Read Alladian POBENG BINAM 31 Bible Online

POBENG BINAM 31 - Alladian bible

POBENG BINAM 31

¹Israel ami kídílo Mosi bí agomem poyar dola poto,

²“Ngo supak dítak língko kolang takying annyiko ikai. Depeila ngo nolum gíbo layimang. Ngome RUUTUM bí, ‘No Jordanem koomapeka,’ emla lutumtung.

³RUUTUM noluke Shédíbí agísue noluke kerape konggeboyé. Bí eke elokke ami kídíem noluke kerang kerape nyokmola, buluke asi-amongem nolu dungabomyé. RUUTUM ke pokampe Joshuakom noluke kerape elo konggeyé.

⁴RUUTUM bí Amorit kídíke roja Sihon mela Ogme delokke buluke asi-amongem kapekísa nyokmotodí, delok kísape eke elokke ami kídíemkom nyokmoyé.

⁵Edílo RUUTUM bí bulume noluke alag aralo bilíkyédí, delo ngokke pokampakpe nolu bulum ilangka.

⁶Aapí-aange ralla migalangka. Bulume kaala pesola dan-gemapeka, kapeila RUUTUM noluke Shédíbí nolukíng gímín gedung. Bí nolum edílokom mepakmayé delokke yadmayé.”

⁷Delo Mosibí Joshuame Israel ami takam keralo tomala poto, “Aapí-aange rallangka, delokke miga-miramlangka. Kapeila RUUTUM bí ingkona amongem buluke buku kídílo bipe emla togesutodí, delo among delo ami kídar sim no gíabope aido, delokke asi-among deme buluke yége-dagge supenam legape bulume orpan subipe aiyé.

⁸RUUTUM bí nok kerangem agísue gígeboyé, delokke nokkíng yémín geyé. Bí nom edílokom mepakmayé delokke yadmayé. Depeila aapí-aange pesola amémapeka.”

⁹Dekepe irodem, Mosi bí ayon kídí sim atla RUUTUM ke Daapong Sondugem kaabomna Lebike miri oo kídí demla Israel kídí lokke miro kídíem bito.

¹⁰Delo bí bulume lulígto, “Edoeme mesamdíku dítak kíníd dítak delo, edílo Ippolo doman adeng-apeme dobosuyédí delo takame taddope sike sime pori bosulangka.

¹¹RUUTUM ke moolop tonam delo edílo RUUTUM noluke Shédíme Israel takame kumsukape emla aayédí, delo ami kídílo rikan bilangka.

¹²Ayon sokke ngiitom kídíem tatla RUUTUM noluke Shédíme pesola bíkke agom-aangem ai-kampope tatbila delokke mipile kényindope noluke doolung kídí lokke mime ome-oo kídí emla ami kídíem delokke noluke doolunglo duuna mibo-miying kídí takamem dumsu moyinlangka.

¹³Nolu Jordanem koola dungabompe emla ibomnam asi-among elo noluke duudu tetengem, sim ayon sime kénmana buluke ome-oo kídíete sime tatperung aido, delokke RUUTUM noluke Shédíme pesola yédope kénperung aido.”

¹⁴RUUTUM bí Mosime poto, “Nokke sidí longe píídak, iname Joshuame tomla, ngo bíme agérlo lulíkdope nonyi RUUTUM ke Tombulo aabosulangka.” Depe políkla Mosi lang Joshua bínyi RUUTUM ke Tombu delo aabito.

¹⁵Delo RUUTUM bí, Tombu míílong teyong delokke doomug adong delo lengkansula, de doomug adongde Tombu delokke aatak lamgé teyonglo dagato.

¹⁶Delo RUUTUM bí Mosime poto, “No, nokke buku kídílo apéémínyéku, idola ami kídar si buluke gíangpeko among elo menarupe buluke mibo-miyingke uyu kídílo bulu abír-ayo ibosuyé. Bulu ngome yadla, ngokke bulukíng daapong ibosunamem betpakyéku.

¹⁷Depe ikolok dekena longe delo ngoteng buluke teyolo marla bulume míípakyéku. Buluke keranglok ngokke migmoem runyokyé, delokke bulu nyokyé. Buluke teyolo deddína ebín elang adíre pííyé. Dekena longe delo bulu, ‘Ngoluke Shédíbí ngolukíng yémín gemanam legape si adír kídar si ngolu kelo píímaneya?’ emla ííbosuyé.

¹⁸Bulu dekena longe delo angukon uyu kídílo gíla atímape inam legape ngokke migmo sim arope runyoksuyé.

¹⁹“Buluke atímangem ngok keralo lengkannadope, sim miri sim atlangka delokke Israel ami kídíem luyil sumolangka.

²⁰Edílo ngo buluke buku kídí teyonglo pésula togesunam, gakíre lang ngullange bingko amonglo langaayédí, delokke edílo delo dopa-tíípala, jéla-remla iyédí, delo bulu angukon uyu kídílo mííbosula bulume kumsula, ngome mepakla ngokke daapong ibosunamem bulu betyé.

²¹Depeila edílo bulukíng deddína ebín-ebon elang adíre pííyédí delo si miri si buluke atímangem lengkan biyé. Kapeila buluke oten siirek loope sim miri sim mitpan sumayé. Ngokke buluke keralo pésula among biyé emla togesunam among delo ngo bulum langaamang adape ngo buluke ipenam séguem kényindung.”

²²Delo Mosi bí miri dem atla delo longe delo Israel ami kídíem luyilto.

²³Nunke oo Joshuame RUUTUM bí sime lulígto, “No aapí-aange ralla miga-miramlangka. Buluke keralo pésula among biyé emla ngokke togesunam among delo, no Israel kídíem gíbolangka, delokke ngo agísuete nokkíng yémín geyé.”

²⁴Ayon sokke agom-aang kídíem ilen lokke ila iyin loope kitap kolo Mosibí atyinlíkla,

²⁵RUUTUMke Daapong Sondugem kaabom-tatbomna Lebi miri kídíem sim lulígnam kídí sime lulígdola bito,

²⁶“Ayon kitap sim bomla RUUTUM noluke Shédíke Daapong Sonduk abe delo leelíg langka. De noluke atímangem lengkanna ekurape duuyaryé.

²⁷Kapeila nolu kapekísana miké amipe ila mirupe míípatsuna amipe idudí deme ngo kéndung. Ngokke turla nolukíng yébo sudung adape nolu mirupe míípatsurodem, ngokke sirongem edítko dem pakyape nolu mirupe míípat sumayén?

²⁸Depeila ngokke kerang so noluke opín-buang takamke miro kídí emlang migom kídíem gogdum suyinlangka. Ngo buluke takam tatkolo sim agom-aang kídar sim pokandola ngo among-talengem tomla dem kaana-tatnape idope buluke atímangem lengkan biyé.

²⁹Kapeila ngokke sirongem, ngokke luyilnam bedanglok nolu gílat sulangkula atírumana amipe nolu iyérungku emla ngo kéndung. Angkupena longelo nolu lutum bomnamem ibosulangkula, RUUTUMke kangkolo atímana agérem nolu ila, bíme marmola, noluke teyolo dug-adíre aayé.”

³⁰Israel daadike tatkolo, ilen lokke ila iyin loope sim miri sim Mosi bí lukan bito.