Read Alladian POBENG BINAM 32 Bible Online

POBENG BINAM 32 - Alladian bible

POBENG BINAM 32

¹E talengkuppo, ngok popenamem tatlangka, e tani among, ngok nappang sokke agomem tadbilangka.

²Ngokke luyile pedong kísa otok dakyika, ngok agome amug kísa gyatokla, remyakna nesi-neyanglo aapam kísa uala, esing-éng kídílo eetetpe pedong uanam kísape idakyika.

³RUUTUM ke amínem ngo gogying geyé, ngoluke Shédíke ralnamem yidgeyé.

⁴“Bímin Líírenge, bík agér-aname apíng aloodung, delokke bíkke bedang takame jondung. Imem kímana Shédíko, arolokla jonnalok yénako bí.

⁵Bík keralo ami kídíe loorímape ikai, buluke deemanglok bíkke ome-oope bulu iyimangkai, delokke aapí-aange gerla megoo-yadgoona siirum kope ikai.

⁶E kénmana bopol ami kídí, sikepía RUUTUMme nolu iyan sudune? Bí nolum pílenla nolupe imona, nolum ruulenna noluke abu mangía?

⁷“Aku longe kídíem míípa sutola, yétona siirum kídarem míípatola. Noluke abu kídíem íngkítola, bulu nolum pobiyé. Noluke miro kídíem popatola, bulu nolum pomíkbiyé.

⁸Edílodí Kedonyalumna bí opín kídíem, agí agíke yétem panlíktodí, edílo tani takamem bí ipansutodí, delo bí Shédíke [2] oo kídíke anyo-bojé akorpe, ami kídíke asi-among rísu kídíem kíbito.

⁹Idola Jakob bí RUUTUM ke yétalo panlíkname, delokke bíkke agíke amisu kídíe.

¹⁰“Bí dooyi-asare yabla ronggamko, yépol mooruk amonglo bulume paato. Bí bulume tamtepe ibomla kaabom-tadbomla, agíke migololo kísa bulume umbomto.

¹¹Pemí lokke agíke asuplo, agíke nganga kídíem kaabomla, agíke alap aralo laplum bomla, agíke leyinlok bulume jonggo bomnam kísa,

¹²RUUTUM atel bulume gagbomto, abíd uyu kamato.

¹³Bí bulum yiibe díítum amonglo yébommoto, delokke aríklok garna ali-ayém dopa-tíípamoto. Bí lííreng aralo duuna ngullangem tíímoto, delokke elíng amonglok olib télem paamoto.

¹⁴Bulukíng ngelnarung mére, sobéne delokke Bashanke gooru kídíe kala, bulu deke delokke gakírem, dohiem, delokke ngamnarung moidang emlang tííporuna onggur alangem, tííla-dola ibosuto.

¹⁵“Jeshurun[3] bulu ngella, doname kala miremla jékai, idola miké amipe ikai. Bulu, bulume Ipítna Lííreng bím míípakla, bulume pílenna Shédíme mepakto.

¹⁶Bulu angukon uyuem kumkolok bíme nemoto, delokke buluke belumnam mimang kídílok bíme marmoto.

¹⁷Noluke buku kídíke kénkípete manam uyu kídílo, Israelke kumkímanam uyu kídílo, ingkona uyu kídíemdí atí-agope kénlen kadí, dekena Shédípe imana uyu kídílo, bulu sobo pala ipak ikai.

¹⁸Abupe míísula nolum isana Lííreng bím nolu mepaksula, nolum olenna Shédíme nolu mitpansuto.

¹⁹“RUUTUM bí sikepe inamem kaala bulume míípakto. Kapeila bíkke ome-oo kídíe bíme marmoto.

²⁰Depeila bí sipe emto: Bulu kelok ngokke migmoem runyoksuyé, buluke yéyinem kaalangka, kapeila bulu arope mínggapmana ome-ueke, delokke yépatsuna siirumko.

²¹Dekepe ila buluke mimanglok marmo kolok, buluke shédí arope imana uyu kídílok ngome aklí mokolok, ngo mibo-miying konem agí amipe imola bulume nemoyéku, delokke bopol opín-buang deloge bulume marmoyéku.

²²Kapeila ngokke marlílok marnam meyoe dorlen langaala, Sheol [4] sutkin kédéng rumkíng belote dortokyé. De marnam meyode among simla among sokke arík-anam tabulo gulangala, dííte kídíke dungkeng leríng kídíemte gukutyé.

²³“ ‘Ngo buluke teyolo dug-adírem pyangkum líkyé, delokke ngokke yogmo kídíem bulukíng aplíkyé.

²⁴Ngo buluke teyolo yapak mona díríem, dopakna kilii-ramliemla reyubnam itung-iréem melígla idíryé. Ngo buluke mirolpe monkírem rekdo pelang, asum-aar kana tabíem bulum padope melígyé.

²⁵Bedu-bedanglo yokse bulume ome-oo kaimomayé, delokke ekum aralo yirí-pedípe pesoname kayé. Dumpu minne lang ojinge, delokke mimum yaamé takame nyokyinyé.

