Read Alladian POBENG BINAM 24 Bible Online

POBENG BINAM 24 - Alladian bible

POBENG BINAM 24

¹“Edílo amikone mimeko bomla irongem, bí mime teyong delo annyingnam ségueke kaapala, mime dem mepak kakot em bila, bík ekum delok melen yékudí,

²delo ekum delok gílen rongkuem milo konko kalangkula idoloote

³bíkke milokon deteng bíme mííyimape mepak kakot em bila, ekumlok gímo yékudí demangkom bím bomrongkuem milo konde sinamko kakamílo,

⁴mimedem mepakkuna kerang milode bím lekoda bomlang kumayé. Legade, mimede deeyimangkai. Bí mime dem bomlat suyékumílo de RUUTUM ke kangkolo belumname. RUUTUM noluke Shédíke binam among delo sikena belumnam paab agérem ibosumapeka.

⁵“Atí-agope mime laanem midu-mimaklo demangkom abíd agér-anamlo lulígmapeka. Dítak kope bí asarpe agí ekumlo duusula agíke méngem ashéng mope aido.

⁶“Edílo nolu amikonem narnampe biyédí delo nolu narnam delokke untape elíng kiiparem ami delok laayan mapeka. Dekepe inamde edung-erang delokke turkengem langkut bidung.

⁷“Séko amiedí agíke Israel amikonem umla abílpe imola demangkom angu amilo koyédí, dekenem mokalangka. Sikena atímangem noluke aralo ikut bosulangka.

⁸“Edílo nolu tííd kinam geyédí, delo Lebi miri kídíke pokam pakpe igelangka. Bulum ngokke luyil líknampe nolu igap langka.

⁹Noluke Ijiptlok gílen dokuem, RUUTUM noluke Shédíke Miriam me inamem nolu míípa sulangka.

¹⁰“Edílo noluke repe-sinying konem atíko nolu bisu pooyédí, delok ayanpe bipésunamem laape emla nolu ami delokke ekumlo gímapeka.

¹¹No luyulo dagyatoka. Nokkíng laapona amidem bomlen sumo langkula bisumotoka.

¹²Amide opan dumílo bipé supoonam dem nolu yoh atel koteng bomsék mapeka.

¹³Bíkke egedem doonyi uamang adape bilat sulangkuka. Depe imílo bí ipgenane kayé, delokke bí noluke teyolo airupe mííla noluke dekena aina agérde RUUTUM noluke Shédíke kangkolo deena agérpe iyé.

¹⁴“Nolu agí doolung kídí aralok agér idope tomnam ami arééna emlang kaabonem yadmapeka. Dekena amide agí Israel amisupe idakkom demangkom mibo-miying kope idakkom, yadmapeka.

¹⁵Loodí kídpe, doonyi uamang adape bíkke paapenam aduem bilangka. Kapeila bí arééla deke delok iresula yéne. Dekepe nolu imayémílo edílo bí RUUTUM ke keralo kapgu rogusuyédí, delo nolu paab kayé.

¹⁶“Ane-abuke imem legape ome-uem simomapeka delokke ome-ooke legape ane-abuem simomapeka. Takam amiem bíkke agíke paab imemsunam legape sisumoyé.

¹⁷“Mibo-miying legapelang ane-abu kaimana ome-oo legape deepít kebangem baabimape imapeka. Demangkom mime meyéngke narnam adu untape bíkke ege-galugem laala mepomapeka.

¹⁸Nolu Ijipt belo abílpe ituai delokke RUUTUM noluke Shédíbí nolume belok mopít kunamem míípa sulangka. Sike legang pemin ngo nolume sike sim igelangka emla lulígdune.

¹⁹“Edílo nolu ali-ayéme isi-sasi yédí, delo nolu kaasumape gatkumla menam amkék jongaknamem jongkupe gílat sukumapeka. Dekeme nolu aré-anyona ane-abu kaimana ome-oo keepe lang mime meyéng keepe, delokke mibo-miying legape mebilangka. Dekepe imílo, noluke alag kídíke ugangko takamlo RUUTUM noluke Shédí bí utepooroem ruubiyé.

²⁰Edílo nolu olib ayéme pílyédí, pílruklo gílat sulangkula pílngadem pílkumapeka. Dekeme nolu aré-anyona ane-abu kaimana ome-oo keepe lang mime meyéng keepe delokke mibo-miying legape mebilangka.

²¹Edílo nolu noluke onggur ríksélo onggur ayém gatgooyédí, delo gatruk ane delo lennyinape gatta-gara kumapeka. Gatngong kídídem, aré-anyona ane-abu kaimana ome-oo keepe lang mime meyéng keepe delokke mibo-miying legape mebilangka.

²²Ijiptlo noluke abílpe yénamem edílokom mitpan sumapeka. Sike legang pemin ngo nolume sike sim igelangka emla lulígdune.”