Read Alladian POBENG BINAM 13 Bible Online

POBENG BINAM 13 - Alladian bible

POBENG BINAM 13

¹“Kaalu-kangorna mirikone demangkom immang gomroem pobinakone, irisinyo agérko demangkom kaarí-kaanyonam atoko ikan bipe emla

²nolum poala, noluke kénkímanam uyuem kumla agér ibidope emla nolum ponom-poala, delokke buluke dekepe pébisunam kídíde arope idagakom,

³dekena ami lokke agom-aangem aro tatmapeka. Noluke aapí-aanglok nolu arope RUUTUM me ayadudí, emla RUUTUM noluke Shédíbí noluke aapí-aangem delok ami delok nolum ikang kídung.

⁴RUUTUM kíng gímín gela bím yidgelangka. Bík agom-aangem tatla bík lulígem bomgaplangka. Bíkkíng arorupe míngkesula bím kumsulangka.

⁵Idola noluke abílpe dungako Ijipt amonglok nolum ipítkuna noluke RUUTUM ke mirupe idope nolum poyilgona, dekena kaalu-kangorna miriem demangkom immang gomroem pogona amiem nolu mokalangka. Dekena amide atímane delokke de amide nolum RUUTUM ke turnam bedang poyilko yénamlok yépat sudokupe emla rukupgoone. Sikena atímana atolok nolu ibínsupe dekena amiem mokarupe aiyé.

⁶“Nolu lang noluke buku kídíe kumkímanam uyuem kumsudope noluke aralo, bírokone demangkom noluke mííbosunam mime demangkom noluke ue demangkom ome demangkom ngojung rekkide nolum lunom-ponomla idagakom,

⁷buluke aralo akone noluke dei-degolo duuna ami kídíke uyuem demangkom mootengoolo duuna kídíke uyuem, nolume kumsudope erlík dokom,

⁸bíkke agomem tatmapeka, delokke bíkke lunom-ponomla erlíkko delo aang olíkmapeka. Bíme ayala mesammapeka. Bíme lupí-popí bila igulmapeka.

⁹Bíme mokalangka. Bíme kerayalumpe elíng gelíkna amipe nolu ilangka, delokrongem abíd emte gemolangka.

¹⁰Dekepe bíme elíng lok gekalangka. Kapeila noluke abílpe yétuako Ijipt amonglok nolum ipitkuna, RUUTUM noluke Shédíke kerang lok bí nolum yatlenkupe ito.

¹¹Dekepe imílo, Israel ami tabunge tatyinla bulu pesoyé, delokke dekena atímana agérem sékote imayé.

¹²“Edílo RUUTUM noluke Shédíke nolum binam doolung kídílo nolu duuyédí,

¹³delo noluke kumkí hényimanam uyu kídílo, noluke opín-buang aralok loorímana ayokone agíke doolung ami kídíem imem bola kummem bodupe nolu tatyéme,

¹⁴dekena agom-aangem nolu aipakpe jikkí-rokpakla íímík golangka. Dekedem arope gaglík yémílo,

¹⁵doolung delokke ami kídíem, buluke simon-sili taro kídíem petyinla doolung deme kaimadope inyok langka.

¹⁶Delo duutuana doolung ami kídí delokke ekuserang kídí takamem gíídalo gedum sugeyéla, RUUTUM noluke Shédíke keralo aman binam kísape gedum sunam takam demla doolung dem apíírupe emelo romlík langka. Doolung deme ato-siro atí kaimadope mílírupe imola edílote doolungrupe imokumapeka.

¹⁷Noluke agísu legape rompakpenam ekurang atí mesiisu mapeka. Depe imílo RUUTUM ke yagorupe marnamde nyoklangkula, noluke teyolo ayang yéku. Noluke buku kídílo kapekísa pébisutodí, dekepe noluke teyolo bí ayala, nolum milu-mibamdope parmoyé.

¹⁸Dekepe igang legade, ngokke nolum siloke ngiitom binam sime nolu igapgela bíkke aapí míínampe noluke yébosukolok iyé.”