ayanpe, bíkke oo Eleajarbí bím miripe yétíttoku.

⁷Delokke bulu Gudgodahlo gíto, delokke gíyon sulangkula bulu asi kako Jotbathah emko mooloplo duuto.

⁸Dekepe ido delo RUUTUM bí Lebi opínem miri ami kídípe ila, RUUTUM ke Daapong Sondugem kaabom tadbomdope, bíme agér ibila, bíkke utepooro agomem amilo políkla idope imoto. Silo loope dekepe bulu miri agérem ibomdung.

⁹Sikepe ilamin Lebi kídíe, abíd opín-buang kídíke asi-among paayinduem paamín gematone. Buluke yége-dagge bompenampe bulu RUUTUM ke miripe ila, RUUTUM noluke Shédíke pokampe dekena miri agérem paato.)

¹⁰“Ngo kerangke kísape, dííte delo looying appi kolang yoying appiko duutoku. RUUTUM bí ngok ponamem tatla nolum nyokmomato.

¹¹Delo RUUTUM bí, ‘Gílangka, ami kídíem gíbola, ngokke buluke buku kídílo pélíksula togesunam asi-among dem bulu yébom-dakbom dope gíabolangka,’ emla ngome lulígto.”

¹²“Depeila E Israel, supak RUUTUM noluke Shédíbí nolukíng ingko koda kodune; RUUTUM noluke Shédíme pesolangka. Bíkke bedang lok gílangka. Bím ayasulangka. Bíkke agérem noluke aapí-aang tabuupelang aidlok apíírupe gérbilangka.

¹³Delok teyolo, noluke ainam legape ngo silo ingkona RUUTUM ke lulíg emlang idongem nolum bidudí, dem nolu igap gelangka.

¹⁴Teyong among telang, dem pemílo teyong remé kídí tesilang, tani among so delokke sokke ato-siro takam si RUUTUM noluke Shédíke.

¹⁵Idola RUUTUM bí noluke buku kídílo ayange kayala, abíd mibo-miying opín-buangem metola, silo meloke yéna, buluke otíng-oyin nolum ullento.

¹⁶Depeila, supak lokke nolu RUUTUMke agomem tatlangkuka, delokke miké aapí-aangem geyimapeka.

¹⁷Kapeila RUUTUM noluke Shédíbí, shédí kídíke Shédíe delokke ruutum kídíke RUUTUMe. Bí séko memkom kaangu sumana delokke reko sumana, yirí-pedípe míínam, miga-miramna Shédíe.

¹⁸Bí ane abu kaimana ome-oo keepe lang mime meyéng kídí legape tolya-ralya subine delokke mibo-miyingem donam-tíínam emlang ege-galugem bila ayane.

¹⁹Delokke nolukom mibo amiem ayalangka, kapeila Ijipt amonglo nolukom mibo amipe yétuai.

²⁰RUUTUM noluke Shédíme pesolangka, delokke bíkke agér-anamem ibila bím kumsula yélangka. Bím aipakpe gagda sulangka delokke bík amínlok pébo sulangka.

²¹Bí noluke yidbom pename, bí noluke kangkolo yirí-pedípe mííbom penamelang deddína irisinyona agér kídíem ibina Shédíe.

²²Ijipt amonglo noluke buku kídíe tokdoem midum íying kíníd petomko kato. Idola supak, RUUTUM noluke Shédíbí nolume taleng telokke takar kísa milu-mibampe imokai.”