Read Alladian POBENG BINAM 30 Bible Online

POBENG BINAM 30 - Alladian bible

POBENG BINAM 30

¹“Ngokke nolume pokan binam utepooro kídar simlang pénam kídar sim nolukíng leebidung. Edílo RUUTUM noluke Shédíbí mibo-miying opín kídí aralo nolume dunggo moyédín, delo nolu sikesim noluke aapí-aanglo gegap bosulangka.

²Delokke edílo nolulang noluke ome-ue, RUUTUM noluke Shédí kíng míílat sulangkula aalat suyékudí delo nolu, ngokke siloke nolum poyilnam kísape bíkke agom-aangem noluke aapí-aang loklang aidlok apíírupe tatbila igelangka.

³Depe ikumílo RUUTUM noluke Shédíbí noluke nyokmonam asi-amongem turmolangkula, nolum ayasulangkula, nolum monpitko rego mipílok bí laadumsuyéku.

⁴Taleng rumkíng sokke mooteyalum amonglo monpaktuakom deloge RUUTUM noluke Shédíbí nolume laadum sulangkula agíke asi amonglo langaayéku.

⁵Noluke buku-neku kídíke asi-amongpe ituanam delo, nolume bí langa langkula nolume yébom moyéku. Bí nolume buku kídíke longe yétonamem pemílo milu-mibam yamola pakyape jémoyéku.

⁶RUUTUM noluke Shédíme noluke aid takamlok, delokke aapí-aang takamlok ayangla, turla nolu yédokupe, bí noluke otíng-oyin emla nolume, bíkke agomem tatna aapí-aang kídíem ruulíkbiyé.

⁷Nolum irééla idírna, noluke miru kídílo, RUUTUM noluke Shédí bí sim béénam takam sim kalíkmoyé.

⁸Delo ngokke siloke nolum binam, noluke RUUTUM ke lulígnam tabungem nolu igelangkula bíkke agom-aangem tatyéku.

⁹Depe irongkuem RUUTUM noluke Shédíbí noluke alag ugangko agér takamlo, noluke akiike ome-oolo, noluke taro kídíke ome-oolo, delokke arík kídíke ali-ayé kídílo nolume yagorupe jémoyé.

¹⁰Noluke aapí-aang takamlok lang aid takamlok, RUUTUM noluke Shédí kíng míílat sulangkula, bíkke lulíg emlang idong kídíem bomgap langkula, so ayon kitap so atlíknam tabungem igelangkula RUUTUM noluke Shédíme nolu tatbi yékumílo, RUUTUM bí kapekísa noluke buku kídílo mííyum sutuadí, deke kísape noluke teyong loteng bí mííyum sulangkula nolume jémoyéku.

¹¹“Siloke ngokke nolum lulígnam kídí si noluke ipíng lamanam pelang mííram bosupenam agommang.

¹²Noluke aralo, ‘Ngolu tatla igedope dekedem sékodí teyong among telok laasa bila poboyékun?’ emla pobosudope sikesi teyong among telo kamang.

¹³Demangkom, ‘Ngolu tatla igedope dekedem sékodí siyéngem koola langaabola poboyékun?’ emla pobosudope sikesi siyéng kékonlo kamang.

¹⁴Nolu aipe igedope agom kídísi noluke aapí-aang delolang noluke nappang kídar delo kala noluke anín kídí delomin kadune.

¹⁵Kaatola, ngo silo noluke kerang so, yénam emla jénamem, sinam emla atímangem lengkandung.

¹⁶Kapeila ngo RUUTUM noluke Shédíke lulígem, ayonem delokke idongem nolu bomgapla bíkke bedang lok gíla, RUUTUM noluke Shédíme nolu ayasulangka emla nolum poyildung. Depe imílo noluke dungabompe emla noluke aapeko asi-among elo RUUTUM noluke Shédíbí nolume utepooroem rubila nolu turla bojérupe ato takamlo parbosuyé.

¹⁷Idola nolu agom tatmana, angukonpe aapí-aang ikuna amipe ilangkula angukon uyu kídílo sanga líklang kula bulume gubla kumsulangkula iyémílo,

¹⁸nolu arope nyokyéku emla ngo silo pobidung. Noluke Jordanem koola dungabomla yébom aapeko asi among elo nolu ool turmayé.

¹⁹Silo ngo noluke keralo sinam emlang turnamem, utepooro emla béénamem mekanbito emla nolume kaana-tatnape among- talengem popabidung. Noluke ome-ue turdope supak yénamem ullangka.

²⁰RUUTUM noluke Shédíme nolu ayasula, bíkkíng gomdasula, bíkke agom-aangem tadbilangka. Kapeila RUUTUM bí noluke yéname. Noluke buku kídí Abraham, Isaak delokke Jakobke keralo togesunam asi-among dem nolum bí bisula delo nolu deddína dítagem yéyarbomyé.”