Read Alladian POBENG BINAM 2 Bible Online

POBENG BINAM 2 - Alladian bible

POBENG BINAM 2

¹“Dekepe duutírodem, ngolu malat sulangkula, Silíng Siyéng bedangpe gílang kula, yépol mooruk amolo, RUUTUM ke ngome rungkampe entoku. Depeila deddína longeko, ngolu adi among Seirlo bilgola yégotoku.

²Delo RUUTUM bí ngom poto,

³‘Nolu adi amongso bilgola yéngéngkai. Iname supak línggíng danpe saalang kuka.

⁴Ami kídílo agom sim pobilangka; Nolu Seirlo duuna, noluke abu bíro, Esauke otíng-oyin kídíke yéko among lokke rísulo píídak. Bulu nolum pesoyé, idola nolu ansulangka.

⁵Bulume mimak imín sudope iyo-ita mapeka. Kapeila ngo noluke lepyo tukol koteng buluke amongem nolum bimayé. Ngo adi among Seir em Esaume bíkke kootírpe bitung.

⁶Nolu bulume, noluke apim doreme delokke asi tííreme, aballok dorpe aiyé.

⁷Noluke alag mengkíko agér tabunglo, RUUTUM noluke Shédíke nolume utepooro ruubinamem míípa sulangka. Noluke sikena míípíng-kaapíng yimanam, yépol mooruklo bí nolume kaabomto. Siddína takying appi dítak kídíso, nolu pííram-hamo atí kamape, RUUTUM noluke Shédíke yébo kolok nolu ito.’

⁸Dekepe ila Seirlo duuna Esauke otíng-oyin, ngoluke bíro kídíem, ngolu aiyope gíbooto. Ngolu Elath kelang Ejion Geber lok saana, Arabah bedangdem mepala, Moab lokke yépol mooruk bedang delok entoku.”

⁹“Delo RUUTUM bí ngome poto, ‘Moab ami kídíem ipu-iléla, mimak idope iyo-itasula imapeka. Kapeila ngo buluke asi-among alop koteng nolum bimayé. Kapeila ngo Lotke otíng-oyinem, Ar doolung luunem bito.’

¹⁰(Migo-mimat Anakim ami kísape, bodong bottela, milu mibampe ina Emim emnam migo-mimat amieke Ar delo duutuai.

¹¹Anakim ami kísape bulumte, Rephaim emlate mantuai, idola Moab ami kídíe bulum Emim emto.

¹²Horit kídíete, Seirlo duuto. Idola Esauke otíng-oyin kídíe, bulume monpakto. Israel kídíe kape kísa, RUUTUM ke bulume bitonam asi-amonglo itodí, deke kísape Esauke otíng-oyin kídíete, Horit kídíem panyok-pasokla, buluke dungkolo duuyan aabomto.)

¹³“‘Nolu Jered yiibeme gíboola gílangka,’ emla depe RUUTUM bí emkolok ngolu yiibe deme gíbooto.

¹⁴Ngoluke Kadesh Barnea lokke gílen doku delokke ila, Jered yiibeme gíboodo deloope, takying angum kolang dítak píínyiko ito. Dekepe yégodo rubuudem, RUUTUM ke buluke teyolo pésunam adupe, mimak ina siirum tabude nyokyinkai.

¹⁵Bulum tabungem siyin moma tete deloope, RUUTUM ke alage buluke teyolo tebek alooto.”

¹⁶“Edílo mimak ina kídí delokke turtíl yalumna amiete siyin berokkadí,

¹⁷delo RUUTUM bí ngom poto,

¹⁸‘Silo no Moab among lokke Ar doolung luunem gíboolangka.

¹⁹Edílo nolu Ammon ami kídílo pííyédí, delo nolu bulume ipu-iléla, mimak idope iyo-itasula imapeka. Kapeila Ammon kídíke asi-amongem alop kote nolum ngo bimayé. Kapeila deme Lotke otíng-oyinem yébom dope ngo bulume bito.’ ”

²⁰(Dem among demkom Rephaim amonge emtuai, kapeila delo bulu duutuai. Idola Ammon kídíe bulume Jamjummin emto.

