Read Alladian POBENG BINAM 29 Bible Online

POBENG BINAM 29 - Alladian bible

POBENG BINAM 29

¹Si Israel kídílo daapong ibosudope emla Moab amonglo RUUTUM ke Mosime ayon lulígnam kídare. Sikesi Horeb díítelo daapong ibosunam teyolo itemkuname.

²Mosi bí Israel tabungem gogdumsula bulum poto, “Nolu Ijipt amonglo, Pharaoh ke teyololang bíkke migom kídílo delokke bíkke asi-amonglo RUUTUM ke inam tabungem kaayinto.

³Noluke agí amig sulok botterupe ikannamem, irisinyo iyodem delokke botterupe míírí-míínyonam agér kídí inamem kaayinsuto.

⁴Idola siloke longe soope, nolume RUUTUM bí tatkénnana nyorungem, kangkénnana amigem delokke míngkénnana aapí-aangem bimangada.

⁵Ngokke nolume takying appi sime yépol mooruk amonglo gígo bodungem, noluke ege galuge bétna kamato, delokke leyugete ínna kamato.

⁶Nolu séruk ettíngem domato delokke apong emla abíd tíínam kídíemte tíímato. RUUTUM noluke Shédíbí emla nolum kénmodope dekepe nolum imoto.

⁷Ngoluke so among so píídoem Heshbon lokke Sihon roja lang Bashan lokke Og roja bínyi, ngolume mimakpe iríkla ilateng ngolu bulum ikumto.

⁸Ngolu buluke amongem laala deme Reuben kídí emla Gad kídíem delokke Manassehke opín arotkonem orlíkto.

⁹Noluke ato-siro agér-anam iko tabunglo ai-kamporudope, nolu daapong sokke ayon kídíem ansula bomgaplangka.

¹⁰“Silo Israel lokke abíd ami kídíelang noluke miro kídíe delokke noluke gaam kídíe lang abíd ruutum kídí nolu tabunge, RUUTUM noluke Shédíke keralo dagadung.

¹¹Delokke teyolo nolukíng lekope noluke méng ome-oo kídí takame lang nolum asi joobila, esingem ita-hatala ibina noluke notkolo duumín gena mibo-miying kídíete dagmín gedung.

¹²RUUTUM noluke Shédíkíng nolu daapong ibosula, daapong delokke ayonem toríksula idope silo nolu aadumsudung.

¹³Noluke buku kídí: Abraham, Isaak, delokke Jakobke keralo togesula delokke noluke keralo pésunam adupe siloke longe so nolume agí amisupe lang noluke Shédípe idope RUUTUM bí daapong em ibosula bíkke pésunamem siilpe tuplíkla mekai.

¹⁴Nolu petom kíng sim daapong simla sokke ayon kídar sim ngo ibosumang.

¹⁵RUUTUM noluke Shédíke keralo dagana siloke ami kídí ngoluke kékon looteng, yékupena ngoluke olen kupenam otíng-oyin looteng sime ibosudung.

¹⁶“Ngolu kapekísa Ijiptlo yétuadí delokke kapekísa deddína among kídíem gíboola so píítodi, dekedem nolu agíe kénsudung.

¹⁷Nolu buluke aralo belumrunam, elíng lokke, esing lokke delokke baldín lokke lang uun lokke mimangem kaato.

¹⁸RUUTUM ngoluke Shédíke keraloge aapí-aange angu langkula dekena ami kídíke uyu kídílo mamín gela, bulum kumsugola igong kupena amie siloke dumsuna goorasok, opín-buangko demangkom pínmík-raamíkko demangkom milokongko demangkom mimeko kape aimang. Sikena kosana emoem noluke aralo garlen mopena appíre kape aimang.

¹⁹Noluke aralo sikepe amikone pésunam agom kídíem tatla delokke bíkke teyolo utepooroem kalen sumola irongem, ‘Ngokke agí míídusupe ngo yédokukom, supak lokke ngo aiyé,’ emla mííla yékunako kayémílo dekenade ereena among lolang asikana amonglo dírí-kenoem bomaboyé.

²⁰Dekena amidem RUUTUM bí edílote mesammayé. Bíkke marlíng eme dekena ami teyolo írsabomyé. So kitap so atlíknam béénam tabunge delo ami delo kalígla, bíkke amínem teyong amongke rumkíng sok ikutyé.

²¹Ayon kitabso atlíknam daapong sokke pénam takamke ayonpe dekena amidem, Israel ke opín-buang aralok RUUTUM bí tíngusuyé.

²²“Noluke asi-amonglo RUUTUM ke kilii-ramli ilíknam emlang ankí-keno adír kamonamem, mootenglok aana mibo-miying kídíe lang nolum yétítkupena, noluke ome-oo oten kídíe kaayinyé.

²³Asi-among tabungde guna salpar alo kootírpe bííyamla atíkote lelík kanmayé delokke atíkoteng garsa lamayé, depeila atí nesi-neyang kamayé. RUUTUM ke yagorupe marla nyokmonam Sodom delokke Gomorrah, delokke Admah keelang Jeboim kísape iyé.

²⁴Dekeme kaala angukon ami kídíe, ‘Sim asi-among sim RUUTUM bí kapei sikepe itone? Kapei siddípakpe agí margíkane?’ emla ííbosuyé.

²⁵“Dekepe ínggangem poyan sunanade sikepe iyé, ‘Ijipt amonglok buku kídíem laalenrongkuem, bulukíng daapong ibosunamem dem ami kídíde bomyarmang.

²⁶Buluke RUUTUM ke lutum bomnam, buluke kénkí manam uyu kídílo bulu gíla, dekedem lebíng kooníla kumsula, dekena angukon uyu kídíem ikukolok bulu dekepe ikai.

²⁷Dekepe igape, so among so RUUTUM ke aklínge yagorupe kala, so kitap so atlíknam béénam tabungem bí bomyin aato.

²⁸RUUTUM bí buluke teyolo agí margíla, dekepe yagorupe marlílok bulume agíke asi-among lok puulenla supakke yégongko angukon mibo-miying amonglo yoplíktung.’

²⁹“RUUTUM ngoluke Shédíbí ngolum kénmomape rumnyokla menam atíe ayoko kadung, idola lengkannamde ngolu keelang, ngoluke ome-oo kídí kepe agínpe bomyar pename, delokke dekedem bomyarla sok ayon sokke agom-aang kídíem igap geyarpename.”