Read Alladian POBENG BINAM 12 Bible Online

POBENG BINAM 12 - Alladian bible

POBENG BINAM 12

¹“RUUTUM noluke buku kídíke Shédíke, nolum yébom dagbom dope emla tolíksunam among delo, noluke duudu tetengem, sim ayon kídí simla idong kídí sim ansula igap ayarlangka.

²Noluke monpak bomnam ami kídí delokke kedonko dííte kídílo, díítum kídílo, delokke rotne kídílo uyu kumpompe iko moolop kídíem nyokyin molangka.

³Buluke runggu kídíem atbila, buluke kumbomnam elíng gaang kídíem ittír-iyyirla, buluke Ashérah gaang kídíem emelo rompakla, buluke uyu kídíke mimang kídíem patír-payirbila, dekena moolop kídí delok buluke amín kídíem tídkutgoyin langka.

⁴“Buluke ségu kísape RUUTUM noluke Shédíme kumsumapeka.

⁵Idola noluke opín-buang kídí tabungke aralo bíkke amínem medope, bíkke duupeko moolopko RUUTUM bí tongusuyé. Delo moolop petom delo nolu gíla bím kumsulangka.

⁶delo noluke romnam aman kídíem, ipak ipenamem, íying sanpegem, delokke angurupe míísula aman bomanamem nolu bomalangka. Delo nolu ingkoem biyé emla togesula pésutodí, deke emlang noluke agí míísatsunam amanem delokke noluke gooru lokke oge yalumnam emlang mér sobén kídíke oge yalumnamem bomala ilangka.

⁷Delo RUUTUM noluke Shédíke keralo, noluke alag ugangko takamlo bíkke utepooroem ruulíknam legape, nolulang noluke edung erange ashéng-angampe doman-tíímanla ibosulangka.

⁸“Silo meloke ngoluke yékampe nolu agí agí mínggí sulok kumsu-josula, nolu elo ibosumapeka.

⁹Kapeila noluke yébom-dagbompenam, RUUTUM ke tolíknam asi-among delo nolu gíala aapí-aange eetetpe duupekolo aamangada.

¹⁰Idola noluke yébom-dagbom penam, RUUTUM ke nolum binam asi-among delo nolu Jordanem koola gíyé. Depe irongem RUUTUM bí nolum eetet-monetpe duumola, nolum gargoola dunggo bomna miru kídí lok bí nolum mopítyé.

¹¹Dekepe iyé delo, RUUTUM noluke Shédíbí noluke aralo agí amínem duumopeko moolop tokodelo nolu, noluke romnam aman kídíem, ipak ipenam kídíem, íying sanpek kídíemla noluke angurupe míísula aman bomanamem delokke noluke biperung emla RUUTUM kíng gairupe mííbom sunam aman takamem bomdum sualangka.

¹²Delo, RUUTUM noluke Shédíke keralo nolulang, noluke ome-oo kídíe, noluke pakne-pakbo béérang kídíe lang, agíke yébom-dagbom supenam asi-amongem panlík manam, noluke doolung kídílo duuna Lebi kídíem lekope ashébosulangka.

¹³Idola noluke ipak-saamoem, noluke agí agí mííbang suko mooloplo ibosumadope ansulangka.

¹⁴Dekedem RUUTUM ke tongusuko opín konke moolop atel delo petom, ngokke popang tonam romnam ipak emla abídem bomala ibosulangka.

¹⁵“Idola ingko-ingkona amolo nolu duuyédí, delo nolu agíke míínamsupe taroem mokala dobosulado. RUUTUM bí edít kodí biyéne, deddíko dobosulado. Nolu kape kísa sisuk emla sidumem dodudí, deke kísape nolu dormo ayonlok deene lang deemana tabunge dobosulado.

¹⁶Idola nolu deke delokke iyyiem domapeka. Dekedeme asiem amonglo purpaknam kísa purpak langka.

¹⁷Noluke ali-ayé lokke íying sanpegem, asi-apong amanem, télem, noluke gooru lokkela mér sobén kídíke oge yalumnamem, noluke angurupe míísula aman bipe emla togesunamem, ashéng amanem delokke biperung emla gairupe mííbomsunam aman kídí takamem, nolu agí dungko-dakko doolunglo dosumapeka.

¹⁸Delok ayanpe RUUTUM noluke Shédíke tongusuko moolop delo, nolulang noluke ome-oo kídíe, pakne-pakbo agér ibina kídíe delokke noluke doolunglo duuna Lebi kídíe lekope RUUTUM noluke Shédíke keralo, ashéla dobo-tííbo sulangka. Nolu, agí alaglok ato takamem isunam legape delo ashé bosulangka.

¹⁹Nolu among delo duudung tetengem Lebi kídíem míípakmape kaasi-tadsi suyarlangka.

²⁰“Edílo RUUTUM noluke Shédíbí, noluke asi-among rísuem, bíkke pébisunampe gooyamoyédí, delo nolu, agíke mííbang sukolo noluke aange apíírupe adín dolado.

²¹Noluke kumsuko moolopde mooteng ruyémílo, nolum RUUTUM ke ruubinam gooru, mér sobén kídíem, noluke agí mííbasuko moolop kolo pala, ngokke potonampe adín kídí dem agí ekumlo dobosulado.

²²Dormo ayonlok deene lang deemana amiete dolado. Dekedem nolu sisuk emla sidumem donam kísa dobosulado.

²³Idola nolu iyyiem domapeka kapeila iyyide turname, depeila nolu turnamdem adín delo dotak sumapeka.

²⁴Nolu iyyidem domape asiem purpaknam kísape deme amonglo purpaklangka.

²⁵Nolu dekeme domapeka. Depe imílo nolu, RUUTUM ke amig kangkolo kaaba-tadbape yéla, nolula noluke ome-oo kídíe ai-kampope yéyé.

²⁶“Idola noluke kumlíknam ato kídíemla, agíe míísatsula bipe emla pélíksunam kídíem bomla RUUTUM ke tongusuko moolop delo gíla,

²⁷noluke romnam aman kídíem, iyyi emla adínem itaksula, RUUTUM noluke Shédíke runggu delo bilangka. Noluke ipak inam kídíke iyyi kídídem RUUTUM noluke Shédíke runggu delo purlík langka, delokke adín kídíem dobosulado.

²⁸Ngokke nolum pobinam idong kídar sim aipakpe an-gapsula igelangka. Kapeila dekepe imílo nolukíngla noluke oten ome-oo kídí takamlo ainame kamín gela RUUTUM noluke Shédíke amig kangkolo inam tabungde kampo-tadpo ayaryé.

²⁹“Noluke aabomla yékam bompenam ami kídíem, RUUTUM noluke Shédíbí nyokyinmoyé. Idola edílo nolu bulum monpakla, buluke asi-amongem dunga bomyédí,

³⁰delokke noluke kerang lok bulum nyokyin moyédí, delo nolu, ‘Kapekísa si ami kídí si buluke uyuem kumsudune, ngolukom dekepe imílope aiyéne,’ emla buluke ségu kídíem íítagomapeka.

³¹Buluke ségu-siape RUUTUM noluke Shédíme kumsumapeka. Kapeila buluke uyu kídíem kumsukolo RUUTUM ke belumrupe kaanam agér-anam eke bulu ibosudung. Bulu agíke ome-uemte buluke uyukídí legape emelo ipakpe romsudung.

³²“Ngokke lulígnam takam sim nolu igelangka. So abídyang laalíkmapeka, delokke laapakpete mapeka.”