Read Alladian POBENG BINAM 33 Bible Online

POBENG BINAM 33 - Alladian bible

POBENG BINAM 33

¹Sike si Shédíke ami Mosike agí simang adape, Israel kídílo utepooro agom políkname.

²Bí poto: “RUUTUM bí Sinai díítumlok aato, ngoluke teyolo doonyi kísa Seirlok saabomla, Paran díítumlok angun ngunkan bito. Bíkke lakbíklo dorna emem bomla, sanam yimanam teyong kotokie bíkkíng aamín geto.

³Arope nomino agí amiem ayasune, pídésula deena kídíe, nokke alag aralo duuyindung. Nok alelo bulu gubala kumdung. delokke nokkíng bulu luyil-poyilem paadung.

⁴Ngoluke gairupe míísula mesiisunam, Mosike ngolum binam ayonem ngolu igedung.

⁵Edílo Israel opín-buang takame, delokke ami kídíke miro kídíe gídum sutodí, delo Jeshurunke teyolo RUUTUM bí rojape ito.

⁶“Reuben bí simape turlangka, bíkke ami kídíe anyomapeka.”

⁷Judah ke legangem bí sikepe poto: “Judahke kapnamem E RUUTUM tadbilangka. Agí amilo bím langaalangka. Bí agíke alaglok agí agér legape bí mimakpe iyardung. Depeila E RUUTUM bí miruem ikumdope, igul langka.”

⁸Lebike legangem bí sikepe poto: “Nokke Urim elang Thummimde[5] nokke mííbanam ami bíkkepe idung. No Massahlo bím ikang kíto. No Méribah asilo bíkke aro míngkengem kaato.

⁹Bí agíke ane-abuem pemílo nome aiyape mííla, bí agíke bíro kídíempemílo nome kangkén yala, bí agíke ome-uem pemílo nome aiyape mííyala, nokke daapongem, nokke agomem bí kaabom tatbomla ine.

¹⁰Bí Jakobme nokke idongem iyilla, bí Israelme nokke ayonem poyilla, nokke keralo bí nampona atoem rombila, delokke nokke runggulo romnam amanem rombila ibine.

¹¹Dekepeila E RUUTUM, bíkke ijingko teyolo utepooroem ruubilangka, delokke bíkke idu-saatoklo mííyum subidakyika. Bíkke mirupe gerepna kídíke ugíngem dírbidakyika, bíkke miru kídíe lekoda gerep layimadope ijét bilangka.”

¹²Benjaminke legangem bí sikepe poto: “RUUTUMke míísunam bí, bíkke kaabom aralo duulangka, longe rubungem bí tamtepe ibidung. lakpong annyi pénsamlo apéédung.”

¹³Josephke legangem bí sikepe poto: “Teyong among telokke aapam lokla, rumkíng belokke eerína siyéng asi doorílok RUUTUM bí, bíkke agér-anam iko teyolo bíme utepooroem ruubidaklangka.

¹⁴Doonyi angunlo gairuna ali-ayém éémola, poolo angunlo gairuna ali-ayém garmolangka.

¹⁵Konnying-mennyingke dííte aku kídílok gairuna kuséréng amanem, duuyarna díítum kídílok nampona ato-siroem bidakyika.

¹⁶Kédéng teyong sok garsanalok, gairuna amanem, delokke pasum gukolo duuna bíkkelok apekpe ayangem paamolangka. Sikena utepooro kídíe Joséphke dumpolo duudakyika, delokke agíke bíro kídí aralo ruutumpe yébo kína bíkkíng kadakyika.

¹⁷Mite-ralnamlo bí kerang ogenam rubo kísa, bík arengde baamín areng kísa. Deloge bí tani among duurí loope opín takamem tubdung. Sikepe mino Ephraimke sankén yimanam ralname, delokke sikepe mino Manassehke kaala yimanam migange idune.”

¹⁸Jebulunke legangem bí sipe poto: “E Jebulun nokke gílenyém ashélangka. E Issakhar nokke tombulo aapíe eetetlangka.

¹⁹Bínyi ami kídíem díítelo tomdumsula deena sobo amanem pabiyé. Bínyi siyéng aralok ekuserangem paayé. Bínyi siiyé aralok uun abalem paayé.”

²⁰Gadke legangem bí sipe poto: “Gadke yétaem bojémomona bíkkíng utepooroe kadaklangka. Gadbí dumpongem demangkom alagem sérpan sudope gígona myomur simyo kísane.

²¹Bí moone amongem agí keepe tosula, ruutum yédong konem yébomne. Edílo ami kídíke miro kídíe gídumsutodí, delo Shédíke deena aang míínamem bí ipíng bine, delokke Israel teyolo Shédíke deena kebang lubinamem bí igebone.”

²²Danke legangem bí sipe poto: “Dan bí Bashan amonglok hudsana myomur simyoke oo kísane.”

²³Naphtalike legangem bí sipe poto: “Naphtali kíng RUUTUMke ayang yatek suname alum-asamape idung. Bíkkíng utepooroe alummang. Bí sokko danke Galil Siyéng loope bíkke among rísue karíyé.”

²⁴Asherke legangem bí sipe poto: “Oo kídí arang lokke Asherbí utepooro rulík yalumname. Bíro kídare bíkkíng atekpe ayalangka. Olib téllok bík alem arbín sudakyika.

²⁵Nokke doolungke luuyabem aremlok idaklangka, delokke nokke yéname lang ralname kídí sudaklangka.”

²⁶“Agíke mite ralnamlok, teyong among doomuglok gígola igulna, Jeshurunke Shédí kísana sékokom kamang.

²⁷Turyarna Shédíbí noluke duusi supekoe. Bíkke duuyarna alag arangde noluke rugepekoe. ‘Bím nyokmoto,’ emla noluke miruem Shédíbí monpak bine.

²⁸Depeila Israele apít-arape ingko among lodí, teyong among lokke aapam doopillok kédéngem baldudí, ingkolo donam-tíínamelang asi-aponge alum-asamape idudí, dekena amonglo yéyé.

²⁹E Israel, nolu utepooro kana amieke. Nolu RUUTUMke ipítnam amieke. Noluke kísape séko idun? RUUTUM bí nolum igulne delokke noluke tamte. Noluke keralo noluke mirue lebíng kooníla roguyé. Miru kídíke kumpom kídíem nolu tujémbomyé.”