Read Alladian POBENG BINAM 16 Bible Online

POBENG BINAM 16 - Alladian bible

POBENG BINAM 16

¹“Nolu Abib poololo Gíbong adeng-apeem ibosula RUUTUM noluke Shédíme yidgelangka. Kapeila so Abib poolo sokke yoh kolo bí nolum Ijipt amonglok ipítlentoku.

²RUUTUM ke agí amíne duupeko legape tonam moolop delo, nolu gooru mangkom mérko RUUTUM keepe pabosula Gíbong adeng-apeeme dobo sulangka.

³Delo nolu siiyé likyél sunam burla ettíng goonem domapeka. Longe kíníd kope siiyé likyél sumanam, ankí-keno adírem míípa sumonana ankí ettíngem dolangka. Kapeila nolu Ijipt amongem lomla gílentoku, iname deme noluke yénam tabunglo dekepe Ijipt lok gílen kunamem mííyar genadope iyaryé.

⁴Longe kíníd kope noluke ato-siro, asi-among tabunglo siiyé kape aimang. Noluke kerang longeke adenglo sobo panam taro adíne roh kon loope kape aimang.

⁵“RUUTUM ke agíke amíne duupeko moolop tonam kékon lokke,

⁶RUUTUM ke nolum doolungpe duudope biko kídí akon loote nolu Gíbong adeng-ape soboem pala dobo sumapeka. Noluke Ijiptlok gílen kunamem ashéng-angam rínggedoem, nolu doonyi uang adeng moodílo Gíbong adeng-ape soboem pabosula iperung aido.

⁷RUUTUM ke tonam moolop delo dekedem keela dobo sulangka. Depe irongem, roh danem noluke agí tombu sulo aalangkuka.

⁸Longké kokai siiyé líkmanam ettíngem dobosulangka. Longe kínídnana longe delo nolu agér-anam atí imape RUUTUM me kumsukolo gídum sulangka.

⁹“Noluke ali-aamem gatlen lokke sanlangala hopta kíníd ko sanrongem,

¹⁰nolu, RUUTUM noluke Shédíke utepooro ruulíknam ségu-siape, agí mínggosu amanlok RUUTUM noluke Shédí kíng bomala Gaddí-idí domanem dobosulangka.

¹¹RUUTUM noluke Shédíke agí amínem duumopeko moolop tonam delo, nolulang, noluke ome-oo kídíe, noluke pakne-pakbo kídíe, noluke doolung lokke Lebi kídíe, mibo-miying kídíe, ane-abu kaimana ome-oo kídíe lang noluke aralo duuna mime meyéng kídíe lekope, RUUTUM noluke Shédíke keralo dobo-tííbo sula ashéng-angam ibosulangka.

¹²Nolu iyon kídí sim aipakpe igapla Ijipt amonglo nolu abílpe yétuai emla míípasulangka.

¹³“Noluke ali-ayéme isi-sasirongem, noluke onggur ríkséng kídíem kaasi-tadsirongem, Ippo pola doman adeng-apeem ibosulangka.

¹⁴So doman so, nolulang noluke ome-oo kídíe, noluke pakne-pakbo kídíe, noluke doolunglo duuna Lebi kídíelang mibo-miying kídíe delokke ane-abu kaimana ome-oo kídíe lang mime meyéng kídíe lekope ashé bosula dobo-tííbo sulangka.

¹⁵RUUTUM ke ruulen sunam moolop delo, longe kíníd kope RUUTUM ke keralo doman dem ibosulangka. Kapeila RUUTUM noluke Shédíbí noluke ali-ango isi-sasingko takam lolang noluke alag ugangko takamlo, noluke ashéng-angamem apíírudope bíkke ute pooroem noluke téyolo ruulík biyé.

¹⁶“Dítak aralokke: Gíbong adeng-ape, Gaddí-idí doman delokke Ippo adeng-apelo nolu lengumkope, RUUTUM noluke Shédíke toko moolop delo gídum sulangka. Sékote RUUTUM ke keralo alag araape aape aimang.

¹⁷RUUTUM noluke Shédíke noluke teyolo utepooro rungkampe mipile aman bomalangka.

¹⁸“RUUTUM noluke Shédíke, nolum doolung binam tabunglo, opín-buang miyongpe miro ami emlang abíd ruutum kídíem yébo-dakbo dope ullen bosulangka. Bulu kelíng-kebang agérem jonnampe ibope aido.

¹⁹Bulu kelíng-kebangem lungu-lura sumape, pénsam raadalok deepít bilangka. Agíem reko sumapeka. Kapeila reko sunamde kénna-paanake amigem migma mola deena amike agom-aangem germodung.

²⁰RUUTUM noluke Shédíke asi-among binam delo, yénam tabung loope yéyar bomdope agínpe jonna delokke deenam bedang lok gíbo sulangka.

²¹“RUUTUM noluke Shédíkeepe, noluke runggu píko anín delo Asherah uyu mime mimang gaangem díílík mapeka.

²²Delokke kumsunam elíng gaang emte díímapeka. Kapeila dekedem RUUTUM noluke Shédí bí kangkidung.”