Read Alladian JOAN 20 Bible Online

JOAN 20 - Alladian bible

JOAN 20

¹Hoptalokke kerayalum longe delo rokomope, kaamo dungadape Mari Magdalini agodelo gíla kaaname goyab delokke elíngem loopaktuupe kaato.

²Dekepe iname bí Simon Pitor kílang Jisuke ayanam luyilsuna akondelo dungaala pokai, “Bulu Ruutumme agolokke leenyok bomkai, delokke bulu bím ingkolo metudí dem ngolu kénmang!”

³Dekepe iname Pitorlang delokke akon luyilsunade agodanpe lento.

⁴Annyide dukkai, idakkom luyilsuna akonde Pitorme dukpoola agodelo kerape píípooto.

⁵Bí gubadola delo maayét ege títnam kídíem kaato idokom aralo aamang.

⁶Delokrongem Simon Pitor bí bíkke méélampe duknade, pííla ago aradelo aato. Bí delo maayét ege títnam demlang

⁷Jisuke dumponglo yétlík tuanam egedem doodope kaato. Dumponglo yétlík tuanam egede maayét ege títnam delo lekope doomape, kella dongusudo.

⁸Méélam yalumdem luyilsuna akon, agodelo kerape píípong nadete, aralo aato. Bí kaala arope mííto.

⁹(Bulu deloope Jisu bí sikolokke gerepyéku emnam Dooying kitab agomdem kénmato.)

¹⁰Delokrongem Luyilsuna kídíde agí ekumlo gílat sutoku,

¹¹idola Mari bí luyulo kapla duuto. Bí kapla, agodem kaape emla gubato

¹²delo yalune ina teyong kotoki annyiko, akone dumpong danlo delokke akone aledanlo ila, Jisuke simang dongko delo duuto.

¹³Bulu mimedem pokai, “Mime, kapeila no kapdune?” Mimede poto, “Bulu ngokke Ruutumme laanyokto, delokke bulu bím ingkolo yutodí ngo kénmang.”

¹⁴Delo bí ngéngkut sukuname Jisume delo dakdope kaato, idola bí de Jisu bí emla kénmato.

¹⁵Bí pokai, “Mime, no kapeila kapdune? Sékome no matadune?” Amide bagan inako emla mííla, bí pokai, “Saare, no bím bomnyok tokumílo, ingkolo no bím leetone ngom pobika, delo ngo bím langkupe.”

¹⁶Jisu bí mimedem “E, Mari” emto. Mimede bíkkídan pela dolangkula Aramaik agomlok kapdola pokai, “Rabbuni” (depe emnamde luyilne), emto.

¹⁷Jisu bí poto, “Ngom gakkí mapeka, kapeila ngo Abukelo enku mangada. Dempenem ngokke bíro kídílo gíkala bulum pobitoka, ‘Ngo ngokkelang noluke Abu, ngokkelang noluke Shédí kelo endakku.’ ”

¹⁸Mari Magdalini bí sim gelangala luyilsuna kídílo gítoku: “Ngo Ruutumme kaato!” Delo bí Jisuke ponam kídarem bulum pokan bitoku.

¹⁹Hoptalokke kerayalum longe delokke adeng delo, luyilsuna kídíe Judai kídíem pesola eyabem yapkar supala duudum sudungem, Jisu bí aala delo buluke gooralo dakdola pokai, “Yéponame nolukíng duulangka!”

²⁰Depe porongem bí bulum bíkke alagemlang ínmuem lengkansuto. Ruutumme kaala luyilsuna kídíde ashérunge ito.

²¹Jisu bí bulum poto kukéng, “Yéponame nolukíng duulangka. Abue ngom kape melík todí, ngo nolum depe melíkdung.”

²²Delokke delo bí bulum ngayab dakla poto, “Deena Aidem laarík sulangka.

²³Nolu akonke paabem maabmílo, dem maab bidung; nolu dekedem maab mamílo, dem maab bimang.”

²⁴Supak Thoma (Diduma), midum íying kolang annyi lokke akonde, Jisuke aadodelo luyilsuna kídí delo duumangai.

²⁵Edílo luyilsuna abídde, Ruutumme ngolu kaato emla pobitodí delo bí poyik sukai, “Ngo gojal pítko alagem kaasu madem delokke gojal pítko delo ngokke lakkénge sutkí madem, delokke ngo bíkke ínmo danlo níkké kuem ukkí sumadem, ngo dem aro míímang.”

²⁶Hoptako doorongem bíkkelo luyilsuna kídíde ekumdelo duutoku, delo Thomakom bulukíng duubosuto. Eyab kídíem yapkarla melateng, Jisu bí aala buluke gooralo dakdola poto, “Dengome nolukíng duulangka!”

²⁷Delokrongem bí Thoma me luto, “Nokke lakkénge so sutkítola; ngokke alagem kaatola. Nokke alage ngokke ínmoso ukkítola. Mííne míngo yimape míngke sulangka.”

²⁸Thoma bí Jisume pokai, “Ngokke Ruutum delokke ngokke Shédí!”

²⁹Delo Jisu bí bím poto, “No ngom kaasu kolokmin no míngke sukane; ngom kaasu mapete míngke suna kídí demin gérne.”

³⁰Jisu bí bíkkelo luyilsuna kídí keralo bojéko abíd abíd irisinyo iyodem ibito, dekedem so kitabso atmang.

³¹Idola sikesim atgade Jisu bímin Kristo, Shédíke Ue, emla nolu míngke suyépe emla, delokke dekepe míngke sukolok nolu bíkke amínlok turnamem paadope emlamino attune.