Read Alladian POBENG BINAM 25 Bible Online

POBENG BINAM 25 - Alladian bible

POBENG BINAM 25

¹“Edílo ami kídíe piyyang atíko kayédí, delo bulu kebang ekumlo legangdem bomala, kebang miro kídíe, ainem aipe delokke imemem ajéng ila, kebang baabilangka.

²Imemna dem dembang kamílo, kebang ruutumde dem amidem ketmo geyéla, edít kodí demdope kebange lulígyédí, deddíko kebang keralo demmo langka.

³Idola bíme demrum íying appi ngatdope demmapeka. Deme bojéyape demboomílo kebang keralo bíme ipusiléé kunampe iyé.

⁴“Ali-ayé yikdungem, gooru nappangem ikapmapeka.

⁵“Bíro kumsu kídíke pumsupe duubo sudungem, akonde oo kamape sinamko kayémílo, bíkke mime meyéngde, abíd bíro kídíke kékon amilo nyamran ikumapeka. Sikana delokke bírode mimedem méngpe bomla, yigoke agér ipenam idongem ipííbipe aido.

⁶Israel aralokke opín-odong amínlo sina ami delokke amíne nyokmadope, mime delokke kerang ogekunam oo de sina bíro delokke amínem yégeyé.

⁷Idola edílo amikone, agí bíro sina lokke méngdem nyamran ilíng kumape iyémílo, mime de kebang ipomlo gíla miro kídíem sipe emlangka, ‘Ngokke sikana milo lokke bíro si bíkke igepenam idongem ilíímang. Bí ngok teyolo yigoke kaapenam agérem kaamape, Israelke opín-odong amínlo bíkke sikana bíro amínem nyokmope idung.’

⁸Dekepe posurongem, doolung miro kídíde amidem tomla lupo-manmoem ikí pootoka. Delote bí, mimedem, ‘Bommayé,’ emla podan teteyémílo,

⁹sikana bíro lokke mimede takam amike kangkolo, ami delo gíla, bíkke korom leyug konem laala, bík mikmo delo takil sukkat dola pope aido, ‘Agíke bíro lokke opín-odongem bomgap lamana amiem sikepe moko idune.’

¹⁰Delokke dem erang dem Israel aralo, korom leyug pítpaknam erange emla kényinyé.

¹¹“Ami annyikone momín sudungeme, ami akonke mimede, milodem igulpe iyala idungem akonke milokong oleme jumyémílo,

¹²mimedem ayang mape bíkke alagdem papak langka.

¹³“Noluke nyogon delo tebeknako lang essana doga-palla annyiko kapum supe aimang.

¹⁴Noluke ekum kídílo bortaknako lang aména doga-palla annyiko kapumsupe aimang.

¹⁵RUUTUM noluke Shédíke nolum asi-among binam delo yénam abungem yéyardope nolu jonna delokke yadmana doga-pallem bomla sapbo sulangka

¹⁶Kapeila sike agérlo bíírík-hamgomape ila, amiem yadnem RUUTUM noluke Shédíbí belumdung.

¹⁷“Noluke Ijipt among lok gílen langkula endokuem, noluke teyolo Amalek kídíe kape itodí, deme míípa sulangka.

¹⁸Bulu Shédíme pesomape, noluke adung-apéérunge ila endungkuem, bulu noluke méélam danlok mimakpe aabomla, pííram mínna kídíem paka kayinto.

¹⁹Depeila edílo RUUTUM noluke Shédíbí, noluke yége-dagge bompenam asi-amongem nolum bila, rego mipílokke miru kídí alag keralok nolum eetetmola iyédí delo, sékote míípang yimadope, Amalek kídíem petkut-pellut langka. Sime nolu mitpan sumapeka.”