Read Alladian POBENG BINAM 23 Bible Online

POBENG BINAM 23 - Alladian bible

POBENG BINAM 23

¹“Milokong aralo sékoke íttume loorímadí demangkom milokong ole em gattung sutudí, de RUUTUM ke banggo aralo yémín gepemane.

²“Doompe onam amide demangkom dekenalok okunam ome-oo dem siirum íying loope, RUUTUM ke banggo aralo yémope aimang.

³Siirum íying loope Ammon ami emlang Moab amiem RUUTUM ke banggo aralo yémín gemope aimang.

⁴Kapeila edílo nolu Ijipt amolok gílen langkula gídokuem, bulu nolume donam-tíínam atílok irík-saarík sumato. Deke ayanpe bulu Mesopotamia amolokke Péthor doolungke Beorke oo Balaam me tomla nolum béédope tomto.

⁵Idola RUUTUM noluke Shédí bí Balaam me tadbimape, béénam dem utepooro agompe polat motoku. Kapeila RUUTUM noluke Shédí nolum ayadung.

⁶Noluke turdu tetengem bulukíng ai-kampo lekobosuem demangkom aapí eetet agér-anamem ibosumapeka.

⁷Nolu Edom amiem kaapak mapeka. Kapeila bulu noluke ali-atodpe idung. Nolu Ijipt amiem kaapak mapeka, kapeila nolu buluke amonglo mibo-miyipe yégooto.

⁸Siirum angum méélamlo, buluke otíng-oyin kídíem nolu, RUUTUM ke banggo aralo yébo sumolado.

⁹“Edílo nolu midu-mimak notkoem iyédí, delo dormo ayonlok atel koteng deemamona ato kamope aimang.

¹⁰Noluke aralo yoem magdang daanako kayémílo, bí notko luyulo gíla delo dungusupe aido.

¹¹Idola edílo adeyédí delo bí agíem írsula doonyi uarongem notkolo aaladoku.

¹²Nolu esi-regum ipekoko notko lokke luyulo ilangka.

¹³Arung koonana bomla esi-regum iyém arung koopala esi-regumem irongem deme ikap langkuka.

¹⁴Kapeila noluke miru kídíem noluk alag aralo rulíkdope, delokke nolum mopítdope RUUTUM noluke Shédíbí noluke notko delo gígoodung. Depeila, bí deemang-amo atí kaapala gínyok kumadope, noluke notkodem deenampe mepe aido.

¹⁵“Abíl amiko nolukíng dugang geyémílo deme ami delokke ruutumlo umla melíg kumapeka.

¹⁶Dekena amiem noluke aralo duumolangka. Bí ingkona doolunglo duupe mííyédí, delo bím iréémape duumolangka.

¹⁷“Israel aralokke mime dokom milokong dokom kumkeng ekum lokke notiipe imapeka.

¹⁸RUUTUM noluke Shédíke ekumlo mime dokom milokong dokom notiipe ila arepe paanam amanem agíe pésunampe bomala bimapeka, kapeila RUUTUM noluke Shédíbí kumkeng ekum notiipe inam emlang dekena amanem belumdung.

¹⁹“Nolu abal legí-leganglo demangkom donam-tíínam legí-leganglo demangkom ato-siro abíd ekurang legí-leganglo noluke bíroem biko teyolo untaem lutem mapeka.

²⁰Nolu mibo-miying teyolo unta em lutem lado, idola agíke Israel bírolo depe imapeka. Kapeila depe imílo RUUTUM noluke Shédí bí noluke amongem yébomkupeko delo noluk aadusim ingkona asi-amolo noluke alage ugayédí delo bí nolum utepooroem rubiyé.

²¹“RUUTUM noluke Shédíkíng edílo nolu pésula agomko togesuyédí, dem dorkupe adolmapeka. Kapeila, RUUTUM noluke Shédíbí arorupe noluke togesunam akorpe bí koyé. Delo nolu moodílo dorla mayémílo, nolu kíng paab kayé.

²²Nolu pésumape inam delo atí imem kamang.

²³Noluke agí nabbél lok togesunam dem ipíng bosurupe aiyé. Kapeila nolu, agíke nappang sulok agí mínggosupe RUUTUM noluke Shédíke keralo togesuto.

²⁴“Edílo nolu kumrí-donggong akonke onggur ríksénglo gígoyédí, delo nolu agí míínampe onggur kídíem pílla dolado, idola nolu bomkelo pílla bomku mapeka.

²⁵Edílo, nolu kumrí-donggong lokke ali-ayé aríklo gígoyédí delo nolu alag lok laalanamem laalado idola ali-aam dagnem kassiklok gatma peka.”