Read Alladian JOAN 10 Bible Online

JOAN 10 - Alladian bible

JOAN 10

¹“Ngo nolum aruem pobidung, mér dungko lamgélo aamape, idola angukon kéényung lok reesaala aana amide, doppyone delokke rulane.

²Lamgélok aana ami demin mér kídí lokke ruutume.

³Kaabom nade bím eyabem siyya bidung, delokke mér kídíde bíkke agomem taddung. Bí agí mérkídíem amínlok gokdung, delokke bulum gílen bodung.

⁴Edílo bí agíke mér takamem melendudí, delo bí buluke keralo gígedung delokke bíkke mér kídíe bíkkíng gímín gedung kapeila bulu bíkke agomem tatkéndung.

⁵Idakkom bulu kangkí manam ami agomdem tatkén mang, depeila bulu bíkkíng gímín mape bím dukge latdung.”

⁶Jisu bí bím luyiisunam agomlok pobituai, idakkom bulu bíkke ponamem tatkén tomang.

⁷Delok legape Jisu bí lekoda poto, “Ngo nolum aruem pobidung, Ngomino mér sobén kídíke eyabe.

⁸Ngokke kerape aana takamde doppyona delokke rulana kídare, idakkom mérkídie buluke agomem tatmang.

⁹Ngomin lamgésue; séko ngokkelok aayédí bí turyé.[20] Bí aala goolen bola delokke dota pekuem paabodung.

¹⁰Doppyona kídíde pyoola, mola delokke petpe emlamin aadune; ngokke anggade bulu turnamem paadope delokke dem apíípe paadope emlamin aadune.

¹¹“Ngomin aina mér ruutumde. Mér ruutumde agíke mér legape agí turnamem bisudung.

¹²Mér kaabom dope relíknam amide mér atomang. Dekepe ila, bí sipyang kaayédem, mér kídíem mepak geyéla duknyok gedungku. Delo sipyange mér bénbamdem míílo aabomla monpan sudung.

¹³Amide duknyok gedung kapeila bí hajirang amie iname mér kídíem ankímang.

¹⁴Ngomino aina mér ruutume; Ngo ngokke mér sobénem kénsudung delokke ngokke mér sobéne ngom kénsudung.

¹⁵Abue ngom kénsunam akampe ngo ngok Abuem kénsudung delokke ngo mér sobén legape agí turnamem bisudung.

¹⁶So mér opééso kamana abíd mér sobén ekom ngokke kadung. Ngo bulumte langaarupe aiyé. Bulukom ngokke agomem tatyé, delokke delo bénbam atelpe iyé delokke mér ruutum atelko iyé.

¹⁷“Ngok Yayike ngom ayanam legade, ngo turnamem paadokupe emla ngo agíke turnamem bisudung.

¹⁸Sim sékote ngokkelok laabín lamang, idola ngo agírunge agí míísalok sim bisudung. Ngo sim bisulado delokke sim laasu ladoku. Sim ngiitom sim ngo ngokke Yayi kelok paato.”

¹⁹Sok agom kídarsok Judai ami kídíde angu arang ikakukéng.

²⁰Bulu bojéko pokai, “Bí uyu genako delokke tumnako. Kapeila bíkke agomem taddune?”

²¹Idakkom abíde poto, “Si agom kídar si uyu duubomnam tani agom mange kemino. Uyue mingmanem migdar nola dungkunía?”

²²Delokrongem Jirusalemlo kumnam Aran longe píngkai. Dígíne iduem,

²³delo Solomonke Baatum emnam kumkeng ekum goora delo Jisu bí gígoo dungai.

²⁴Judai amikídíe bím gargoo dola poto, “Edítko no ngolum laltíla duutí moyéne? No Kristomílo ngolum berokpe pobitola.”

²⁵Jisu bí pobito, “Ngo nolum pobito, idokom nolu arope míímang. Ngokke Abu amínlok irisinyo inamde ngok legangem posudung

²⁶idakkom nolu arope míímang kapeila nolu ngokke mér sobén mangeke.

²⁷Ngokke mér sobéne ngokke agomem tatbidung; ngo bulum kéndung, delokke bulu ngokkíng gímín gedung.

²⁸Ngo bulum turyarnam yénamem bidung, delokke bulu edílokom nyokyi mayé; sékote bulum ngokke alaglok rotbín lamayé.

²⁹Bulum ngokkíng bina, ngokke Yayi bí takam lokke[21] botteyane; sékote bulum ngokke Yayike alaglok rotlen lamang.

³⁰Ngolang ngokke Yayi bí atele.”

³¹Lekoda Judai kídíe elíng gakla bím gepe emla ibomto,

³²idokom Jisu bí bulum poto, “Ngo nolum Abukelo deddína irisinyuem lengkanto. Sok legapía nolu ngom elínglok gepetpe emla idune?”

³³Judai kídíde poyansuto, “Ngolu sikesok legape nom elíng gepe imang. Idakkom no emmumna tanie, Shédí emsula Shédíme lungilnam legape idung.”

³⁴Jisu bí bulum poyan suto, “Ayonlo nolum shédí kídíe emla atmanía?

³⁵Shédí bí séko bulukelo agomem políktodí bulum shédí kídíe emdung, delokke ngiitom agomdem edílokom mepak lamang.

³⁶Abue agíke kísarupe ullen sunam delokke tani amoso melíknam amidem kape emyén? Demílo ngokke ‘Shédíke Ue ngo’ emsukolok ngom nolu kapeila Shédíme lupu luyééne emkane?

³⁷Ngokke Abuke agérem ngo imamílo ngom arope míímapeka.

³⁸Idakkom ngo dem idumílo nolu ngom arope mííma dokom, irisinyo inam kídarem arope míítoka, demílomin, Abude ngokkíng dung, delokke ngo Abulo dung emla nolu kényéne delokke kangkén suyéne.”

³⁹Lekoda bulu bím umpe emla ito, idokom bí bulum gakko sumape runyok geto.

⁴⁰Delokrongem Jisu bí Joanke kerape baptis iko Jordan rotkonlo gígetoku. So bí duuto,

⁴¹delokke amie bojéko bíkkíng aato. Bulu pokai, “Joan bí irisinyo iyodem ibi madokom, Joanke sok amisok legangem ponam takamde aropage.”

⁴²Delokke delo amodelo bojéko Jisume arope míngkesuto.