Read Alladian POBENG BINAM 19 Bible Online

POBENG BINAM 19 - Alladian bible

POBENG BINAM 19

¹“Edílo RUUTUM noluke Shédíke, nolum asi-among binam delo duuna ami kídíem nyokmola delokke edílo nolu bulum monbínla, buluke doolung kídí delokke buluke ekum kídílo dunga bomyédí,

²delo, RUUTUM noluke Shédíke asi-among binam raadalo doolung luune angumko, noluke asi-among delo dunga rongem luungu lenlangka.

³Delo bedu-bedang molíkla, asi-amongdem moolop angum kope jokpan sulangka. Luune angumde moolop angum delokke raadalo duuyinpe aido. Depe imílo, amikonem mokana kone delo duknyok anggela duusi sulayé.

⁴“Ami mokanake luune delo duknyok anggela agíem ipítsunam lokke ayone si: edílo amikone agíke kumrí-donggong konem, kerape miru-hogong atí ibosumape imemlok amikonem mokayédí, delo bí doolung luune angum arang delokke akonkolo duknyok anggela agíem duupí sulado.

⁵Gommot lengkan nanape: ami annyikone esing natape emla monamlo gíbosudoem, edílo esing tadungem, akon delokke egíngde elyuk lenla akon delo gedasula bíme gepetto emmílo, gepetna amide doolung luune angum delokke akon kolo duknyok anggela agíem dukpí sulado.

⁶Dekena doolungde luune atelkope ituamílo, de mooteng aloola dugpí suna amide duggeramyé delokke sina ami delokke ali-atode pííla marlílok, bím moka gímangakom bík teyolo edorayan sulang kukom iyépe. Idola de amide sikana ami bím míngííla miru-hogope ila imatuai.

⁷Dekepe inamko kapelo emla doolung luune angumko luungu lendope ngo nolum lulígdune.

⁸“RUUTUM noluke Shédíbí noluke buku kídílo, noluke asi-amongke rísuem goopar mola, bíkke pébisunampe asi-among tabungem nolum edílo bisuyédí,

⁹delo nolu doolung lune angum konko ilen langkuka. Kapeila nolu ngokke luyil- poyilem tadgapla, lulígnam tabungem igela, RUUTUM noluke Shédíme ayasula, bíkke míngkampe yémílo, sim asi-among sim nolum bí bisuyé.

¹⁰Nolu dekepe ilen langkuka. Depe imílo siidum dengepe yésuna amilokke iyyiem noluke among delo ilíkmayé delokke nolu iyyi líínam ajéng kamayé.

¹¹“Idola amikone aropakpe ami akonem kangkila rubomdola mokageyéla dekena doolung luune akonlo duknyok anggeyémílo,

¹²bíkke doolung delokke miro kídíe bíme doolung luune delok tomlangkula edo rayan sukupena ali-atod amilo bím petyan sudokupe melík langkuka.

¹³Bíme ayang yasam mapeka. Nolukíng ai-kampoe kadope sikena siidum dengepe yésunem éésékré iyyi líínamem, Israel aralok ikut langka.

¹⁴“RUUTUM noluke Shédíke nolum binam asi-among delo, nolu aku pekai duuyasuna, noluke kumrí-donggongke asi-among rísuem ine-siola ibosumapeka.

¹⁵“Atírumana isi-iyo agér iko delo, kaana-tatna midum atelke agom-aang delok dekepe inadem lujét kanmang. Dekeme midum annyi demangkom midum angumke agom-aanglok tolík bosulangka.

¹⁶Ami akone ami akonem atímangko míngket bomdola menam agomlok bíme kebang lujét bomkamílo,

¹⁷delo midum annyide RUUTUM ke tonam moolop delo gíla, bínyike piyyadem delo kebang ruutumpe inake keralolang miri kídíke keralo bomang bosulangka.

¹⁸Kebang ruutumde legangdem aipakpe kaamíkpala, amide menam agomlok agí Israel amisukonem lujét bomdung emla gagyémílo

¹⁹dekepe luna amidem, lubomnam delokke adír paapenamem paamope aido. Sikepe noluke aralo atímangem ibínlangka.

²⁰Delo abíd ami kídíe legangem tatyinla pesoyé, delokke Israel aralo sikena atímangem sékote ina kamayé.

²¹Ayang yasam mapeka, yénam ayanpe yénamem, amig ayanpe amigem, iipang ayanpe iipangem, alag ayanpe alagem delokke ale ayanpe aleme ibosulangka.”