Read Alladian JOAN 11 Bible Online

JOAN 11 - Alladian bible

JOAN 11

¹Depe iduem Lajar emnam amiko kito. Bí Bethani lokke kuai, de Mari kelang delokke bíkke bírme Marthake doolunge.

²Kila ketna Lajarke bírme, Mari bímin Ruutumme nampona tél pílumna delokke bíkke alem agí dumídlok molbínla inade.

³Dekepe ila bírme de Jisume sikepe agom políkto, “Ruutume nokke ayanam amide kidung.”

⁴Dem tayyédem Jisu bí poto, “De kinamde simo nyokmo pena kinammang. Shédíke Oolok angun ralnamem lengkan dope emla Shédíke angun ralnam legapemin dekepe idune.”

⁵Jisu bí Marthame delokke bíkke bírme delokke Lajarme ayadungai.

⁶Depe ilate Lajar bí kidung emnamem tatpala bí bíkke dungkolo loonyiko duupoto.

⁷Delokrongem bí bíkke luyilsuna kídíem poto, “Kaju Judialo enlangkupe.”

⁸Bulu poto, “Idola Poyilne, Judai ami kídíe nom elílok gepe ironge ool doomangada delokke depe ilate no delo enlat yékunía?”

⁹Jisu bí poyansuto, “Longe angune delo gonta íying kolang annyikope kamanía? Longem gína tanide tupsu mayé, kapeila bí sim tani amosokke angunlok kaadung.

¹⁰Bí yumelo gídung emmin tupsudune, legade bíkke angun kamang.”

¹¹Sim porongem bí potemla bulum poto, “Ngoluke angong Lajar bí ipkai; idakkom ngo delo bím urrep kakupe gídak.”

¹²Bíkkelo luyilsuna kídíe poyansuto, “Ruutume bí ipdumílo aisuyéku.”

¹³Jisu bí Lajarke sinamem potungai, idola bíkkíng luyilsuna kídíe ipgísupe ipdung emla mííto.

¹⁴Dekepe ikolok delo bí bulum berokpe pobito, “Lajar bí sikai,

¹⁵delokke noluke legape, nolu arope míngke sudope, ngokke delo duumang namdem ngo aipe míídung. Idokom bíkkíng ngolu gílaju.”

¹⁶Delokrongem Thoma (Diduma emlate mandung) bí luyilsuna abíd kídíem poto, “Ngolute bíkkíng sibo sudope gílaju.”

¹⁷Jisuke píídodem, bí Lajarme agolo loopikokai metubope kaato.

¹⁸Bethanide Jirusalem lokke mail annyiem píímangai,

¹⁹delo Judai ami kídíe bojéko Martha melang delokke Marime bínyike bíro nyoknam legape ngingkape aato.

²⁰Martha bí Jisu bí píídung emnamem tayyédem bí ríksupe gílento, idola Maridan ekumlo duuto.

²¹Martha bí Jisume poto, “Ruutume, no so duutua mílo, ngokke bíro si simaduape.

²²Ngo kéndung supakkom Shédí bí ingkuem no koyédí dem biyé.”

²³Jisu bí bím poto, “Nokke bírue gerepyéku.”

²⁴Martha bí poyansuto, “Yéyin longelo bí gerep yéku emla ngo kéndung.”

²⁵Jisu bí bím poto, “Ngomino gerep kunamelang turname. Séko ngom arope míngke suyédí bí sidokom turyé;

²⁶delokke séko turla ngom arope míngke suyédí bí edílokom simayé. No sim arope míídunía?”

²⁷Bí Jisume pokai, “E, Ruutum, nomin Kristo bí, tani amoso aapena Shédíke Ue emla ngo arope míídung.”

²⁸Delokrongem bíkke depe porongem, bí gílat sulangkula bíkke bírme Marime tompek suto. Bí poto, “Saar bí si dung delokke nom matadung.”

²⁹Mari bí dem tayyédelo, menang asak darepla bíkkíng aato.

³⁰Jisu bí supaklope delo doolung aradelo aamang ada, bí Marthame ríksuko amodelo yédungada.

³¹Marime ekumlo ponyi lunyila duuna Judai amikídíe Marike menarupe darepla gínamdem kaala, Mari bí agodelo gíla ankíem kabbom rííbom kape gídak emla mííla, bulute bíkkíng gímín geto.

