Read Alladian JOAN 16 Bible Online

JOAN 16 - Alladian bible

JOAN 16

¹“Sim takam sim nolu míngkengem menyok sumadope emla ngo nolum pobito.

²Bulu nolum kumkeng ekumlokke monpakyéku, aropakpe nolum mokana amide, dekepe ikolok Shédíme agér ibidung emla míídíe píídak.

³Buluke sikepe ipenam legade bulu Abuem lang ngom kénmang.

⁴Edílo moodíe pííyédí ngokke nolum poto subinamem kényé kupe emla ngo nolum sim pobidung. Ngo sim nolum kerape pobi mangai kapeila ngo nolukíng yébosuto.”

⁵“Supak ngom melíknalo gídakku, depe ilate nolu sékote ngom, ‘No ingkolo gídakkune’ emla íngkína kamang.

⁶Ngokke sikesim pobikolok nolu ankí mílípe idung.

⁷Idakkom ngo nolum aruem pobidung; Ngo noluke ainam lega pemin gídak kune. Ngo gírong kumamílo, Igulna bí nolukíng aamayé; idakkom ngo gíkumílo, ngo bím nolukíng melík yéku.

⁸Edílo bí pííyédí, delo bí tani amongem delokke bisarnam legangem kénsu moyéku.

⁹Bulu paab imemdung, kapeila bulu ngokkíng míngke sumang;

¹⁰bulu yéjipekuem ibuldung kapeila ngo Abulo gídakku delo nolu ngom kaayi mayé;

¹¹delokke bulu bisarem imemdung, kapeila tani amosokke ruutumem bisar tubong.

¹²“Ngo nolum bojéko pobo pename kadungai, idola supak nolu sim dongge lamayé.

¹³Idakkom aruem lengkan pena Aide pííyém, bí takamem arolo gíboyé. Bí agí míídusulok pomayé; bíkke tatnam petomem pobiyé.

¹⁴Bí ngokke pena atíem laala delokke nolum dem lengkanla ngom yidgeyé.

¹⁵Abuke duubomnam takamde ngokke. Depe ilamin Aide ngokkelok atíem laala delokke nolum lengkanyé ngo emdune.

¹⁶“Anyongko dootomílo nolu ngom kaapoyimayé delokke anyongko doorongem nolu ngom kaapayéku.”

¹⁷Bíkkelo luyilsuna kídíe ayoko pobosuto, “Bíkke ‘Longe ayoko nolu ngom kaayimayé idola delokke méélamlo longe ayoko ngom nolu kaapayéku’ delokke ‘Kapeila ngo Abulo endakku’ emnamde ingkuedí?

¹⁸Bulu ‘Longe ayoko emnamde ingkuedí?’ emla íítíkai. Bí ingkuemdí pobo dungane ngolu tatkénmang,” emto.

¹⁹Bulu dem tatkí línamdem Jisu bí kénto, depeila bí bulum pobito, “Ngokke ‘Longe ayoko nolu ngom kaayimayé idola méélamlo longe ayoko nolu ngom kaapayéku’ emnamde ngo ingkope mííla potuadí dem nolu mipile ííbo sudunía?

²⁰Ngo nolum aruem pobidung, tani amonge ashé dungem nolu kapla rííla delokke ankí kenue iyé. Nolu ankíe idokom noluke ankíde ashélo aayéku.

²¹Koo ona mime okii kido kapeila bíkke odíe píídung; idakkom bíkke koo dem orongem duugem kénsu yimang kapeila tani amoso koo ko olento emla bí ashédung.

²²De nolu kelokom kadung; supak noluke buulínge idíe, idokom ngo lekoda nolum kaayéku delo nolu ashéyé, delokke sékote noluke ashéngem laabín lamayé.

²³Delo longedelo nolu ngom atí koyimayé. Ngo nolum aruem pobidung, ngokke Abue ngokke amínlok konam takamem nolum biyé.

²⁴Supaklope nolu ngokke amínlok atí komang. Kolangka delo nolu paayé, delo noluke ashénge apííyé.

²⁵“Ngo luyii sunamlok nolum poboto. Idakkom ngo sikena agomlok poyimape pobidíe píídak.

²⁶Delo longe delo nolu ngokke amínlok koyé. Ngo noluke legape Abukelok kobiyé emmang.

²⁷Demang, Abu bí agíe nolum ayasudung kapeila nolu ngom ayato delokke ngom Shédí kelok aane emla arope míngkesuto.

²⁸Ngo Abukelok aala delokke tani amoso pííto; supak ngo tani among sim gínyo langkula Abukelo endakku.”

²⁹Delokrongem Jisukelo luyilsuna kídíe poto, “Supak no luyii sunamlok pomape jonnampe podung.

³⁰Supak no takamem kénsudung delokke sékote nom agom íngkí penam kayimang emla ngolu kaadung. Si no Shédí kelok lennako emla ngolum arope míímotung.”

³¹“Nolu supak míngke sudunía!” emla Jisu bí poyansuto.

³²“Idakkom nolu mipile agí ekumlo dukpan sudí longe píídak delokke píngkabong. Nolu takame ngom petom mepala gínyoyé. Depe idokom ngo, ngo petommang, kapeila ngokke Abue ngokkíng duumíndung.

³³Ngokkíng nolu yéponamem paadope emla ngo sikesim nolum podung. So tani amoso nolu ebín paadung. Idakkom aange edíí langka! Ngo tani amongem ikum tobong.”