Read Alladian POBENG BINAM 17 Bible Online

POBENG BINAM 17 - Alladian bible

POBENG BINAM 17

¹“RUUTUM noluke Shédí keelo tarí-tapa gena demangkom bíírík-hamgo mana gooruem demangkom mérem sobope palík mapeka. Dekede bík keralo belumname.

²“RUUTUM noluke Shédíke, nolum doolung binam takam aralokke akon kolo, RUUTUM noluke Shédíke daapongem ipéésula delokke ngokke lulíg-polígem ipatsula,

³mimekone demangkom milokongkone abíd uyu kídíem demangkom doonyiem demangkom pooloem demangkom taleng telokke takar kídíem kumsudung,

⁴emnam agom sim nolu tatla irongem, deme nolu aipakpe gingkí poolangka. Delo arope dekepe Israel aralo belumrunam agérem idupe gagpayémílo,

⁵dekepe atímape ina mime demangkom milokong dem, noluke doolung lokke etor luuyablo lenbola elínglok gepet langka.

⁶Midum annyi demangkom midum angum lokke hakii binam agom-aanglok ami akonem mokalado. Idokom midum atelke hakii agomlok mokamapeka.

⁷Hakii bina kídí delokke alage kerayalumpe dekena amiem geka kolo gelen gelangka, depe irongem tabungke alage píílíkpe aido. Sikena atímanem, nolu ikutbosupe aido.

⁸“Lekonem nolu keelo, noluke lula bosumanam, asi-among arem-tadok piyyang legange, paka-níkkanam legange, atímape amíl-amo píímín sunam legange aanamko kamílo delo, RUUTUM noluke Shédíke toko moolop delo gílangka.

⁹Nolu delo gíla miripe ina Lebi kídí emlang dekena longelo, kebang ruutumpe ibonadem kaarík-tadríksula ingkí-lupo langka. Delo bulu nolum kebangem lubiyé.

¹⁰Buluke kebang lukam pakpe nolu igekupe aido.

¹¹Bulu ingkona ayonem nolum luyil yédí, delok nolu ingu-irasumape, ami kaarík agom-aang loope buluke ponam pakpe ilangka.

¹²Séko amiedí, kebang ruutum emlang RUUTUM noluke Shédíme agér ibina Lebi kídíke teyolo míílum-haglumla buluke kebang agomem tadmayédí, dekena amiem mokalangka. Sikena atímangem Israel aralok nolu ikutpe aiyé.

¹³Depe imílo ami takame legangdem tatyinla pesoyé delokke dekena séguem igemayé.

¹⁴“Edílo RUUTUM noluke Shédíke nolum asi-among binam dem nolu dunga bomla yébom aayédí, delo nolu, ‘Amike opín-buang abíd kísa ngolukom rojako ngolum kaabomdope emla ilenlaju,’ emla pobosuyépe.

¹⁵Dekeko kayémílo noluke rojape tolíknam amide, RUUTUM noluke Shédíke ullennam amikope ipe aido. Bí noluke agí amisu arasulok ipe aido. Noluke teyolo mibo-miyingem rojape imomapeka.

¹⁶Rojade agíke maglíng legape sanam yimanam guréem bompe aimang. Bí ami kídíem guré redope Ijipt amonglo lulígpe aimang. Kapeila RUUTUM bí, ‘Nolu belo gílat sukumapeka,’ emla potung.

¹⁷Rojade yagope mime bommapeka. Depe bommílo bík aapí-aangde RUUTUM ke keralog mooteyéku. Bí yagorupete uun emla baldínem bomkum supe aimang.

¹⁸Edílo bí roja palenglo dungayédí, delo bí Lebi miri kídílok ayon kitabem laala tídbumnam kitab kolo sim ayon kídí sim atgela bompe aido.

¹⁹Bí sim kitab sim bík anínlo agínpe mepe aido, delokke kitab dem agínpe poripe aido. Depe iyarmílo, kitab sok bí riyilsula so atnam tabung sim bí igela RUUTUM ke teyolo bí airupe míítesula yéyé.

²⁰Depe yémílo, bí agísuem, Israel bíro kídí gooralo gai-gako yalumna amipe míngkím sumayé, delokke ayon kékonlo angu-arape bí yémayé. Depe yékolok bíla bík otíng-oyine sanam yimanam siirum loope Israelem roja dobola yéyaryé.”