Read Alladian POBENG BINAM 11 Bible Online

POBENG BINAM 11 - Alladian bible

POBENG BINAM 11

¹“RUUTUM noluke Shédíme ayasula, bík ayonem, bík idongem delokke bík lulígemla bíkke mííbomnam kídíem igela bomgaplangka.

²RUUTUMke nolume bíkke ségu-siangem lengkanla nolum kénsudope inamde, noluke ome-oo kídíem imape nolummin itone. Nolume kénsudope bíkke inamem nolu silo míípasulangka. Nolu RUUTUM ke angun-abéem, bíkke miga-miram, bíkke yamtarna lakbíng ralnamem,

³bíkke irisinyo ila Ijipt among takam lolang Pharaoh rojake keralo ikannamem nolu kaayinto.

⁴Ijipt kídíke maglínge nolum monbomduem, maglíng demla buluke guré delokke gaari kídíem Silíng Siyénglo asi aayinmola RUUTUM ke bulum inamem nolu kaayinto.

⁵Nolu supakke moolop so píímang adape, yépol mooruk amonglo bíkke, noluke legape ato-siro inam tabungem noluke ome-oo kídíe kaamang.

⁶Reuben opínke Eliabke oo annyi; Dathanla Abiram bínyike teyonglo bíkke inamem míípasulangka. Ami takamke kangkolo, amonge barkéla, bínyimla bínyike erang tabungem, tombu kídíem, simon-sili takamem delokke béérang takamem méyyin namem nolu kaayinto.

⁷Sikepe botteruna RUUTUM ke agér inam kídíem noluke agí amigsu kídíe kaayinsuto.

⁸“Depeila siloke ngokke lulígnam tabung sim nolu igelangka. Depe imílo, Jordanem koola noluke yébompeko asi-among delo gípe nolu ralnam kayé delokke deme yébomlayé.

⁹Sok teyolote ngullang elang gakíre bingko amongem biyé emla RUUTUM ke noluke buku kídí lolang buluke otíng-oyin kídílo pésula tolíksunam among delo nolu deddína dugrík loope yébomyé.

¹⁰Noluke supakke dungabompenam among esi, noluke kerangke dungako Ijipt among kísamang. Belo, noluke ali-ayé ilíkdoem ankírupe asiem langaala arík ituai.

¹¹Idola noluke aala dungabompeko among esi dííte kala, yiibe kala pedong oko amonge.

¹²Kapeila dem among dem RUUTUM bí, dítak ilen lokke ila iyin loope agínpe kaabomdung.

¹³“Depeila ngokke siloke lulígnam kídí sim nolu aipe bomgapla RUUTUM noluke Shédíme ayala, noluke aapi-aang takamlok, noluke aid takamlok, bíme agér ibiyémílo,

¹⁴bí dígín-díyu lolang gédí-ponggolo noluke among delo pedong omola, nolu ali-ayém, asi-apongem, olib télem gaipe isi-sasidope imoyé.

¹⁵Bí noluke simon-sili kídí legape nesi-neyangem garmola nolum aapí-aang apíírupe dola-tííla yédope imoyé.

¹⁶Nolu agíem yatkosula, angukon uyu kídílo kumsu-josula yéku madope nolu ansulangka.

¹⁷Depe imílo, noluke teyolo RUUTUM bí marla, noluke amongde ali-ayé garyimadope, bí talengem ikapla pedong omo yimayé delokke RUUTUM ke nolum aina among binam delok nolu nyokyinyéku.

¹⁸“Ngokke agom ponam kídí sim noluke aapí-aang delo edíírupe duumo langka. Noluke alag kídílo dekedem míípa sumonana iyodpe ginlíksula, noluke tukku kídí delo dekedem éélík sulangka.

¹⁹Dekedem noluke ome-oolo poyil langka. Noluke ekumlo duubosuyém, noluke bedu-bedanglo enyé-gíyém, noluke ibayém delokke noluke gerep yékuem dekedem nolu pobosulangka.

²⁰Noluke ekum kídí lokke eyab kídí lolang noluke etor luuyab kídílo dekedem atlík langka.

²¹Dekepe ibosumílo, RUUTUM noluke Shédíke noluke buku kídílo amongem bisuyé emla pébisuko among delo nolu lang noluke ome-oo kídíe sanam yimanam longem yébomyé. Among teyong so talenge kadu tete loope nolu yéyar bomyé.

²²“Nolume igedope emla ngokke lulígnam tabung sim nolu aipakpe igapgela, RUUTUM noluke Shédíme ayala bíkke bedang kídí lok gíla, bíkkíng gaggap mínla nolu iyémílo,

²³RUUTUM bí, nolume ralyana, milu-mibam yana opín-buang takamem monpakyé.

²⁴Noluke ale tuangko moolop tabungde nolu keepe iyé. Noluke among rísue, yépol mooruk lokke ila Lebanon loope, delokke Euphrates korong lok ila anggodan Among Raadang Siyéng loope ilíkyé.

²⁵Séko amiekom nolum dakka sulamayé, kapeila RUUTUM noluke Shédíke pébisunampe bí reyubrunam peso-ríanem melígla ami kídíe nolum pesodope noluke gíko takamke asi-among tabunglo iyé.

²⁶“Kaatola, noluke keralo silo ngo utepooroem lang béénamem leedung.

²⁷RUUTUM noluke Shédíke lulígem tatnamde noluke utepooroe.

²⁸RUUTUM noluke Shédíke lulígem tatmape delokke siloke ngokke nolum poyilnam bedang sok nolu gímape, noluke kénkímanam uyu kídíem kumsuyémílo nolu kelo bééname aayé.

²⁹Edílo noluke yébompenam asi-among delo RUUTUM noluke Shédíbí nolum gíaboyédí, delo Gérijim dííte lok nolu utepooro agomem gogyipe goglangka delokke Ebal díítelok béénamem gogyipe goglangka.

³⁰Si dííte annyi si Jordan korongke anggodanlo dung delokke de annyide Jordan yiibelo duuna Kaanan ami kídíke among rísu aralo kadung. De annyide Gilgal doolung ayirlo duuna Moreh lokke kumsuko esing delok mooteng mape anggo danlo kadung.

³¹RUUTUM noluke Shédíke nolum binam asi-among delo aala dunga bomdope nolu Jordanem koopepak idung. Edílo nolu elo koola deme laala delo dungabomyédí,

³²delo nolu, siloke ngokke nolum lulígnam ayon kídí emlang idong kídíem aipakpe igap gelangka.”