Read Alladian JOAN 19 Bible Online

JOAN 19 - Alladian bible

JOAN 19

¹Delokrongem Pilat bí Jisume gakla demmoto.

²Sipaying kídíe taanglok ponam dumlupko bíkke dumpo delo luplíkto. Bulu bím yalína egeko píllík pala

³bíkkíng lennyi lengum gínínla, “Judai kídíke Roje duuyar langka” emla manto. Delokrongem bulu bím mingmolok kítto.

⁴Lekoda Pilat bí gílen langkula Judai amikídí dem pokai, “Kaatola, ngo bím ajéng gakket penam kaapamang emnam dem nolu kényépe emla nolukíng bím bomlen bidungku.”

⁵Edílo Jisu bí taang dumlub emlang delokke yalína egem gela lentodí, delo Pilat bí bulum poto, “Sina amide!”

⁶Ríne kídí elang delokke buluke kotoki kídíe bím kaayédem, bulu, “Bím pansaatoka! Bím pansaatoka!” emla bottepe manbomto. Idakkom Pilat bí poyansukai, “Nolu bím bomla pansaatoka. Ngokke pedan ngo bím edo luket penam atíyang kamang.”

⁷Judai ami kídíe lutí bomkai, “Ngoluke ayonko kadung, delokke delok ayon delok lumílo, bí siperung aiyé, kapeila bí agíem Shédíke Ue emsudung!”

⁸Pilat bí dem tayyédelo, bí mangkam yape pesokai,

⁹delo bí agí dungko aradelo aatoku. “Ingkolok no aatone?” emla bí Jisume íngkíto, idola Jisu bí agom poyan subimang.

¹⁰“No ngom pobi pemang idunía?” emla Pilat bí poto. “Nom melen kupenam demangkom pansaanam pauarde ngokke alaglo dung dem no kénmanía?”

¹¹Jisu bí poyansuto, “Nom teyong telok binako kamangamílo, no ngokke teyolo pauar kamayai. Delok legape ingko amiedí ngom nokkíng melíktune bí nompenem paab ajéng kayadung.”

¹²Delokke ila, Pilat bí Jisume melenkupe emla ralkítuai, idola Judai kídíde tayyémpe, “No sim ami sim melen kumílo, no Kaisarke angomang. Séko agíem Roje emsududí de Kaisarme akne,” emtí bomkai.

¹³Pilat bí dem tayyédem, bí Jisume bomlen bido langkula elínglok pínam bisarko dungkolo dungangkai. Dungkeng elíng dem Aramaik agompe “Gabbata” emdung.

¹⁴De Gíbong gíídí hoptalok iruudí longelok longe raadang kuai. “Sina noluke rojade” emla Pilat bí Judai ami kídíem pokanto.

¹⁵Idakkom bulu, “Bím gígééboto! Bím gígééboto! Bím pansaatoka!” emla goktí bomto. “Ngo noluke rojem pansaapía?” emla Pilat bí tatkíto. “Ngolu Kaisarke kékonlo rojayang kamang,” emla ríne kídíe manto.

¹⁶Méélam yalumdem Pilat bí Jisume pansaayépe emla ami kídí delo melíkto. Dekepe iname sipaying kídíe Jisume gíboto.

¹⁷Bí kross em joobomsula Tuklong (Aramaik agompe Golgotha) emnam amodelo gílento.

¹⁸So bím pansaato delokke bíkkelo lekope midum annyiko itaksuto. Annyidem kereng eelenlo delokke Jisume raadalo ila pansaato.

¹⁹Pilat bí kakotko atla kross delo pítket líkmoto. De sikepe dakkai, NAJARETH LOKKE JISU, BÍ JUDAI KÍDÍKE ROJE.

²⁰Judai ami kídíe bojéko dem porito, kapeila Jisume pansangko amode, taonlokke mongnyo dungai, delokke dem akordem Aramaik loklang, Latin loklang delokke Grik agomlok atla metung.

