Read Alladian JOAN 2 Bible Online

JOAN 2 - Alladian bible

JOAN 2

¹Longum nanalo Galil lokke Kanalo nyamranko ito, Jisuke ane delo duuto,

²delokke Jisu melang bíkkíng luyilsuna kídí emte nyamran delo tomaato.

³Onggur alangem tííyin rongem, Jisuke anede bím pokane, “Bulu onggur alang kayimang” emto.

⁴Jisu bí poyansuto, “Ayanam ane, no ngokke legape kapeila míítídune? Ngokke moodíe píímangada.”

⁵Bíkke anede béérang kídíem poto, “Bí ingkuem poyédí depe ibitoka.”

⁶Judai kídíke arbín sunam dormo niyom inana gallon íying annyi lokke ila íying angumna asiem mekeng kédeng peking akkéko kato.

⁷Jisu bí béérang kídíem poto, “Kédeng peking kídíem asilok píbíítoka,” delo bulu depe iname dem alíílo bíídope purbííto.

⁸Delokrongem bí bulum poto, “Supak dem tupla nyamran atolo bomang bitola.” Bulu depe ibito,

⁹delo nyamran atode onggur alangpe ikuna asidem ikangkíto. Asi bomna béérang kídíde dem kéntuakom, bí dem ingkolok ilentodí dem kénmato. Delokrongem bí makbodem tompek supala,

¹⁰pokai, “Mipile kedíkna alang emmin orpodune delokrongem mibo kídíe tíngír surongem kedík mayana alangem ordo; idakkom nodan supaklope kedík nemte metungada.”

¹¹Si kera yalumpe, Galillokke Kanalo Jisuke irisinyo iyod iboname. Bí dekepe bíkke angun ralnamem lengkanto, delokke bíkkíng luyilsuna kídíe bím míngke sukai.

¹²Sok méélampe bí bíkke anemlang, bíro kídí emlang bíkkíng luyilsuna kídíem gíbosula Kapernaumlo gíto. Delo bulu loonyi longumko duuto.

¹³Judai kídíke Gíbong gíídíe pííyébong iduem, Jisu bí Jirusalem lo gíto.

¹⁴Kumkeng Ekum gooralo ami kídíe gooru sobénem delokke parongem kola delokke ayokone tébullo duula abal líkpésula idope bí kaato.

¹⁵Depe ila bí sotkyalok boyikpe mola, kumkeng ekum delok takamem, goorudak delokke sobéndak monpak toku; bí abal líkpe sunemte abalem kuppak bila delokke buluke tébul kídarem kuppak bito.

¹⁶Parong kona kídíem bí poto, “Sikesim sokke bomgétoku! Ngokke Yayike ekumem pesikoret mokepe inamem nolu igotmanía?”

¹⁷Bíkkíng luyilsuna kídíe sim atnam sim míípa sutoku, “Nokke ekumlo erbomnamde ngom dosuyéku.”

¹⁸Delokrongem Judai amikídíe ííto, “Si tabung sim inana nokke ralnamem kangkepe ingkona irisinyo iyodem no ngolum lengkan ladon?”

¹⁹Jisu bí bulum poyansuto, “Sim kumkeng ekum sim bénpaktoka, delo ngo sim longum aralo morepyéku.”

²⁰Judai kídíe poyansuto, “Sim kumkeng ekum sim modungem takying appi kolang takkéko ilíkto, delo nodan longum aralo sim modak kunía?”

²¹Jisu bí agíke amíl kumkeng ekum legasuem potuai.

²²Bím sikolokke kiirep rongkuem méélamdem bíkkíng luyilsuna kídíe bíkke ponam sim míípang sutoku. Delo bulu. Dooying kitabem delokke Jisuke ponam agom kídar sim arope míítoku.

²³Gíbong gíídílo Jirusalemlo bíkke duudungem, bíkke inam irí sinyo iyodem bosi borang amie kaala bíkke amínem arope míngkesuto.[6]

²⁴Idokom Jisu bí agíe bulukíng míída sumato, kapeila bí ami takam aapíem kényinto.

²⁵Ami legangem bím pobi penam kamang kapeila bí amie kapenedí dem kényinto.