Read Alladian POBENG BINAM 28 Bible Online

POBENG BINAM 28 - Alladian bible

POBENG BINAM 28

¹“RUUTUM noluke Shédíke agom-aangem nolu apíírupe tatbila, ngokke siloke, bíkke ngiitomem luyil binam takam sim ansula, míngkesula, arorupe igap geyémílo, RUUTUM noluke Shédíbí, tani among sokke opín-buang daadike teyolo nolume opín kope singon moyé.

²RUUTUM noluke Shédíme nolu aipe tatbiyémílo si utepooro kídar si noluke teyolo kala nolukíng gímín geyé:

³“Doolunglo nolukíng utepooroe kayé, delokke arík-anamlo nolukíng utepooroe kayé.

⁴“Noluke akiike ome-oolo, noluke asi-amongke ali-ayélo delokke noluke taro kídílo delokke taro kídí lok ome-oolo utepooroe kayé.

⁵“Noluke aapé-suja kídí lolang kiipar kídílo utepooroe kayé.

⁶“Noluke aayékuemte utepooroe kayé, delokke noluke gílenyémte utepooroe kayé.

⁷“Noluke mirupe gerepnemte, nolu ikumdope RUUTUM bí nolum imoyé. Bulu bedang atellok nolum aabomyé, idokom noluke keralok, bulu bedang kínídlok dugnyok geyéku.

⁸“RUUTUM bí noluke kumsung kídílo, delokke noluke alag ugangko takamlo utepooroem ruulíkyé. RUUTUM noluke Shédíbí, ingkona asi-amongem nolum bisutudí, delo bí nolum utepooroem ruubiyé.

⁹“RUUTUM noluke Shédíke bedanglok nolu gíla bíkke lulígem nolu bomgap yémílo, bí noluke keralo kapekísa pésutodí dekepe nolume bíkke agísuke deena amipe imoyé.

¹⁰Delo tani amongke opín-buang takame, RUUTUM ke amínlok nolume mínnamem kaala-tatla nolume pesoyé.

¹¹Noluke buku kídílo, nolume bisuyé emla RUUTUMke togesunam asi-among delo, noluke akiike ome-uem, noluke asi-among ke ali-ayém delokke taro lokke ome-uem bojérupe jémola parmoyé.

¹²RUUTUM bí agíke alum-asamana teyong among kumsungem siyya sula, moodí moodílo noluke asi-amonglo pedongem melígla, noluke alag uganam agér-anam takamlo utepooroem ruubiyé. Nolu deddína mibo-miying opín-buanglok narkosuyé, idola nolu narmayé.

¹³RUUTUM bí nolum dumpoope imoyé, delokke tamépe imomayé. Nolu ngokke siloke binam RUUTUM noluke Shédíke lulígem aiyope tatgapla, ansula dekedem igap geyémílo, nolu agínpe teyongpe iyarla rumkíngpe imayé.

¹⁴Ngokke siloke lulígnam arasok nolu angukon uyu kídíem ipak ila, leképe demangkom lebíkpe gípatsula atel koteng ipéésula imapeka.”

¹⁵“Idola ngokke siloke nolum binam, RUUTUM noluke Shédíke lulígnam tabungem lang idong kídíem nolu aiyope bomgapmape bíkke agom-aangem tatmayémílo, si béénam kídar si nolukíng aala nolum ijét bomyé:

¹⁶“Doolunglo nolukíng bééname kayé, delokke arík-anamlo nolukíng bééname kayé.

¹⁷“Noluke aapé-suja kídí lolang kiipar kídílo bééname kayé.

¹⁸“Noluke akiike ome-oolo, noluke asi-amongke ali-ayélo, noluke taro lolang taro kídílok ome-oolo bééname kayé.

¹⁹“Noluke aayékuemte bééname kayé, delokke noluke gílenyémte bééname kayé.

²⁰“Nolu atímape ila RUUTUM me mepak yémílo, nolum menang asak nyokmola siyinmoma tetengem RUUTUM bí noluke alag ugangko takamlo béénamem, akén geyimanam adírem delokke aklíngla lunamem melígyé.

²¹Noluke yébomdope emla gíangko asi-among delok, nolum nyokmoma tetengem RUUTUM bí nolu kelo kilii-ramlilok melígla idír-isola ibomyé.

²²Noluke nyokma tete loope RUUTUM bí nolukíng tabum kinam emlang kisangem, marla bíínam kinam emlang reyubrupe pamkinamem, dírí-keno emlang guna asarem delokke tííd kinamem melíkla iyarlíkye.

²³Noluke tukku teyongke talengdem pitol kísa delokke noluke ale rumkíngke kédéng dem arem kísa tolmoyé.

²⁴Noluke asi-among delo RUUTUM bí pedongem sulli pelang deemulpe batmoyé. Dekede, noluke nyokyinmang tetedem taleng telok otí tokyé.

