Read Alladian POBENG BINAM 27 Bible Online

POBENG BINAM 27 - Alladian bible

POBENG BINAM 27

¹Delo Israel miro kídílo lekope Mosi bí ami kídíem poto, “Siloke ngokke luyilnam tabung sim aipakpe bomgaplangka.

²Edílo RUUTUM noluke Shédíke nolum asi-among binam delo, Jordan korongem koola nolu pííyédí, delo nolu líítam bottena lok ayoko díítoka. Delo dekedem plastar mollíkla,

³sim luyil kídí simlang, ayon kídísim dekedelo atlík langka. RUUTUM noluke buku kídíke Shédíke noluke teyolo togesunampe edílo nolu ngullange lang gakíre bingko among delo,

⁴Jordan korongem koola, pííyédí, delo ngokke siloke nolum pokampe líítam kídídem plastar molkapla Ebal díítumlo dííyin golangka.

⁵Delo arem ekurang atílok ikílíkmanam rungguko, elíng kootírlok pílangka.

⁶RUUTUM noluke Shédíke legape runggu píyéme nolu gatmanam elínglok píla delokke delo, RUUTUM noluke Shédíkíng romnam amanlok ilík langka.

⁷Delo RUUTUM noluke Shédíke keralo ashéng aman sobo pala nolu ashéng bosu langka.

⁸Noluke dínggonam líítam kídídelo Shédíke ayon kídí sokke akor kídíem kaabedope atyin líklangka.”

⁹Depe porodem Lebi miri kídílo lekope Mosi bí ami kídíem poto, “E Israel kídí, asoope tatgap langka. Supak lokke ila RUUTUM noluke Shédíke amipe nolu ikai.

¹⁰Depeila ngokke nolum siloke binam ayon kídísimla idong kídísim igelangka.”

¹¹Delo longe delo ami kídíem Mosi bí poto,

¹²“Noluke Jordanem koorongem, edílo utepooro agomem ami kídílo polígyédí, delo si opín kídísi Gerijim díítumlo dagpe aido: Simeon, Lebi, Judah, Issakhar, delokke Joseph lang Benjamin.

¹³Edílo béénam agomem ami kídílo polígyédí, delo si opín kídísi Ebal díítumlo dagpe aido: Reuben, Gad, Asher, Jebulun delokke Dan lang Naphtali.

¹⁴Lebi kídíe bottepe érla sim agom kídar sim Israel ami kídílo pokan bilangka:

¹⁵“ ‘Séko amie arem lok demangkom elíng lok demangkom esing lok mimang pípala deme rusila kumsududí, dekena ami delo Shédíke bééname kadung. Mimang kumnem RUUTUM bí belumdung.’ Delo ami takame ‘Amen’ emla elígyé.

¹⁶“ ‘Séko amie agíke ane-abu agom-aangem tatmadí, dekena ami delo Shédíke bééname kadung.’ Delo ami takame ‘Amen’ emla elígyé.

¹⁷“ ‘Séko amie kumrí-donggong lokke rísu iyodem ine-siyoyédí, dekena ami delo Shédíke bééname kadung.’ Delo ami takame ‘Amen’ emla elígyé.

¹⁸“ ‘Séko amie migmanem aimang kolo gíboyédí, dekena ami delo Shédíke bééname kadung.’ Delo ami takame ‘Amen’ emla elígyé.

¹⁹“ ‘Séko amie mime meyéngem, ane-abu kaimana ome-uem delokke mibo-miyingem jonna kebangpe deepít bimayédí, dekena ami delo Shédíke bééname kadung.’ Delo ami takame ‘Amen’ emla elígyé.

²⁰“ ‘Séko amie agíke abu mime konlo ibbosula agíke abueme ipusiléédudí, dekena ami delo Shédíke bééname kadung.’ Delo ami takame ‘Amen’ emla elígyé.

²¹“ ‘Séko amie tarolo deemang-amo ibosuyédí, dekena ami delo Shédíke bééname kadung.’ Delo ami takame ‘Amen’ emla elígyé.

²²“ ‘Séko amie agíke ane lokke omepe ina demangkom abu lokke omepe ina, agíke bírme agísuem lang bírmepe inem ibbosuyédí, dekena ami delo Shédíke bééname kadung.’ Delo ami takame ‘Amen’ emla elígyé.

²³“ ‘Séko amie agíke ayo anelo ibbosuyédí, dekena ami delo Shédíke bééname kadung.’ Delo ami takame ‘Amen’ emla elígyé.

²⁴“ ‘Séko amie agíke kumrí- donggongem rula mokasuyédí, dekena ami delo Shédíke bééname kadung.’ Delo ami takame ‘Amen’ emla elígyé.

²⁵“ ‘Séko amie siidum dengepe duusuna konem mokadope reko suyédí, dekena ami delo Shédíke bééname kadung.’ Delo ami takame ‘Amen’ emla elígyé.

²⁶“ ‘Séko amie Shédíke luyilnam takam emlang ayon kídíem igemayédí, dekena ami delo Shédíke bééname kadung.’ Delo ami takame ‘Amen’ emla elígyé.”