Read Alladian POBENG BINAM 34 Bible Online

POBENG BINAM 34 - Alladian bible

POBENG BINAM 34

¹Méélamdem Mosibí Jeriko doolung kékonke Moab yiibe lok gíla Nebo díítumlo resaala Pisgah ponyuklo pííto. Delo RUUTUM bí bíme, Gilead lokke ila Dan loope,

²Naphtali amongem, Ephraim keela Manasseh ke among rísu kídíem, anggoke Among Raadang Siyéng robenglok ila Judah ke among takamem,

³sokkodan Negeb amongem delokke kéjur esing milí iko Jeriko doolung lokke yiibe among takamem ilangala, Joar kéényu beloope asi-among tabungem lengkan bito.

⁴Depe irongem RUUTUM bí bíme poto, “Sim asi-among sim moko, ‘Nokke otíng-oyinem ngo biyé,’ emla Abraham, Isaak delokke Jakob buluke teyolo pésula ngokke togesuname. Nokke agí amiglok sim takam kaasudope emla lengkan bidung, idola no agísuedan so among so gíalamayé.”

⁵Depeila RUUTUM ke pokampe Moab amonglo, RUUTUM me agér ibina Mosi bí sikai.

⁶Bethpeor doolung lokke kékonke Moab yiibelo bíme RUUTUM bí yuto. Idola silote bím yuko agodem sékote kénna kamang.

⁷Mosike sidodem, bí dítak língko kolang takying annyiko ito. Idola bíkke amige kaabeto, delokke bíkke amíl amoe ralname kato.

⁸Mosike legape Israel ami kídíe looying angum kope kapla-rííla ankí-keno moodí gíyin loope ankíbomto.

⁹Mosi bí agí alagem Nunke oo Joshuake teyolo leelígla kumlík bila irongem, Joshua keelo kénna aidbí bííbomto. Depeila Mosi kíng RUUTUM ke lulígnam tuubupe, Israel ami kídíe Joshuake agom-aangem tadbito.

¹⁰Delokke ila RUUTUM ke atuk migmoem geríksula lupo-manmo ibosunam Mosike kísana kaaluna miri amie Israel aranglo siisana kamato.

¹¹Ijipt amongke Pharaoh rojake kerang lolang bíkke mite-migom kídíke keralo, RUUTUMke Mosime melígla míírí-míínyonam irisinyo iyodem ikanla ina, kaaluna miripe sékokom ina kamang.

¹²Israel daadike kangkolo botteruna, reyubrunam míngkénmape Mosike inam kísanem sékokom ina kamang.