Read Alladian POBENG BINAM 3 Bible Online

POBENG BINAM 3 - Alladian bible

POBENG BINAM 3

¹“Delok rongem ngolu Bashan amongpe línggíng bedalok ensaato. Delo Bashanke roja Og bí, agí maglíngem gíbola ngolum Edreilo mimakpe iríkto.

²RUUTUM bí ngom poto, ‘Bím pesomapeka. Kapeila bímla bík maglíng takamem delokke bíkke asi-among takamem nokke alag aralo bilíktung. Heshbonlo rojape ituana Amorit kídíke roja Sihon me kapekísa nolu itodí, dekepe bímkom ilangka.’

³“Depeila RUUTUM ngoluke Shédíbí Bashanke roja Og melang bík maglíng takamem ngoluke alag aralo melíkla, bulum ngolu midum atel koteng turmomape petyinla,

⁴bíkke doolung takamem laayinto. Ngolu bíkke doolung íying akké tabungdem laala Bashanke Og rojake yébom-dagbomnam Argob mooleme ngolu laayinto.

⁵De doolung luune kídíde, kedonna língkum etorpe torgosula, yapgo kala, arem eyabkala inekíai. Delokke kékon looteng etor eyab kamana doolung améne bojéko kato.

⁶Ngolu kape kísa Heshbon lokke roja Sihonke doolung takamem, milokongem, mimem, ome-uem nyokyin motodí, delok kísape roja Og kemte ito.

⁷Idola simon-sili, taro atí líínam takamem, ngolu agíke supe umyinla bomyintoku.

⁸“Dekepe ila, delo longe kídí delo ngolu Amorit roja annyi delok Jordan korongke sanggodan moopyang dem laala Arnon kobung lok ilangala Hermon dííte loope bomyinto.

⁹(Hermon díítem Sidon amie Sirion emdung delokke Amorit kídíe Senir emdung.)

¹⁰Ngolu díítum yiibe among lokke doolung takamem, adi among Gilead tabungem, Bashanke among tabungem lang Salekah lokke ila Bashanke roja Ogke Edrei doolung loope laayin goto.”

¹¹(Roja Og bí, Rephaim kídí lokke yétíl yalumna amie. Bík ketkede, mitar appikope adonge delokke mitar annyikope apee ila arem lok apíípe pínam kuai. Deme supakkom Ammon kídíke doolung Rabbahlo kaapayé.)

¹²“Delo longe kídí delokke asi-among laanamem, ngo adi among Gileadke arot konem ila delokke doolung kídíem itaksula, Arnon kobungke Aroer línggíng danlok irekla, dem moole kídídem Gad opín emlang Reuben opínem bito.

¹³Gileadke arotkon demla Bashan amongem, ingkolodí Og bí rojape ituane, deme ngo Manassehke opín arot konem panbito. (Bashan lokke Argob moole amongdem Rephaim kídíke amonge emla amín katuai.)

¹⁴Manasseh keelok lenna Jair bí, Geshur kídíke lang Makkah kídíke among rísulok laarekla Argob moole amongdem laala, bíkke agí amín lok mínlík sulangkula silo peteng Habboth Jair (Jairke dungko) emla mandung.

¹⁵Ngo adi among Gilead dem Manassehke otíng-oyin akon Makir erangem panlíkto.

¹⁶Idola Reuben kídí emla Gad kídíem, Gilead lok ila Arnon kobung loope panlíkla dem moole tabungdem bulum bito. Kobung delokke raadade buluke sokko rísupe ito. Buluke línggíng rísude, ayokone Ammon rísulo kana Jabbok korongde ito.

¹⁷Buluke anggo rísude Jordan korong loope iríla delokke Galil Siyéng lokke itok langkula, Pisgah yorbe rumkílo duuna Sina Siyéng loope ito.

¹⁸“Depe ido delo ngo bulum sim luyilto, ‘Sim asi-among sime nolu yébom-duubom dope RUUTUM ngoluke Shédíbí nolum bitung. Idola, noluke aralo mimak imín sulana kídíe, mimak leemo gela noluke bíro Israel kídí kerape, Jordanem konggelangka.

¹⁹Delokke noluke mime, ome-uemla simon-sili taro kídíem, (Nolu simon-silie bojéko kadung emla ngo kéndung) ngokke nolum doolung panbinam kídílo mekut supolangka.

²⁰Jordan korong anggodan elo RUUTUM noluke Shédíke asi-among dem, noluke bíro kídíe yébomla, nolume RUUTUMke ibinam kísape, bulumte ibila, buluke aapí-aange eetetma tete deloope, noluke bíro Israel kídíem nolu igul langka. Dekepe irodem, ngokke panlíknam among delo nolu aalat suladoku.’ ”

²¹“Dekepe idodelo ngo Joshuame poyilto; ‘Roja annyiem, RUUTUM noluke Shédíbí kape kísa itodí, dem no agí amiglok kaayinsuto. Noluke gípeko elokke among takam emkom, bulum inam kísa RUUTUM bí iyé.

²²Bulum pesola rogemapeka. RUUTUM noluke Shédíbí agísue nolu keepe mimagem imínsuyé.’

²³“Delo longe delo ngo RUUTUM kíng roguto:

²⁴‘E RUUTUM Shédí, nokke béérang ngom, nokke ségu botteruna emlang lakbíng ralnamem lengkan lenkai. Teyong among telo lang tani among so nokke miga-miram agér inam kísa íngko uyueda iladun?

²⁵Ngome Jordan korongem koomola rotkon elokke moone kédéng emla adi amongem delokke Lebanonem kaamoika.’

²⁶“Idola noluke legape ngokke teyolo RUUTUM bí marla, ngok agomem tatmato. Delok ayanpe bí poto, ‘De aikabong. Sok legangem ngom lekokom poyimapeka.

²⁷Pisgah ponyuk telo resaala, sanggo-anggo, línggíng- sokkope kanggong sutola, Jordan korongem no koopemanade, no agí amig sulok asi-among takamem kaayintoka.

²⁸Idola Joshuame no luyil-poyil líkla, aapí-aangem edíídope erlíkla ilík langka, kapeila sim ami kídar sim nokke supakke kaayinnam asi-among sim bí korong rotkon elo koobola, yébo-dagbola iboyé.’

²⁹Depeila ngolu Bethpeor ke anín yiibe delo duuto.”