²⁵“Noluke miru kídílo RUUTUM bí nolum ikumkosu dope imoyé. Nolu bedang atellok bulum aabomyé, idokom buluke kerang lok nolu, bedang kíníd lok duknyok geyéku. Tani among sokke yéta takam lokke pesoríanpe kaangkenam opínkope nolu iyé.

²⁶Noluke simang kídíde asar lokke pettang kídí kelang among sokke monkír kídíke dotképe iyé, delokke bulume sékote monpak pena kamayé.

²⁷Nolume ipíílayimanam aagna taríem, karagem, amíl aralo bíínem delokke Ijipt lokke tasut em nolukíng melígla ibomyé.

²⁸RUUTUM bí nolume tummola, mikma mola, aapí-aangem molmola imoyé.

²⁹Dekepe imo kolok, mikmane kamolo kapekísa memta godudí deke kísape nolu longe raadang emte memtagooyé. Noluke ato-siro inam takamlo nolu iramyé. Loodí kítpe nolume ipusilééyé delokke rotkut bomyé. Sékote nolum ipítna kamayé.

³⁰“Nolu mime konem nyamran ipe emla lupo-manmo sula meruuyém akone deme bomkamla ibomyé. Nolu ekumem moyé idola nolu delo duubom lamayé. Nolu onggur ríkséngem ilenyé, idola delokke ayém nolu dodímín kamayé.

³¹Noluke kangko paklo, noluke gooruem payé, idola adínem nolum domo mayé. Noluke gadoem, nolu kelok ésékré rotbínyé, idola nolum bikumayé. Noluke mér kídíem noluke mirulo biyé, delokke sékote bulu kelok dekedem rotlang kumayé.

³²Noluke ome-oo kídíem angukon opín kídílo abílpe biyé, delokke nolu yumdí-rodípe bulume kaata-tatíla noluke amige kibomsuyé; noluk alaglo dem itumdope ralnam kamayé.

³³Noluke agér-anam ikolok noluke amonge ingkoem garbiyédí, dekedem noluke kénkímanam mibo-miyinge dolat-tíílat bomyé. Sike sokke teyolo nolum ipusiléé adírnam kékonlo abídyang kamayé,

³⁴dekepeila, noluke kaanam ato-siroe nolum tummoyé.

³⁵Noluke ale kídí lolang lebíng kídílo, delok teyolo noluke ledulok ilenla noluke dumpo loope ipíílayimanam kinarung tasudem RUUTUM bí ilíkyé.

³⁶“RUUTUM bí nolumla noluke agí teyolo ruutumpe imonam, noluke rojeme, noluke buku kídí kelang noluke kénkímanam amilo monpakyé. Deke delo esing loklang elínglok monam angukon uyuem nolu kumsuyé.

³⁷RUUTUMke nolum monpak líkko ami opín kídí keralo, nolu amike lué-lulé la ikepe, delokke pesoríanpe kaangkela inam atope iyé.

³⁸Nolu deddína ali-aamem aríklo ilíkyé, idola anyongoko isiyé, kapeila pemíre alumem doyinyé.

³⁹Nolu onggur ríkséngem iyé, idola nolu grébem dopamayé delokke onggur alangem tíípamayé, kapeila dekedem tapume doyin bomyé.

⁴⁰Noluke among takamlo olib esinge kayinyé, idola delokke télem nolu paamayé, kapeila olib kídídem rukyinmoyé.

⁴¹Nolu ome-oo kayé idola, bulum nolu duubo-dagbosudí kamayé, kapeila bulum abílpe miruem umnyokmoyé.

⁴²Noluke asi-among delokke neyi-neyang kídí emlang ali-aam kídíem pemír mírbame doyin bomyé.

⁴³Noluke aralo mibo-miying yéna kídíe nolum pemílo kedonpe siisa yayangai ila delokke nolu rumkípe otok yayangai iyé.

⁴⁴Bulukíng nolu naryé idola nolukíng bulu narmayé. Bulu dumpoope iyé delokke nolu tamépe iyé.

⁴⁵“Si béénam kídí takam si nolukíng aayé. Dekede nolum monbomla píímín gela, nolu nyokma tetengem iyarbomyé. Kapeila RUUTUM noluke Shédíke agom-aangem nolu tatbimape, bíkke lulíg kídí tabung emla idong kídíem igemato.

⁴⁶Dekepe nolukepe lang noluke otíng-oyin kídí legape agínpe iyarna irisinyo iyodpe iyé.

⁴⁷Noluke jéla-remla ashéngdí longelo, RUUTUM noluke Shédíme nolu ashéngla agér ibimato.

⁴⁸Dekepe inam legape, RUUTUM ke noluke mirupe melígnam amilo nolu, keno-tíílídola amíl araapelang aré-anyorupe yédola agér gérbiyé. Noluke sima yaryar loope, noluke mirude, noluke alínglo arem jungoliem ilíkyé.