²⁶Tani araso bulume míípasuna kaimadope ngo apíírupe nyokmope emla míítuai.

²⁷Idola “Ngoluke alage ikumto, RUUTUM bí sike sim imato,” emla miru kídíe lupu-luléla manpelo. Si míínam si ngome ansumoto.’

²⁸“Israel si míípe-míngor kamana, aníng-kéníng sumana opínko.

²⁹Buluke yéyine kapekísa iyédí emla bulu an-gapsula, kén-gapsula ituamílo edítko aiyan?

³⁰Kapekísa midum éjarem midum atele monbomlayén? Kapekísa midum annyie midum éjar íyingem duggedokupe ilayén? Buluke Lííreng bí bulume kolígla, buluke RUUTUM bí bulume mepakla imayaryarke dekepe ilamayé.

³¹Kapeila buluke líírengde ngoluke Lííre bíkke kísamang, sime miru kídíete aroe emla tolíkdung.

³²Kapeila buluke onggur anede Sodomke onggur anelok lenne, delokke Gomorrahke aríklok garsane. Buluke onggur ayéde emo alangpe bíídung, delokke buluke amíde ríngko kosangpe idung.

³³Buluke apong kídíde tabíke asum-aare, delokke bítpyor lokke emoe.

³⁴“Sike sim ngo mekummanía, delokke sike sim ngo arem sonduklo siilpe tuplíkla mesiimanía?

³⁵Edorayan sukupenamde ngokkemin, ngo doryéku delokke moodíem buluke ale yullapsuyé, Buluke gérmadí longe anínkai, delokke buluke nyokdíe bulum dugabomkai.

³⁶RUUTUM bí agí amieme kebang lusuyé. Edílo buluke ralname kaimape, bulu abíl dokom, ruutum dokom, sékote kaimape iyédí, delo bíkkíng agér ibina kídarlo bí ayayalen suyéku.

³⁷Delo bí íngkíyéku, ‘Supak ingkolo buluke uyu kídíe? Buluke botteyanape míítesubomnam lííreng kídíe ingkolo?

³⁸Buluke tíínam aman apongem, delokke buluke ipak inam kídí una adínem tíína-dona uyu kídíem, supak bulum gerepmola nolum iguldope imokítoi! Bulume noluke duusi supompe ikímotoi!’

³⁹“ ‘Supak nolu kaalangka! Ngo agísuemin bí, abíd uyu kídíde aromang. Ngomin simone, ngomin turmone. Ngo tarí moketne, ngo ipííkune. Ngok alaglok sékote mopítlamang.

⁴⁰Arorupe ngo agínpe turyarne, ngok alagem teyong amongpe leedusula ngo pésune.

⁴¹Edílo ngokke asirna yoksem ngo ratdope píyédí, delokke ngokke alage deme gagla kebang lulen yédí, delo ngokke miru kídíem ngo edo radung, delokke ngom nena kídíem ngo areme dordungku.

⁴²Ngokke yokse umnam miru kídíke miro dumpong pakanam adín kídíem dodungem, ngokke yogmoem ngo iyyilok tíngír sumodung.’

⁴³“E daadi opín kídía, bíkke ami kídílo lekope ashéng bosulangka, kapeila bíkke ami kídíke iyyiem bí edorayéku. Bí miru kídílo ajéng laalangkula, agíke ami kídí emlang asi-amongem bí ipítdung.”

⁴⁴Ami takamke tatkolo miri sokke agom kídíem Mosi bí Nunke oo Joshuame aabola pokan lukanto.

⁴⁵Miri sokke agom kídí takamem Israel takamlo Mosike lukan birodem,

⁴⁶bí bulum poto, “Sok ayon sokke agom-aang kídí tabungem ai-kampope bomgapdope noluke ome-oo kídílo luyilsudope, siloke longe so ngo, noluke kerang so, agom-aang kídar sim nolu aapí-aanglo mínggap geyardope aipakpe pokan biyindung.

⁴⁷Si agom-aang kídar si noluke ríksope mííbom penammang. Sike si noluke yéname. Noluke Jordanem koola, dunga bompeko asi-among elo, deddína longe loope nolu sok agom-aang kídar sok turla yégeyé.”

⁴⁸Delo longe atel delo RUUTUM bí Mosime poto,

⁴⁹“No Jeriko doolung kékonke Moab among lokke Abarim dííte kídíke Nebo díítumlo resala, Israel amiem yéyar duuyar bomdope ngokke bisunam Kanaan amongem kaalangka.

⁵⁰Nokke bíro Aaronbí kapekísa Hor díítumlo sila agí amilo bíme langaatokudí, dekepe nokke resangko díítum delo no siyé, delokke nome agí amilo langaayéku.

⁵¹Kapeila Israel kídíke keralo nonyi annyipage ngome arope míngke sumape, yépol mooruk Jin lokke Kadesh doolungke anínlo duuna Meribah asilo nonyi Israel daadi tabungke keralo ngokke deenamem mesiibimato.

⁵²Depeila no mooteng lok asi-among deme kaayé. Israel ami kídíem ngokke asi-among binam delo no gíalamayé.”