²¹Bulu milu- mibampe ila, Anakim ami kísa bodong bottela, ralna ami ekíai. Idola RUUTUM bí bulum nyokyinmola, buluke dungako delo Ammon kídíem yébom-dagbomdope ruulíkto.

²²Bulum inam kísape, Horit kídíemte, RUUTUM bí nyokmola, buluke dungako delo Esauke otíng-oyinem yébom-dagbomdope ruulíkto. Depeila bulu Horit kídíem monpakla, silo loope buluke dungko kídíem duuyin bomdung.

²³Among Raadang Siyéngke robeng robengem, Gaja loope doolung luula duubomna Abbim ami kídíem Kaphtor, moopí moolop Kret lokke ami kídíe aala, bulum nyokyin mola, buluke dungko kídíem duuyin bomkai.)

²⁴“Supak gílenla Arnon kobungem koolangka. kaalangka, ngo noluke alaglo Heshbon lokke roja, Amorit ami Sihon me, delokke bíkke asi-amongem bito. Nolu bíme mimak imín sumola asi-among deme aabom langka.

²⁵Siloke longe so, ngo yirí-pedípe míínam, peso-ríanem taleng rumkíso melígla, noluke adud ayudem ami takame tatla, bulume peso-ríanlok ankígela idope imoyé.”

²⁶“Ngo yépol mooruk Kedemoth lokke roja Sihon kíng aapí eetet agomem políkdola, kotokiem melígla sipe poto,

²⁷‘Ngolume nokke amolok gímolangka. Ngolu lakbík-lakképe gíngu-gírasula imape jonnampe bene-beponglok gísuyé.

²⁸Ngoluke donam-tíínam lokke, dore-tííre kídíemte abal bila reyé. Ngolume bedang delok enmolangka.

²⁹RUUTUM ngoluke Shédíke asi-among binamlo, Jordan korongem koola pííma tetengem, Seirlo duuna Esauke otíng-oyin ami kísape delokke Arlo duuna Moab ami kísape, ngolum no lutummaika.’

³⁰Idola Heshbonke roja Sihonbí ngolum gímomato. Kapeila RUUTUM noluke Shédíbí, supakke ngoluke yébom duunam, bíkke asi-among sim ngoluke bomga legape bím ngolu mimaklo ikumla ngolum imodope, bíkke aapí-aangem tolmola míípésumoto.

³¹“Delo RUUTUM bí ngome poto, ‘Kaatola, ngo roja Sihon melang bík asi-amongem nolu kelo bilíkdung. Depeila bíkke asi-amongdem ikumla dunga bomlangka.’

³²Edílo Sihon bí, agíke maglíng takamem gílenbola Jahajlo ngolum mimak moríktodí,

³³delo RUUTUM ngoluke Shédíbí Sihonme ngoluke ale rumkílo melígla ngolu bímlang, bíkke oo kídíem delokke bíkke maglíng tabungem mokayinto.

³⁴Dekepe ido delo ngolu bulume mime-milope, ome-oope, tani turna atel koteng kaimadupe nyokkak berokmoto.

³⁵Idola doolung kídí lok simon-sili taro umnam kídíeme ngolu keepe bomtoku.

³⁶Arnon kobungke kerelo duuna Aroer lokke ila kobung delokke raadanglo duuna doolung dem hanla Gilead loope, doolung atel koteng ngoluke iramnam kamato. Dem takam dem RUUTUM ngoluke Shédí bí ngoluke alag aralo biyinto.

³⁷“Idola RUUTUM ngoluke Shédíke lulígnam tuubupe, ngolu Ammon kídíke among emla Jabbok koronglo duuna amongem delokke adilo duuna doolung kídíem atel kokom ikamla iyang bimato.”