Read Alladian JOAN 14 Bible Online

JOAN 14 - Alladian bible

JOAN 14

¹“Noluke aapíe míídír sumapeka. Shédíkíng míída sulangka; ngokkíng míída sulangka.[26]

²Ngokke Yayike ekumlo duupeko mílí idung. Ngo noluke dungkuem delo iruu bikape gídak. Depe imangamílo, ngo nolum pomayai.

³Delokke ngo gíla noluke dungkuem irung bimílo, ngo aalat langkula nolute ngokke dungkolo duudope nolum ngokkíng langaayéku.

⁴Ngokke gípeko among bedangem nolu kéndung.”

⁵Thoma bí Jisume pokai, “Ruutume, no ingkolo gídakdí ngolu kénmang, depeila kape kísa bedangem kényéne?”

⁶Jisu bí pobito, “Ngomino bedange, arue delokke turname. Séko kelokte Abu kelo aalamang, ngokke petom lokmin aaladune.

⁷Nolu ngom aropakpe kéntuamílo ngokke Abuemkom kényai.[27] Supak kelokke nolu bím kéndung delokke bím kaatobong.”

⁸Philip bí pokai, “Ruutume, Abuem ngolum lengkantola de ngolu kepe aidung.”

⁹Jisu bí poto, “Philip, nolum ngo deddíko yébosulate ngom no kénmanía? Séko ngom kaatodí bí Abuemkom kaato. Kapeila no ‘Abuem ngolum lengkantoi’ emkane.

¹⁰Ngo abulo dung delokke Abude ngokkíng dung emnamdem no kénmanía? Ngokke nolum ponam agom kídarde ngokke míídu sulokmang. De ngokkíng duuna agí agérem gérna, Abu suemin podune.

¹¹Ngo Abulo dung delokke Abue ngokkíng dung ngokke emnam agomdem ngom arope míítoka; demangkom hakiipe duusuna irisinyo kídíem arope míítoka.

¹²Ngo nolum aruem pobidung, séko ngom míngke sududí de ngokke inam atí kídíem iyé. Bí simpenem botteyana atí siriemkom ilayé, kapeila ngo Abu kelo gídakku.

¹³Nolu ngokke amínlok ingko ingkuem koyédí, dekedem ngo ibiyé.

¹⁴Nolu ingkona atíko ngokke amínlok koyédídem ngo biyé.

¹⁵“Nolu ngom ayadumílo, nolu ngokke polígem tatyé.

¹⁶Delokke ngo Abuem kobiyé delo nolum bí Igulpena konko nolukíng yéyar bosudope biyé

¹⁷de Shédíke aruem lengkanna Aide. Tani amonge bím torík sulamang, kapeila de bím kaapete kaamang delokke kénpete kénmang. Idola nolu bím kéndung, legade bí nolukíng duudung delokke nolukíng duuyé.

¹⁸“Ngo nolum opanpe memayé; ngo nolukíng aayéku.

¹⁹Tani amonge ngom kaayi pomayé, idola nolu ngom kaayé. Kapeila ngo turla dung delokke nolukom turla duuyé.

²⁰Delo longedelo ngo ngokke Yayi kíng dung, nolu ngokkíng dung, delokke ngo nolukíng dung emla nolu kénsuyéku.

²¹“Séko bulu ngokke ngiitomem bomla delokke dekedem igedudi, bímin ngom ayane. Séko ngom ayadudí bím ngokke Yayi bí ayayé, delokke ngote bím ayayé delokke agíem lengkan subiyé.”

²²Delokrongem Judas Iskariot me emmape, Juda bí pokai, “Idakkom, Ruutume, no kapeila agíem ngolum lengkan sudola tani amongem lengkan sulímane?”

²³Jisu bí Poto, “Séko ngom ayadudi, bí ngokke luyilem igeyé. Ngokke Abue bím ayayé, delokke ngolu bíkkíng aala lekope duubosuyé.

²⁴Séko ngom aya madudí bí ngokke luyilem igemang. Si noluke tatnam agom kídí si ngokke sumang, idola ngom melíkna Abukemin.

²⁵“Sim takam sim ngo nolukíng yébo sudungem poto.

²⁶Idakkom Abue ngokke amínlok melík penam igulna, Deena Aide takam atíem nolum poyilla delokke ngokke nolum potonam takamem kénsu moyéku.

²⁷“Yéponamem nolukíng ngo mebidung; ngokke dengomem nolum ngo bidung. Ngo nolum tani among sokke amie binam kísape bimang. Noluke aapí aange míídír sumapeka delokke pesomapeka.

²⁸Nolum ngokke ‘Ngo gínyo dakku delokke nolukíng aalat dakku’ emnamem tatto. Nolu ngom ayadumílo, ngokke Abulo gíku namdem ashépe mííyé, kapeila Abude ngom penem botteyane.

²⁹Ngo nolum supak atíe píímang adape pobi tobong, delomin atíde pííyém nolu arope mííyéne.

³⁰Ngo nolum deddíko luposudí kaimang; kapeila tani amosokke ruutume píídak. Ngokke teyolo bí atí ilamang,

³¹idokom ngo Abuem ayadung delokke ngo Abuke ngom ponam pakpe ibidung emla tani amonge kénperung aido. “Aatola supak kaju gílape.”