²¹Judai ami kídílokke ríne kídíe Pilatme, “‘Judai kídí lokke Roje’” emla atmapeka, emla luyatuai, idakkom, “ ‘Si ami si agíe Judai kídíke Roje emsuto.’ ”

²²Pilat bí “Ngo ingkuem attodí attobong” emla poto.

²³Edílo sipaying kídíde Jisume pansaatodí, delo bulu bíkke ege galugem laala, tarong appikope pétpan sula, aranglo genamem megeyéla mipile abor atelpe orsuto. De galukde ommape, teyolokke ila tabungem atelkope sumnamkuai.

²⁴“Sim bétmangkom” emla bulu manbosuto. “Sim séko paayédí dem luturi solape,” embosuto. Si sikepe atnam Dooying kitab agomem aromope emla idung. “Bulu ngokke egem buluke aralo orsuto delokke ngokke galuk legape luturi soto.” Dekepemin sipaying kídíe itone.

²⁵Kross aníndelo bíkke anedela, bíkke anelokke bírme, Klopake méng Mari bí delokke Mari Magdalini bulu dakdo.

²⁶Jisu bí agí ane dem bíkke ayanam luyilsuna delo dakmín dope kaayédem, bí agí anedem poto, “Ayanam ane simoko nokke ue.”

²⁷Delokke luyilsuna delo “Sina nokke ane” emto. Delokke ila si luyilsuna si anedem bíkke ekumlo gíbotoku.

²⁸Méélamdem, Dooying kitabem aro modope takamem iyinkai emnamdem kénsula Jisu bí “Ngo asi tíílínge” emto.

²⁹Delo onggur alanglok píbíínam edungko dungai, depe iname bulu aséklok siipyak konem onggur alanglo ningnyom líkpala hissop esing aag kolo siipyakdem iklíkpala Jisuke nappalo leesato.

³⁰Dem tíípala Jisu bí “Si apíngkai” emla manpala delo bí dumponge belgípla aapíe bínkai.

³¹Depe idudelo de iruu saarudí longe, delokrongem longe konde Sabbath longe kootíre. Kapeila Judai ami kídíe Sabbath longelo, simadem krosslo melíkmang; iname bulu aledem dírpala simadem laayipe emla Pilatkíng roguto.

³²Depe iname sipaying kídíe aala Jisukíng pansang itak sunam kerangke amidem alem dírto delokrongem akon demteng depe ito.

³³Idokom Jisukíng aala bulu bím sidope kaayédelo, bulu bíkke alem dírmato.

³⁴Dem megeyéla sipaying akonde gínínglok Jisuke ínmo delok níkkéla iname delo iyyie lang delokke asie biilento.

³⁵Sim séko amie kaatodí, bí hakii bito, delokke bíkke hakiide arodung. Bí aruem podung emla kénsudung, delokke nolu arope míngke suyépe emla bí hakii bidung.

³⁶Dooying kitab agome aronape sikepe ikai: “Bíkke alongem atel kokom dírmayé,”

³⁷delokke angu konlo Dooying kitabe podung, “Bulu buluke níkkénam amidem kaasuyé.”

³⁸Méélamdem Arimathialo duuna Joseph bí Pilat me simang legape ami kénmadope roguto kapeila bí Judai ami kídíem pesoto. Pilat bí tolík kolok bí aala simadem laato.

³⁹Bím leko bosunade, kerape yumelo Jisukíng aana ami, Nikodim bí. Nikodim bí mirrh loklang aloeslok [28] iyélsunam kilogram íying angum kolang appikope bomato.

⁴⁰Jisuke simangem laala annyide kési képalok líkla egelok yétkomto. De Judai kídílokke yunam ayone depe idungai.

⁴¹Jisume pansangko amodelo, baganko dungai, delokke sékomete yukí mangko ago aníko dungai.

⁴²De Judai kídíke iruu saarudí longekuai delokke agode anínkolok bulu Jisume delo yuto.