Read Alladian JOAN 13 Bible Online

JOAN 13 - Alladian bible

JOAN 13

¹Gíbong gíídí aníne. Jisu bí tani amosim mepakla delokke Abukelo gídíku longe píídak emla kénsuto. Tani amoso duuna agíke ami kídíem ayala, bí bulum agíke eerína ayangem lengkansuto.[24]

²Yume dotkéyem doduem, delo Simonke oo Judas Iskariot me uyue Jisume míírí míínyo dope meru líktubong.

³Abue takam atíem bíkke pauar gooralo meto delokke bí Shédí kelok aato delokke Shédí kelo gídakku emla Jisu bí kénsuto;

⁴depe iname bí dotké ekung delokke darepla, bíkke teyolo genam egem laabín sugeyéla, delokke bíkke ugíílo gamusako yétgeto.

⁵Depe irongem, bí ekulo asiem píkum pala bíkkelo luyilsuna kídí alem írbínla igeyéla bíkke yédgenam gamusalok dekedem molpítoku.

⁶Simon Pitorkíng bí aato. Pitor bí bím poto, “Ruutume no ngokke alem írbín dunía?”

⁷Jisu bí poyansuto, “Ngo ingkuem idudí nolu kénmang, idakkom méélamlo nolu kényéku.”

⁸Pitor bí “Demang, no edílokom ngokke alem arbín penamang,” emto. Jisu bí poyansukai, “Ngo nolum írbín mamílo, nolu ngokkelo gímín gelamayé.”

⁹Delokrongem Simon Pitor bí poyansukai, “Ngok ale petom emmang ngokke alagem delokke atugem írbín toyika!”

¹⁰Jisu bí poyansuto, “írsu rongem tanie agí ale petom emmin mosudune; bíkke amíl tabude deedung. Delokke nolu deedung idokom nolu takamemang.”

¹¹Kapeila séko bím míírí míínyo penade dem bí kénsuto, delokke dekepe ilamin mipilde deeyin mang emla potone.

¹²Buluke alem írbín rongem; bí egem gelangkula delokke agí dungkolo duutoku. “Ngokke noluke legape itonam agér sim nolu kéndonía?” emla bí bulum íngkíto.

¹³“Nolu ngom Saar delokke Ruutum emla gokdung, delokke de lujidung, kapeila derumin ngo.

¹⁴Supak ngo, noluke Ruutum delokke Saar bí noluke alem írbínto, nolukom akone akonke alem arbín mínsupe aido.

¹⁵Ngokke nolum ibinam kísape nolukom ipe aido emla kayii sukepe nolum lengkanto.

¹⁶Ngo nolum aruem podung, béérade sékote agí ruutumem botteyana kamang, delokke kotoki kídí dekom bím melíkna amidem botteyana kamang.

¹⁷Supak nolu sim atí kídísim kénkai, nolu sikesim imílo ayang igulem paayé.

¹⁸“Ngo nolum takamem pomang, ngokke ullennam kídíem ngo kénsudung. Idakkom si ngiitomem aromonape idung; ‘séko ngokke ettíngem dodune bí ngom mirupe aabomto.’

¹⁹Si atí si píímang adape ngo nolum supak pobidung, demílomin si atí si pííyém Ngomino Bí emla nolu arope mííyéne.

²⁰Ngo nolum aruem pobidung, séko ngokke melíknam taniem torík sududí ngomkom torík sudung; delokke séko ngom torík sududí ngom melík nemkom torík sudung.”

²¹Sikepe porongem, Jisuke aapí ainange genyinge ila bí pokanto, “Ngo nolum arope podung, noluke akonde ngom míírí míínyo lendak.”

²²Bíkkelo luyilsuna kídíde kaamín sudola sékomedí bí pobom dune emla mínggo regosukai.

²³Jisuke ayanam buluke luyilsuna akonde bím duupe sudola apim dobo sudungai.

²⁴Simon Pitor bí “Bím tatkítola, sékomedí bí mandune” emla luyilsuna amidem poto.

²⁵Jisuke keralo gubadola, Jisume “Ruutume, séko de amide?” emla bí íngkíto.

²⁶Jisu bí pobito, “Ngo ettíng oleko ekulo ningnyom pala bím biyé, bímin de amide.” Delokrongem ettíng oledem ningnyom pala bí dem Simonke oo Judas Iskariot me bisuto.

²⁷Judas bí ettídem doyéname Soitane bíkkíng angkai. “No ingkuem ipe míídudí menape ilangka,” emla Jisu bí bím poto,

²⁸idokom apim dobosuna kídíde sim kapeila bím potodí dem tatkénna kamang.

²⁹Judas bí murkong gadumem bomkolok, Doman aran legape ingkuem míítuadí dekedem redope demangkom opan kídíem atíko bidope, Jisu bí bím potuane emla ayokone mííto.

³⁰Judas bí ettídem doropagem gílenkai. Delo de yume kaamue.

³¹Bí gíroyédem Jisu bí poto, “Supakmin Tanike Ue Shédíke angun ralnamem bíkkelok lengkandune

³²Bíkkíng Shédíme yidge kumílo, Shédíkom agíke keralo bím yidgeyé, delokke menape bím yidgeyé[25]

³³Ngokke ome-oo kídía, ngo nolukíng anyongo komino duupoyéne. Nolu ngom matayé, delokke ngokke Judai kídíem ponam kísape, supak nolumte podung; ngo ingkolo gídakdí, delo nolu aalamayé.

³⁴Ngo nolum aní ngiitomko bidung. Nolu ayabosu langka. Ngokke nolum ayanam kísape nolute akone akonem ayang bosuruupe aido.

³⁵Nolu ayang bosumílo ami takame nolu ngokkelo luyilsuna kídíe emla kényé.”

³⁶Simon Pitor bí “Ruutume, no ingkolo gíyéne?” emla Jisume tatkíto. Jisu bí pobito, “Ngo ingkolo gídakdí supak nolu delo gímín gelamang, idakkom méélamlo gímín geyé.”

³⁷Pitor bí íngkíto, “Ruutume, ngo supak kapeila nokkíng gímín gela mayéne? Ngo nokke legape ngokke turnamem bisupe.”

³⁸Delokrongem Jisu bí poto, “No aropakpe nokke turnamem ngokke legape bisuyénía? Ngo nom aruem pobidung, peroge kokmang adape no ngom lengum kokai possuyé.”