Read Alladian JOAN 15 Bible Online

JOAN 15 - Alladian bible

JOAN 15

¹“Ngomino onggur ane arode delokke ngokke Abu bí bagan ruutume.

²Bí ayé éémana ngokkíng duuna aagem pabíndung, delokke ayé ééna aag miyongem ayé bojéyape éédope ngébíndung.

³Ngokke nolum pobinam agomlok nolum ngékut tobong.

⁴Ngokkíng dunggap langka, delomin ngote nolukíng dunggap yéne. Aage agí agísue ayé ééna kamang; de anelo duuperung aido. Nolukom ngokkíng duumamílo ayé ééla sumang.

⁵“Ngomino onggur ane, nolu aag kídare. Tanie ngokkíng duula delokke ngo bíkkíng duumílo, bí ayém bojépe ééyé; ngokke kékondelo nolu atí ilamang.

⁶Séko ngokkíng duumadí, bí yoppaknam delokke sanpakna esing aag kísane, sikena aag kídíem uudumsula emelo yoplíkla rompakdo.

⁷Nolu ngokkíng duumílo ngokke agomekom nolukíng duudung, delo nolu ingkuem míídudí kolangka, nolum dem biyé.

⁸Nolu bojépe ayé éédope, nolu agíem ngokkelo luyilsune emla lengkan sunam demin ngokke Abuke angun ralnamde.

⁹Abude ngom ayala, ngote nolum ayadung. Supak ngokke ayalo duulangka.

¹⁰Nolu ngokke ngiitomem igemílo, ngokke Abuke ngiitomem igela bíkke ayalo duuyé.

¹¹Ngokke sim ponamde ngokke ashénge nolukíng duudope emla podung.

¹²Ngokke ngiitome si: ngokke nolum ayanam kísape ayabosu langka.

¹³Akone agí angong legape agí turnamem bisunam ayadem botteyana ayang kamang.

¹⁴Ngokke ngiitomem nolu tatmílo nolu ngokke angonge.

¹⁵Ngo nolum béérange emyimang, kapeila béérade agí ruutum lokke agérem kénmang. Dem megeyéla, nolum ngo angonge emdung, kapeila ngokke Abu kelok kénnam atí takamem nolum ngo kéndope lengkanto.

¹⁶Nolu ngom ullenmato, idola gígoola duuyar pena ayém énggedope ngomino nolum ullentone. Delokrongem Abue nolum ngokke amínlok konam takamem biyé.

¹⁷Mipile ayang bosulangka: simino ngokke ngiitome.”

¹⁸“Tani amonge nolum aknamde, kénsu langka de ngom kerape akname.

¹⁹Nolu tani among sokkepe ituamílo, si nolum agíke kísape ayasuyai. Idola nolu tani among kepe imang; idakkom ngomin nolum tani amosok tomlentune. Depe ilamin tani amonge nolum akdune.

²⁰Ngokke nolum ponam agom kídar sim kénsu langka; ‘Ingkona béérangete agí ruutumem botteyana kamang.’ Bulu ngom iréé tumílo, nolumkom irééyé. Bulu ngokke luyilem tattomílo, bulu nolu kemkom tatbiyé.

²¹Ngokke legalok bulu nolum sikepe iyé, kapeila ngom melíknem bulu kénmang.

²²Ngo bulukíng aala sikesim pobi matuamílo, bulu paab ajéng kamayai. Depe idokom supak buluke paabem mesam bimayé.

²³Ngom aknade ngokke Yayi mekom akdung.

²⁴Ngo buluke gooralo ami ikí manamem imatuamílo bulu paab ajéng kamayai. Idakkom bulu sim irisinyo kídar sim kaato, delokke depe ilate bulu ngomlang delokke ngokke Abuem neto.

²⁵Idokom si buluke Ayon kitablo atnam sim aromope emla ikai, ‘Bulu akgíng kamape ngom akto.’

²⁶“Edílo ngokke Abu kelok melík penam Igulpena, Abu kelok lenna aruem lengkanna Aidde pííyédí, delo ngok legangem hakii biyé;

²⁷idokom nolukom hakii biperung aiyé, kapeila nolu kerang lokkekai ngom yébosuto.”