Read Alladian POBENG BINAM 6 Bible Online

POBENG BINAM 6 - Alladian bible

POBENG BINAM 6

¹“Nolum ngo poyildope, RUUTUM noluke Shédíke ngome lulígnam ayon kídíe sike simoko. Dekedem nolu supakke gíala dunga bompe emla iko amolo airupe igelangka.

²Nolu asi-among elo deddína longem turla yébomdope, ngokke nolum binam RUUTUM noluke Shédíke ayon takamem nolulang noluke otíng-oyine airupe igap bomla RUUTUM noluke Shédí me pesolangka.

³E Israel, tatlangka, dekedem igelangka. Depe imílo ato takame ai-kampoyé, delokke RUUTUM, noluke buku kídíke Shédíke noluke teyolo pésunam tuubupe, nolu amín kanarung opínpe ila, ngullang elang gakíre bingko among elo nolu yébomla ardayé.

⁴“E Israel tatlangka: RUUTUM ngoluke Shédí bí petom RUUTUM e.

⁵RUUTUM noluke Shédíme nolu aapí-aang takamlok lang noluke aid takamlok delokke noluke ralnam takamlok ayalangka.

⁶Siloke ngokke nolum lulígnam si noluk aapí-aanglo duuyarpe aido.

⁷Dekedem noluke ome-oolo poyil langka. Noluke ekumlo duubosuyém, noluke bedu-bedanglo enyé-gíyém, noluke ibayém delokke noluke gerep yékuem; dekedem nolu pobosulangka.

⁸Noluke alag kídílo dekedem míípa sumonana iyodpe ginlíksula, noluke tukku kídílo dekedem éélík sulangka.

⁹Noluke ekum kídí lokke eyab kídí lolang noluke etor luyab kídílo dekedem atlík langka.

¹⁰“Kapekísa noluke buku kídí; Abraham, Isaak delokke Jakob keelo RUUTUM noluke Shédíbí pésutodí, dekepe bí noluke ilen sumanam bottena doolung kana asi-amongem biyé.

¹¹Deke delokke ekum kídídem noluke atí ilíkmanam gaina ekuserape biyé. Noluke koomanam asi déérung kídíe alummayé delokke noluke ilíkmanam ríkséng kídíe lang olib esing aríge kayé. Sikena amonglo edílo RUUTUM bí nolum bomala, edílo nolu dope- tíípename alum-asa mayédí

¹²delo nolu, abílpe yétuako Ijipt among lok nolum laalenkuna noluke RUUTUMme nolu kénsuyimape imape mínggap sulangka.

¹³“RUUTUM noluke Shédíme pesola, bím petom kumsula, bík amín petom lok noluke tolík-tuala ibosunamem ilangka.

¹⁴Nolum dunggo bomna ami miying kídíke uyu kídíem nolu kumsumapeka.

¹⁵Kapeila nolu kelo yémín gena noluke RUUTUM bí nena Shédíko. Nolu uyu kumsuyémílo, RUUTUM bí noluke teyolo marla nolume among delok nyokyínmoyé.

¹⁶Massahlo inam kísa RUUTUM noluke Shédíme ika-darkamapeka.

¹⁷RUUTUM noluke Shédíke lulígnamem igapla delokke bík ayon kídí emlang idong lengkannamem bomgaplangka.

¹⁸Nolu RUUTUM ke kangkolo ingkuedí aidune, delokke jondune, dekem ilangka. Depe imílo nolukíng ainame kala, noluk buku kídí keralo RUUTUM ke pébisunam ardana among delo nolu dungala,

¹⁹bíkke pokampe noluke miru kídíem nolu monpaklayé.

²⁰“Yépenam longelo edílo noluke ome-oo kídíe nolume, ‘RUUTUM ngoluke Shédíke nolum lulígnam, ayon delokke idong kídí sokke agom-aang gomro kídíde ingkoeda?’ emla ííyéme,

²¹nolu bulum sikepe pobilangka, ‘Ngolu Ijipt amonglo Pharaoh ke abílpe ituai. Idola RUUTUM bí bík lakbíng ralnamlok ngolume deloge laalentoku.

²²Ngoluke amig keralo RUUTUM bí irisinyo iyodem melígla, míngkén yimanam botteruna reyubnamem Pharaoh kíla bíkke ekum-eralo delokke Ijipt ami kídílo ikanto.

²³Idola ngoluke buku kídílo bíkke togesunampe, sim asi-among sim bí ngolum bila so langa dokupe ngolum deloge bí laalentoku.

²⁴Siloke ngoluke yénam kísa, ngolum turmola agínpe gai-gakope bíkke ayon kídí emlang idongem ngolu igapgela, bíme ngolu pesola yéyardope RUUTUM bí ngolum lulígto.

²⁵Delokke arope ngolu sim ayon kídí sim, RUUTUM ngoluke Shédíke keralo, bíkke lulígnampe ansula igeyémílo, de ngoluke legape airuna deena agére.’ ”