Read Alladian POBENG BINAM 26 Bible Online

POBENG BINAM 26 - Alladian bible

POBENG BINAM 26

¹“Edílo RUUTUM noluke Shédíbí, nolume yége-dagge bompenam asi-amongem biyédí delokke edílo nolu delo aabomla dunga bomyédí,

²delo RUUTUM noluke Shédíke nolum asi-among binam delo noluke kédénglo ilíknam ali-ayé lokke min-genaem ayoko bayé kolo mesing geyéla, RUUTUM noluke Shédíke amíne duulíkdope bíkke toko moolop delo dekedem bomla aadola,

³delo miripe inadem mipile sipe emlangka, ‘Ngoluke buku kídílo RUUTUM ke biyé emla togesuko asi-amonglo ngo dungang kai. Delok legape RUUTUM ngokke Shédíke keralo, silo ngo pokan suadung.’

⁴Depe emrodem miride nolu keelok bayé kídíem laala, RUUTUM noluke Shédíke runggu kerang delo mekumpe aido.

⁵Bíkke merodem, nolu mipile RUUTUM noluke Shédíke keralo sikepe pokansupe aido. ‘Ngok abue, magong gígona Arameankuai. Bí ami asoko gíbola Ijipt amongpe tokto. Belo tokla duudungem, de bottena, miga-miramna opín kope ila mití-maglíng kope ikai.

⁶Idola Ijipt ami kídíe ngolum itung-iréla, ankí-kenomola agérlo ikang along sumoto.

⁷Delo RUUTUM ngoluke buku kídíke Shédí kíng, ngolu kapgusula RUUTUM bí, ngoluke roguem tatla, ngoluke ankí-keno, adírem delokke ngolum itung-irénamem kaato.

⁸Depeila RUUTUM bí alage yamtarla, agí lakbíng lokke ralnamlok, botteruna irisinyo iyodlok, míngkén manam agérlok delokke reyubruuna pesoríannam ségulok ngolum Ijipt amolok laalentoku.

⁹Delokke bí ngolum gíbo langkula, ngullange lang gakíre bingko among sim ngolum bila so among so aaboto.

¹⁰Depeila E RUUTUM, nokke ngome bisunam among sokke kédénglok isanam kerayalumpe ali-ayé minla igenem sina ngo boma bidune.’ Dekepe pokan surongem, bayé kídídem RUUTUM ke keralo melíg geyéla gubala bím kumsupe aido.

¹¹Dekepe irongem, nolula, noluke ekum-erang kídíe delokke Lebi kídíe lang mibo-miying duumín gena kídíe, RUUTUM noluke Shédíke noluke teyolo aina agérem ibinam legape bím yidgela ashéng-angam ibosulangka.

¹²“Toodí tagum miyong lokke íying sanpek bidí dítak delo noluke isi-sasinam ato-siro tabungke íying sanpegem mekumrongem, nolu Lebi kídí emlang mibo-miying kídíem delokke ane-abu kaimana arééna ome-oo kídí emlang mime meyéng kídíem bilangka. Noluke doolung kídí delo bulu dola-tííla aapí-aange apíídope nolu ilangka.

¹³Depe bulum irodem RUUTUM noluke Shédí kíng nolu sipe pokan langka, ‘Ngokke ekumlok, deena íying sanpek amanem laayin lenla, Lebi kídílo, mibo-miying kídílo, ane-abu kaimana ome-oo kídílo lang mime meyéng kídílo orla ngok teyolo nokke lulígnampe ngo biyin goto. Ngo nokke luyilem mitpan sumape atel kokom ipéésula imang.

¹⁴E RUUTUM, ngok teyolo nokke lulígnam tabungem, ngo igela, sim deena aman kídar sim simang teyolo bimato. Ngokke deemang-aamope yédungem, sike sokke akon emkom laabínla ingu-irala imato. Delokke ngokke ankí-kenola yédoemte deena aman kídí sokke atel kokom donam kamato.

¹⁵Nokke deena dungko, teyong among telok, nokke Israel ami kídí emlang ngoluke buku kídílo nokke togesula, ngolum binam, ngullange lang gakíre bingko among sim kaatok sudola, nokke utepooroem ruubi dakyika.’

¹⁶“Siloke longe so, RUUTUM noluke Shédí bí, sim ayon kídí simlang idong kídí sim ansugela, takamem aipakpe noluke aapí-aang takamlok lang noluke aid takamlok igap gelangka emla lulígdung.

¹⁷Silo nolu bíkke agomem tatla, bíkke ayon kídí emlang idong kídíem delokke bíkke lulígnam tabungem bomgapla bíkke ségupe gímín gela, RUUTUM bí noluke Shédíe emla man-gekai.

¹⁸Delokke nolumkom bíkke lulíg tabungem bomgapdope, bíkke pébisunam tuubupe, bíkke gairupe míísula mesiisunam, agíke amisupe, siloke longe so RUUTUM bí toríksukai.

¹⁹Sikepe iko kékon loteng, bíkke pílennam opín-buang ami takamke teyolo, nolum amín kanarung ami pelang yidge rínggerupenam opín kope imoyé. Delokke bíkke pésunam agompe, RUUTUM noluke Shédíke agísuke deena amipe nolu iyé.”