Read Alladian POBENG BINAM 7 Bible Online

POBENG BINAM 7 - Alladian bible

POBENG BINAM 7

¹Edílo noluke yébompenam asi-amo delo, RUUTUM noluke Shédíbí nolume aaboyédí, delokke noluke keralok, nolum pemílo tolya-ralyana; Hittit, Girgashit, Amorit, Kanaan, Perijjit, Hibit delokke Jebusit ami opín kínídem monpak bila;

²edílo RUUTUM noluke Shédíbí, dem ami kídídem nolukíng melígla, delokke nolu bulum ikumla iyédí, delo nolu bulum apíírupe nyokyinmope aido. Bulume atí ayang mapeka delokke angong-arum ibosumapeka.

³Bulum nyamran ibosumapeka. Noluke omem buluk oo kídílo mimepe, delokke buluke omem noluke oo kídílo mimepe bibosumapeka.

⁴Depe ibosumílo noluke ome-oo kídíem bulu RUUTUM ke yétalo yémomape uyu kumsukolo aabola, RUUTUM ke marnamem noluke teyolo kamola, nolum bí menape nyokyin moyéku.

⁵Depeila nolu bulum sikepe ipe aido: buluke runggu kídíem benpak bilangka, buluke kumbomnam elíngem dírpak bilangka, buluke Ashérke mimangem papak bilangka, delokke buluke mimang abíd emte emelo rompak bilangka.

⁶Kapeila nolu, RUUTUM noluke Shédíke deena amie, tani among sokke takam ami kídí aralok RUUTUM noluke Shédíbí nolume agíke gairupe míísunam ekurang supe, agíke atek amisupe, ullen sutung.

⁷“Nolu abíd amiem pemílo milu-mibam yadung emla, ayang yala RUUTUM bí nolum ulmang; nolu ami takamke aralo anyo yalumna amipe ituai.

⁸Idola RUUTUM bí nolum ayasula, noluke buku kídílo, bíkke pésula togesunamem bomgappe mííto. Dekepe bí míílamin, nolume Ijipt lokke roja Pharaohke abílpe bomgongko aralok, agíke lakbíng ralnamlok mopít langkula laalen tokune.

⁹Depeila RUUTUM noluke Shédíbí petom Shédíe emla nolu kénpe aido. Bí agí agomem mesiisuna Shédíko. Bí agíke daapong ayonem bomgapla, bím ayala, bíkke lulígnamem igena kídílo bíkke ayang ayarnamem éjar-éjar siirum loope lengkan sunako.

¹⁰Idola bím akna kídílo, bí rayansula nyokmonako. Bím akna kídídem, edorayan sukolo bí eetetmang.

¹¹Depeila siloke ngokke nolum binam ayon kídí simlang idong kídí sim aipakpe ansula ige ayar langka.

¹²“Nolu sim ayon kídí sim ai-kampope tatla igeyémílo, RUUTUM noluke Shédíbí, noluke buku kídílo, kape kísa pésula togesutodí, dekepakpe bí, bíkke daapongem nolukíng bomgap bosula, nolum bíkke ayang ayarnamem agínpe lengkan suyaryé.

¹³Bí nolum ayala, noluk teyolo bíkke utepooroem ruulíkla nolum ami parmoyé. Noluke buku kídarlo nolum asi-amongem bidope kape kísa bí togesutodí, dekepe togesunampe bí noluke ome-oo kídílo, noluke arík-anam kídílo, noluke ali-ayé, asi-apong, tél-tulang teyolo, delokke noluke bomnam taro alung kídí takamke teyolo bík utepooroem ruulík biyé.

¹⁴Abíd ami kídíem pemílo nolum bojéyape ruubiyé. Noluke mime delokke milokong aralo sékote ome-oo kamana kamayé, delok teyolo noluke taro bomnam kídí dete ome-oo kamana kamayé.

¹⁵Nolum RUUTUM bí kinam-ramnam takamlok mopítyé. Ijipt amonglo noluke kaanam reyubnam kilii-ramli kísanalok nolukíng bí bomamayé, idola noluke miru kídílo dekenem bí kamoyé.

¹⁶Noluke ale rumkílo, RUUTUM noluke Shédíke ruulík binam mibo-miying kídíem nolu nyokyin molangka. Nolu bulum ayang-yaman sula, buluke uyu kídíem kumsula imapeka. Depe inamde noluke annyi supename.

¹⁷“Nolu agísuem sikepe emsulado, ‘Ngolum pemílo si ami kídí si miga-miram yadung. Ngolu kape kísa bulum monpak layén?’

¹⁸Idola nolu atí pesomapeka. Ijipt lokke Pharaohme, RUUTUM noluke Shédíbí kape kísa iton? Dem míípasulangka.

¹⁹Kape kísa RUUTUM noluke Shédí bí, botteruna ankí-kenolok, irisinyo iyodlok, míngkén manampe ila, lakbíng ralnamlok alage yamtar bomla nolume amig kerang paklo laalen tokune; dekeme nolu kaayinsuto. Deke kísapakpe, noluke supakke pesobomnam deyi-degong sokke ami kídíem RUUTUM noluke Shédíbí iyé.

²⁰Bí buluke aralo ankí-keno adírem melíkla, noluke kerang lok runyok gena kídíemte nyokyinmoyé.

²¹Nolu bulum peso-ríanpe mínggemapeka, kapeila nolukíng yémín gena RUUTUM noluke Shédíbí reyubrupe pesonam botteruna Shédíko.

²²RUUTUM noluke Shédíbí sim ami kídar sim anyong anyongpe noluke kerang keralo monpakyé. Bulume, noluke keralok menang asak nyokyin momayé, demamílo monkír-tangkíre noluke luyu lamgélo bojémomo iyé.

²³RUUTUM noluke Shédíbí bulum noluke alag aralo melíkla, bulume mamam sumola akén-ayén yimadope imola, buluke nyokyinmang teteng dem iyarmoyé.

²⁴Buluke roja kídíem noluke alag aralo bí melígyé. Nolu bulume mokala, taleng rumkíng so buluke amíne kaimadope iyé. Noluke mirolpe sékote ilana kamayé. Bulum takamem nolu nyokyinmoyé.

²⁵Buluke uyu kídíke mimang kídíem nolu emelo romnyok langka. Mimang kídí delo dakna baldín kídíem, uun kídíem kaabomapeka, delokke nolu agíkesu legape dekedem lamapeka. Depe imílo nolu batjém kosuyé, delokke dekepe inamde RUUTUM ke keralo belumruname.

²⁶Nolu dekena belumrunam mimang kídíem agí ekumlo langaamapeka. Depe imílo bulukíng béénamde nolukíngkom kayéku. Dekedem nolu belumrupe mííla mepaklangka. Kapeila dekede nyokdope rungu sunam ato-siro kídíe.”