Read Alladian POBENG BINAM 20 Bible Online

POBENG BINAM 20 - Alladian bible

POBENG BINAM 20

¹“Edílo noluke miruem mimak imínsupe emla noluke gílen yém, nolu miru lokke guré kídíem, gaari kídíem delokke nolum pemílo bojéyape maglíng kídíem kaayédí, delo nolu pesomapeka. Kapeila, nolum Ijiptlok laalenkuna RUUTUM noluke Shédíbí, nolukíng yémín geyé.

²Noluke mimak ipe emla gílen yém, mirie aala maglíng deme sikepe kebang agomem pobolangka,

³‘E Israel tatlangka, silo noluke miruem mimak momínsupe emla nolu gílendak. Noluke aapí-aange amémapeka demangkom pesomapeka. Nolu bulum reyubrupe mííla, lomge kumapeka.

⁴Kapeila RUUTUM noluke Shédíbí nolukíng gímín gela noluke miruem, noluke legape mimak momínsula, nolum ikumboyé.’

⁵“Delokrongem maglíng ruutum kídíde maglíngdem sipe polangka, ‘Ekum aníko mopala deme kumlíkmang adanako kadun? Dekepe inako kadumílo, bí ekumlo gílat sulangkuka, demamílo bí mimaklo sinamko kamílo ami akone ekum deme kumyan líkyéku.

⁶Onggur ríkséng aníko ilentula delokke ayém dodí kaimape inako kadun? Dekepe inako kadumílo bí ekumpe gílat sulangkuka, demamílo bí mimaklo sinamko kamílo ami akone deme dola-tííla ibomyéku.

⁷Mime kolo lupo-manmo ibosupala nyamran idí kaimape inako kadun? Dekepe inako kadumílo, bí ekumpe gílat sulangkuka. Demamílo bí mimaklo sinamko kamílo ami akone mime deme nyamran ibosuyéku.’

⁸Sok agom kídí teyong so maglíng ruutum kídíde sime potem langka, ‘Aapí-aange améngope ila pesona ami kadun? Dekepe inako kadumílo bí ekumlo gílat sulangkuka. Demamílo bí abíd maglíng kídíke aapí-aangemte améngmoyé.’

⁹Edílo maglíng ruutum kídíde dekepe agomem poyin yédí, delo depe poyin rongem bulu maglíng kídíem lulígbona miroem ullen bipe aido.

¹⁰“Edílo nolu doolung konem mimakpe aabom yédí, kerape delokke ami kídídem aibosudope ikípolangka.

¹¹Bulu deme toríksula etor luuyabem siyya biyémílo, bulume agér-anam iyabinape nolu ilangka.

¹²Idola bulu noluke aibosunam agomem tatmape mirolpe irík suyémílo, deme gargo bomlangka.

¹³Edílo RUUTUM noluke Shédíbí bulume noluke alag aralo melíg yédí, delo nolu buluke milokong takamem petyin langka.

¹⁴Idola doolung delokke mime kídíem, ome-oo kídíem, taro kídí takamem noluke ekurangpe bomlangka. Noluke miru kídí lok, RUUTUM noluke Shédíke nolum líínam ekurang binam kídídem nolu agí agérlo ina suladoku.

¹⁵Sikena ségu akampe, nolu keelok mootepe duuna doolung takamem nolu ibomlangka, idola noluke dei-degongke opín-buang kídíkem imapeka.

¹⁶“Idola RUUTUM noluke Shédíke nolum asi-among binam delokke doolung kídíem edílo nolu mimaklo ikumla dunga bomyédí, delo ngakína atel kokom turdope memapeka.

¹⁷Nolu sim mibo-miying ami kídí sim petyin langka. Hittit amiem, Amorit amiem, Kanaan amiem, Perijjit amiem, Hibit amiem delokke Jebusit amiem, RUUTUM noluke Shédíke nolum lulígnampe nolu ilangka.

¹⁸Depe imamílo, buluke uyu kumsu kolo, buluke belumrunam ségu-siang inam kídílo bulu nolum luyil poyilla, RUUTUM noluke Shédíke kangkolo paab kayé.

¹⁹Edílo nolu doolung konem, deddína longe loope mimak iyabomyédí, dekepe iyém nolu edílokom ayé ééna esingem egílok beepak mapeka. Kapeila nolu esing kídí lokke ayé kídíem dolayé. Esing kídíem nyogmo mapeka. Esing-éng kídíde noluke mimak imín supenam mirumang.

²⁰Idola ayé kamana esing kídídem, nolu doolung dem mimak iyanana ekurang pe beela doolungde noluke alag aralo aamatetedem inalangka.”