⁴⁹RUUTUM bí tani amongke duurílok, noluke kénkí-tatkímanam agom pona mibo amiem noluke mirupe, pemí lokke deetok bomnam kísape noluke teyolo langaayé.

⁵⁰De ami kídarde mijing-ejo emla koo-kíangem kaangu sumape, mikírla ayang kamana amipe iyé.

⁵¹Noluke nyokyinma tetengem bulu noluke ali-ayémla noluke simon-sili kídíem dotíbila, bulu noluke siipí-siiyém, asi-apongem, tél tulangem, delokke taro kídí emla mér sobénem atel kokom mebimape dokutbiyé.

⁵²Noluke míída subomnam yapgo kídíem bényinma tetengem, noluke among lokke rego mipíke doolung kídíem mimakpe itíbomyé. RUUTUM noluke Shédíke nolum asi-among binam sokke, noluke doolung takamem bulu mimakpe aatíbomyé.

⁵³“Noluke miru kídí delokke nolume mimak ibomdung delo, nolume yagorupe ankí-keno mola, RUUTUM noluke Shédíke ruubinam agíke ome-ooke adínemte nolu dobosuyé.

⁵⁴Noluke aralo dengeruna delokke ami aroyalumna ami deteng agíke turna ome-oo kídílo delokke agíke mííbosunam mimelo lang agí bírolo ayang bosue kaimayé.

⁵⁵Bí agíke ome-ooke amíl adínem dosunamemte bulume bisumayé, kapeila bíkkíng abídyang kaimape ila dekena petome kayé. Noluke doolung kídíem mimakpe noluke miru kídíke ití bomkolok ankí-kenoe ila dekepe nolu ibosuyé.

⁵⁶Noluke doolung kídílo, noluke miru kídíke mimak itíbom kolok agíke ledulok among emte tutet kímana dengeruna delokke miro rupe yéna noluke ami aro remelna mimete agíke mííbosunam miloem delokke ome-uemlang,

⁵⁷dekena teyong delo agíke akiilok olenpak tonam ngangemte, akii keno kootírlok, bulume ami kaama-tatmangem dosisupe emla mííyé.

⁵⁸“Nolu kitap so atlíknam ayon kídíke agom kídíem ansu sugapla igemayémílo delokke RUUTUM noluke Shédíke reyubruna delokke angun-abéruuna amínem gairupe mííte subom mayémílo

⁵⁹RUUTUM bí, nolukíla noluke otíng-oyin kídílo, duuyar mínna, pesonam kilii-ramliem delokke atírumana, géyikumana tarí-tapeem lang reyubrunam adír kídíem melígyé.

⁶⁰Noluke pesolok dan-genam Ijipt lokke kilii-ramliem bí melígla dekede nolukíng gyapmín geyé.

⁶¹Noluke nyokyinma tetengem, ayon kitap so atlíkmanam atí atína kilii-ramli delokke tarí-tape kinamem nolukíng RUUTUM bí melígyé.

⁶²RUUTUM noluke Shédíke agom-aangem nolu tadmanam legape, nolu taleng telokke takar kísa milu-mibamtuakom nolume ami bosérudo kupe imoyéku.

⁶³Kapekísa RUUTUM bí agí míínampe nolume jémola milu-mibam modudí dekepakpe bíkke agí míínampe nolume nyokmo langkula kaimape imoyéku. Noluke dungape emla aabompeko among elok nolume puunyok yéku.

⁶⁴“Tani among sokke kéényungkon lokke ila kéényungkon loope opín-buang daadi takamke aralo RUUTUM bí nolume piyyin gooyé. Dekedelo nolulang noluke buku kídíke kénkí-pangkímanam esing lokla elínglok pínam angukon uyu kídíem nolu kumsugola dekedem agér-anam ibiyé.

⁶⁵Dekena ami kídí aralo nolu agíke ledu kídíemte mekeng kamape ila aapí eetet kamayé. Delo RUUTUM bí noluke aapí-aangem kape itopei emla míítímola, akén-ayén yimape imola, kaanana amigemte ereemoyé.

⁶⁶Noluke yénamem kape iyédí emla míítíla, longe yohpe pesoríane ibula lomtíyé.

⁶⁷Noluke amige ingkuemdí kaayéne, delokke noluke aapí-aange ingkuemdí reyubrupe mííbomyéne, delokke legape nolu rueme ‘Yume tuapename,’ delokke yumeme, ‘Roh tuapename,’ emla mantíyé.

⁶⁸Nolu Ijipt amonglo enkurupe aimang emla ngo bedanglo potuakom nolume RUUTUM bí jaji etkulok belo melígyéku. Belo, nolu mime milope, noluke miru keralo agíem abílpe kosudokukom sékote nolum rena kamayé.”