Read Alladian POBENG BINAM 22 Bible Online

POBENG BINAM 22 - Alladian bible

POBENG BINAM 22

¹“Edílo nolu, agí ami Israel sulokke gooruko demangkom mérko gínyok goola yégodupe kaayédí, dekeme asoope kaamape umsila atosu delo gonga bilangkuka.

²Taro delokke atode anín lokke mape ila mootelo duuna komílo demangkom atodem kénlík mayémílo, deme agí ekumlo rínlangkula, ato delokke matasuala idoloope paksing bilangka. Bík pííyém tarodem melen bilangkuka.

³Sike akampe noluke Israel bíro kídí arasulo gadoko demamílo ege-galugko demamílo ingkona ekurang dokom, menyok sunamem kaape-kaamape kaasi-tadsi bilangka.

⁴“Edílo nolu, agí ami Israel sulokke gadoe, demangkom gooruko bedu-bedanglo oletdupe kaayédí, deme gerepla gíladokupe nolu igul langka. Dekepe inem kaapak mapeka.

⁵“Noluke aralo mime, milokong ege-galugem gemapeka, delokke milokonge, mime ege-galugem gemapeka. RUUTUM noluke Shédí bí dekepe ina amiem belumdung.

⁶“Bedu-bedanglo noluke gídungem, amonglo demamílo esinglo pettang asupkolo, koo kídí demangkom apí kídí teyolo anedem gubbomdupe kaayém, anedem laabín mapeka.

⁷Nolu pettang koo kídídem laalado, idola anedem ummape yopmo langka. Depe imílo noluke yéname deddína longem yéla ai-kampope yéyé.

⁸“Edílo nolu ekum aníko moyédí, delo ekum míílong dem bilgola etorko míílong teyong delo ilík langka. Depe imílo míílong delok oka sukunako kadakkom nolu keelo delokke daie aamayé.

⁹“Noluke onggur esing ríksénglo, angu angupe ina siipí-siiyé annyiem lepe sumapeka. Depe imílo, letonam ali-ayé akonde lang onggur ayéde deeyimayé.

¹⁰“Gadoem lang gooruem jungoli atello ilíkpala aal gímapeka.

¹¹“Siipyak lokke egemlang amíd egem lekope gebosumapeka.

¹²Noluke ege genam lokke kéényung appilo nomé omlík langka.”

¹³“Amikone mimeko laala, ketbo-doobo surongem bím mííyimape ila,

¹⁴pyoongumla, mimedem atímana amín mínlíkla, ‘Sim mime sim ngo méngpe ila, bím ketbo-doobo surongem bím mimum arope ngo gaglíkmang,’ emla poyémílo,

¹⁵mime delokke ane-abude, mime delokke deenampe yénamem lengkan dope doolung lokke luuyablo, miro kídí keralo mimedem aabope aido.

¹⁶Mime delokke abude miro kídídem pope aido, ‘Ngo agí ome sim so ami so mimepe bito. Idola bí bím míímang.

¹⁷Bí míímangko teyong delo ome sim pyoongumla, mimepe bomrong emte, bí deemang delokke mimum aromang emla atímangem poketdung, idola ngok ome lokke deenamem sina ngo lengkandune,’ emla mime delokke nyamran yumeke iyyi kana ketpu egeme, mime erangde, doolung miro kídíke keralo lengkan bipe aido.

¹⁸Delo miro kídíde milo deme dempala,

¹⁹baldín nokdi língkoko ajéngpe ila, mime delokke abudem bipe aido. Kapeila, de amide Israelke ome konem aimana amínko ipang líkto. Sikepe iko teyong lote mimede bíkke méngpe idan teteyé, delokke bíkke turdu tetengem bím mepak langkumayé.

²⁰“Idola mimede arope deemadung delokke pyoongum agomde arokai emla kaapayémílo

²¹mimedem, bíkke ane-abu ekum lamgé delo aabola, delo doolung delokke miro kídíe bíme elíng lok gekape aido. Kapeila mimede, agíke ane-abu keralo duudu laate abír-ayo agér ila, Israel aralo annyingnam agérem ito. Sikepe noluke aralo atímangem ikut bosulangka.

²²“Amikone amikonke mimem ketbo-doobo sudope gagyémílo, immín gena ami demlang mimedem simope aiyé. Sikena atímangem Israel aralok ikut bosulangka.

²³“Amikone, doolung kolo gíla, akonke tonam mimum konem ibbo-doobo suyémílo,

²⁴nolu bínyim doolung lokke luuyablo gíbola, doolung aralo duudolate ulo gogmanam legape mime koo dem delokke akonke mimepe ipenem ipusiléé binam legape milokong dem elíng lok sidope gepet langka. Sikepe noluke aralo atímangem ikut bosulangka.

²⁵Idola amikone doolung siko bedu-bedanglo akonke tonam mimum konem yééla atímape iyémílo, yééna milokong petomde sipe aido.

²⁶Mime koo demdan atí imapeka, kapeila bí sidope atímana agér imang. Si legang si, agíke kumrí-donggongem aabomla pakanam kísadung.

²⁷Kapeila doolung siko bedu-bedang lomin mimedem milokong de yéétone. Dekepe yéédodem mimede ulo gogtuakom, sékote tatna kamala bím igulna kamang.

²⁸“Amikone akonke tomanam mime konem kaaríksula yééla irongem bínyim gagyémílo,

²⁹milokongde, mime delokke abudem baldín nokdi íying pilngoko ajéngpe dorpe aiyé, delokke mimedem bí ipusiléénam legape bí méngpe bomperung aiyé. Bíkke turdu tetengem mimedem mepak langkumayé.

³⁰“Sékote agíke abu lokke abíd méng kídarlo ketbo-doobosula, agí abuem ipusiléésupe aimang.”