Read Alladian POBENG BINAM 21 Bible Online

POBENG BINAM 21 - Alladian bible

POBENG BINAM 21

¹“RUUTUM noluke Shédíke nolum yébomdope emla among binam delokke arík kolo amiko mokatuupe kaala, idola mokanadem kénlík manamko kayémílo,

²noluke abu abíng kídíe lang miro kídíe gíla simang dongko delokke ila, ayir-agolo doolung duuna kídíke mootengem sapgotoka.

³Depe simang dongko delokke anín yalumna doolung delokke miro kídíe agér imokímanam runeko ogla,

⁴ongkímana asi siirung kala, delokke delo letel koteng arík iyang kímangko yiibe among kolo, runedem gíbola bíkke alíngem dírlangka.

⁵Delo Lebike miri oo kídíete gímín gelangka. Kapeila kelíng kebang tabunglo, kebang lubidope delokke agér iko tabunglo RUUTUM ke amín lok utepooro agomem polík dopelang RUUTUM ke agér igedope, RUUTUM noluke Shédíbí bulum ulngusuto.

⁶Depe irodem simang dongko delokke anín yalumna doolung delokke miro kídíde, alíng dírtonam rune simang teyong delo buluke alagem arbín sudola bulu sipe polen langka:

⁷‘Ngoluke alage sim ami sim mokamang delokke bím mokana demte ngolu kénmang.

⁸E RUUTUM, nokke ipítkunam Israel amisuem ayala mesamlangka. Atí duug kamana sina ami sokke ajéngem nok ami kídí teyolo pyalík mapeka.’ Delo mokanam delokke edoe buluke teyolo aamayé.

⁹Sikepe nolu RUUTUM ke kangkolo, kaabape ikolok, sikena atí duug kamana sina amike ajéngem nolu ipaksuyé.

¹⁰“Edílo nolu, miru kídíem mimak mokolo gíyédí, delokke edílo RUUTUM noluke Shédíbí bulume noluke alaglo melígyédí delo noluke abílpe amiem umyém,

¹¹noluke umnam arang delo kampona mimumem kaala, dekeme nolu kaaboyém, noluke agí mínggosupe, agí agíke mimepe bomlado.

¹²Mimedem ekumlo aabo langkula, dumídem ngíla, leyin-lakyinem pobínla,

¹³mimedem umdo delokke ege galugem gemokumape ilangka. Mime delokke edung-erang ankíem mimede kíla pooloko irongem mime dem no méngpe bomlado.

¹⁴Méélamem mimedem no mííyi mayémílo, bíkke agí mínggosupe no bíme gímo langkuka. Bím no komapeka, kapeila no bík teyolo ipu-ilé tobong.

¹⁵“Amikone mime annyiko bomla, bí mime kondem apekyape ayala igong aradelo, annyi pakde uem obila, obinam delokke opo yalumnam oo de bíkke míímayanam mime delokkepe iyémílo,

¹⁶edílo amide bíkke ekuserang kídíem oo kídílo orpan suyédí delo bí, ogeyalumnam oo lokke paapenam atoem bíkke ayang yapeknam mime delokke oolo panlíkla imapeka.

¹⁷Míímayanam mime delokke oope ituakom, dem oodem ogeyalumnam oope kangkénpe aiyé, delokke bíme ato-siro emkom paabosunam lokke adu annyiem orlík langka. Kapeila abuke yaamé siisang lokke de oo de opong yalumname. Depeila ogeyalumnam oo lokke paapenam atode bíkke.

¹⁸“Amikone deddípe iríd-iket laateng, ane-abu agom-aang tatmana ooko kala delokke de oo de miké alope ila mirolpe itíyémílo,

¹⁹bíkke ane-abude, bíkke doolung dungko delokke kebang lupom luuyab delo miro kídí keralo bíme gagla aabolangka.

²⁰Delo miro kídíke keralo bínyi polangka, ‘Ngonyike oo si miképe ila mirolpe idung. Bí ngonyike agom-aang atí tatbimang. Bí tíngír dobatsula, tong-aryape abalem pitpak bodung.’

²¹Delo doolung delokke ami kídíde bíme elíng lok gepetpe aido. Sikena atímangem, noluke aralok ikutsupe aido. Sok legangem Israel daadi tabunge tayyinla pesoyé.

²²“Amikonem, reyubrupe atímana agér ikolok paksulla bík simangem esinglo bímo yémílo,

²³delo esing delo yoh rubungem bík amíldem daktí momapeka. Longe lotel pakdelo bíme yulangka. Kapeila paksul rongem, simangem esinglo bítímomílo, Shédíke bééname aadung. Nolu sikepe ila, nolume RUUTUM noluke Shédíke asi-among binamem deema momapeka.”