³²Edílo Mari bí Jisuke yékodelo pííla delokke bím kaatodí, bí bíkke aledelo lebíng konídola pokai, “Ruutume, no so duutuamílo ngokke bírue simayai.”

³³Jisu bí Mari melang delokke bíkkíng gíbosuna Judai ami kídíete kapdope kaayédelo, bíkke aapílo ankíem jémge layimape ito.

³⁴“Ingkolo nolu bím yutone?” emla bí íngkíto. “Ruutume aala kaato langka,” emla bulu poyansuto.

³⁵Jisu bí kapto.

³⁶Delo Judai ami kídíe pokai, “Kaatola bí edítko bím ayatuane!”

³⁷Idokom bulu ayokone pokai, “Mingmana amiem migdar mokuna ami si sina ami sim asoope meyé langa?”

³⁸Jisu bí lekoda ankíe idola, agodelo aato. De goyabem líínelok longkapnam líípík kuai.

³⁹“Elídem longgéla metoka” emla bí poto. Sina ami delokke bírme Martha bí pokai, “Idakkom ruutume, supak namsinge ikabong, kapeila delo bí loopi napekai doodubong.”

⁴⁰Delokrongem Jisu bí poto, “Nolu arope míngke sumílo, nolu Shédíke angun ralnamem kaapayé emla ngo nolum pomanía?”

⁴¹Dekepe iname bulu elídem longgébito. Delokrongem Jisu bí kaadu sudola pokai, “Yayie, ngo nom koyiddung, no ngokke agomem tatto.

⁴²No agínpe agomem tatbidung emla ngo kénto, idola so dakna ami kídí sok ainam legape, bulu no ngom melíkne emla kéndope sim ngo podung.”

⁴³Sim Jisu bí porongem, bí bottepe “Lajare lento langku!” emla gokto.

⁴⁴Sina amide ale alagem, atuk mingmuem egelok yéllum namem deperung gelangala agolokke lentoku. Jisubí bulum poto, “Simang ege galugem laabín pala bím gímotoku.”

⁴⁵Delok legape Marime kangaana Judai amikídíe bojéko Jisuke inamem kaala, bím míngkesuto.

⁴⁶Idakkom buluke ayokone Pharisi kídílo gíla Jisuke inamem pokan bito.

⁴⁷Delokrongem ríne kídíelang Pharisi kídíe Baane kebangem gokdumsuto. “Ngolu ingkuemda idune? Si ami si deddína irisinyuem lengkandung.

⁴⁸Ngolu bím sikepe metímílo, mipil miyonge bíkkíng arope míngkesuyé, delokke delo Rom ami kídíe aabomla ngoluke among emlang ngoluke opínem laanyokyé” emla bulu pobosukai.

⁴⁹Delo buluke akon, delo dítag delo ríne ruutumpe ina Kaiapha emnamde pokai, “Nolu atí kénmang!

⁵⁰Tabung opíne nyok pemílo ami akone sige namde aiyadung emnamdem nolu kénsumang.”

⁵¹Bí agí míísa sulok sim pomang, idakla ríne ruutum isappe delo dítag delo Jisu bí Judai opín legape sipe aido emla bí polu poorto,

⁵²delokke delok opín petom delokke lega pemang idakkom rego regolo dunggoona Shédíke ome-oo kídí legape, bulum laadum sulangkula atel mokunam legape sigepe aido.

⁵³Dekepe ila delok longe delokke ilangala bulu bím mokape emla ruubomkai.

⁵⁴Delok legape Jisu bí Judai kídí kangkolo gíyimato. Bulum megeyéla bí mooruk among ayirlo, Ephraim emnam doolung kolo gínyok geto. Delo bí bíkkelo luyilsuna kídíem duubosuto.

⁵⁵Judai kídíke Gíbong adeng ape pííyédem, amie bojéko doolung lokke Jirusalemlo Gíbong gíídílo pídéésupe emla Jirusalemlo gíto.

⁵⁶Bulu Jisume matíbomto, delo kumkeng ekumlo dakdola bulu mipile pobosukai, “Nolu kape míídon? Bí Doman aranlo aama berok naya?”

⁵⁷Idokom ríne kídíe lang Pharisi kídíe séko Jisuke dungkuem paayédí, Jisume bulu umdope bí pokan bikupe aido emla agomem luyinto.