Read Alladian POBENG BINAM 15 Bible Online

POBENG BINAM 15 - Alladian bible

POBENG BINAM 15

¹“Dítak kíníd yéyindí moodí miyonglo nolukíng ajéng kana tabungdem nolu mesam bipe aido.

²Nolu sikepe ibosulangka: Israel mipil-miyongpe agísu Israel arasulo narnamem mesam bosupe aiyé. Bí agíke Israel bírme-bíro arasulo narnamem dorkupe aido emla matayimapeka, kapeila narnam atoem mesamdíku RUUTUM ke dítagem gogying lenkabong.

³Nolu mibo-miying amiem dormo laadoku, idola noluke agí bírosuke narnamem mesam langka.

⁴Idola RUUTUM noluke Shédíke nolum yébomdope ruubinam among delo bí miremrupe utepooroem ruubiyé. Iname, noluke aralo opan amie kape aimang.

⁵Ngokke siloke nolum lulígnam sim aipe igapgela RUUTUM noluke Shédíme nolu aipakpe tatgap yémílo,

⁶RUUTUM noluke Shédíbí agíke pésunampe nolum utepooro ruubila nolu mibo-miying opín-buang takam lokke narkepe iyé, idola nolu agísue séko kíngkom narna amipe imayé. Nolu deddína mibo-miying opín-bualo ruutumpe yéboyé, idola sékote noluk teyolo ruutum tummayé.

⁷“RUUTUM noluke Shédíke nolum binam among delokke doolung kolo, opan amiko, noluke bíro kídar aralo kayémílo, dekena opan amike teyolo noluke aapíe tolmapeka, demangkom noluke alage laktum mapeka.

⁸Delok ayanpe noluke alage taayabila, bíkke aapí míínam takamlo bíme igul langka.

⁹Nolu narnamem mesamdíku dítage píídak emla bíkke teyolo igulmape imapeka. Dekena mikit-sorit deemana aapí-aangem gebosumapeka. Bím nolu igulmape ikolok edílo bí nolum buulí bomla, RUUTUM ke keralo kabbisuyédí, delo nolu paab ajéng kayé.

¹⁰Nolu mikit-sorit aapí atí gemape asampe igul langka. Depe imílo, noluke alage ugangko agér takamlo RUUTUM noluke Shédíbí noluke teyolo utepooroem ruubiyé.

¹¹Israel aralo opan amide kabuuyé. Depeila nolu, agí bíro kídí teyonglo angun-abépe noluke aapí-aangem, opan ami keelang kaabo-tadbona ami teyonglo geyar bilangka.

¹²“Noluke Hibru aralokke milodokom demangkom mimedokom, noluke aralo kolíktung emmílo, kolíkdo delokke ila takkéko agér ibirongem, dítak kínídnana delo nolu bím asampe gímo langkuka.

¹³Edílo nolu bím melen yékudí, delo alag araape gímo kumapeka.

¹⁴RUUTUM noluke Shédíke noluk teyonglo utepooro ruubinam aralokke, noluke mér sobén lok, noluke ali-ayélok delokke noluke asi-aponglok edítko ilayédí deddíko bimín gelangkuka.

¹⁵RUUTUM noluke Shédíbí noluke abílpe iyako Ijipt amonglok nolum ipítkunamem nolu míípa bosulangka. Sok legang pemin ngo nolum silo sim lulíg-kídar sim bidune.

¹⁶“Idola nolumla noluke edung-erangem, noluke abílde airupe mííla, ayabosula, ‘Nolum ngo gínyo kumayé,’ emla edílo manyédí,

¹⁷delo noluke ekum lokke eyab delo abíldem gíbola, bík nyorungem íkul langka. Depe irodem abílde yénam takam legape noluke abílpe iyaryé. Dekepe noluke abíl mime legang pete ibosulangka.

¹⁸Edílo noluke abíl kídíem melen yékudí, delo nolu aang omapeka. Kapeila bíkke dítak akké kokai nolum agér ibinamde, noluke are bila ami tomnam delokke agér iduem pemílo dem pakyana idu annyi kísane. Delok teyolo, noluke ato-siro iko takam delo RUUTUM noluke Shédíbí nolum utepooroem ruubiyé.

¹⁹“RUUTUM noluke Shédíke legape noluke gooru lokke lang mér sobén kídí lokke oge yalumnam milokong kooem, mengu sulangka. Ogeyalumnam ruboem agér imomapeka. Ogeyalumnam mérem amíd ngímapeka.

²⁰RUUTUM ke rungu sulennam moolop delo, dítak mipíke nolulang noluke edung-erang kídíe dekedem, RUUTUM ke keralo dobo-tííbo sulangka.

²¹Taro kídí aradelo mima-hokape ila lebya-lakbyala, mikma-nyuéla demangkom abíd-abíd atímana tarí-tape gela inako kayémílo, deme noluke RUUTUM ke keralo aman ipakpe ilíkmapeka.

²²Dekena taroem nolu agí ekumlo dolado. Nolu kapekísa sisuk emla sidumem dodudí, deke kísape dormo ayonlo deene lang deemane dolado.

²³Idola nolu iyyiem domapeka. Asiem amonglo purpaknam kísa deme purpak langka.”