Read Alladian JOAN 21 Bible Online

JOAN 21 - Alladian bible

JOAN 21

¹Méélamdem Jisu bí lekoda Tiberia siyénglo[29] bíkkelo luyilsuna kídílo lengkan sutoku. De sikepe ikai:

²Simon Pitor, Thoma (Diduma emlangkom mandung), Galillo duuna Kana doolung lokke Jebedike oo Nathanael delokke luyilsuna annyiko, bulu yébo sudungai.

³“Ngo engo kungkape gídak” emla Simon Pitor bí bulum poto. Delo bulu poto, “Ngolu nom gíbosuyé.” Dekepe iname bulu gílenla etkulo rengaato, idakkom delo yumedelo bulu atírung paamang.

⁴Rokomope, Jisu bí rotkon delo dakto, idakkom luyilsuna kídíde bí Jisu emla kénmato.

⁵Bí bulum tomlen dola poto, “Angong kídíe, nolu ngopil atelkote paamanía?” “Ma, paamang” emla bulu poyansuto.

⁶Bí pokai, “Noluke esabem etku delokke lakbík danpe eltola delo nolu ayoko paayé.” Bulu ponampe iyédem, enguem deddíko kuula iname hosat layimape ito.

⁷Delokrongem Jisuke ayanam luyilsuna akonde Pitorme poto, “Si Ruutum mino!” Simon Pitor bí “Si Ruutum mino” emrongem bí agí teyolo genam egedem yédge pala (kapeila bí dem kerape laapak sutuai) delo asi delo yoplíkto.

⁸Abíd luyilsuna kídíete etkulok enguem esab bíínako solenla, moopí danpe mamín geto. Bulu moopí lokke mooteng mangai, de mitar língko petomko mootenge iduai.

⁹Edílo bulu delo lentodí delo bulu mekollo engoko baatupe delokke ettíngeke ayoko kaato.

¹⁰Jisu bí bulum poto, “Noluke supakke umnam engo ayoko bomatola.”

¹¹Simon Pitor bí etkudelo rengadola esabem luyulo solento. De língko kolang íying pilngo kolang angumko engo bottena mílí ido, deddípe ilate esabde bédmang.

¹²Jisu bí bulum pokai, “Aadum sutola dolape.” Luyilsuna kídíde sékote bím, “No séko” emla íngkí latomang. Bulu Ruutum bí emla kénto.

¹³Jisu bí aala, rotiem laala delokke dem bulum bito, delokke dekepe engo demte ito.

¹⁴Si lengumnape Jisuke bíkkelo luyilsuna kídílo, bíkke sikolokke gerep rongkuem lengkan suname.

¹⁵Edílo bulu donamem doyintodí, delo Jisu bí Simon Pitorme poto, “Joanke oo Simon, no sike simpemílo aropakpe ngom ayang yadunía? “Ruutum ngo nom ayadung” emla bí poyansuto. Jisu bí pokai, “Ngokke mérbéno kídíem usaa langka.”

¹⁶Lekoda Jisu bí pokai, “Joanke oo, Simon, no ngom arope ayadunía?” Bí poyansukai, “E, Ruutum, ngokke nom ayanamem no kénsudung.” Jisu bí pokai, “Ngokke mérbeno kídíem kaabom langka.”

¹⁷Lengum nape bí bím pokai, “Joanke oo Simon, no ngom ayang dunía?” Pitor bí ayéme emla míngkai kapeila Jisu bí bím lengumnape “No ngom ayadunía” emla íngkíto. Bí poto, “Ruutume, no takam atíem kénsudung, ngokke nom ayanamem no kénsudung.” Jisu bí poto, “Ngokke mérkídíem usaa langka.

¹⁸Ngo nom aruem pobidung, nokke yaamé dungem no leemosula nokke gípe míngkolo gítuai; idakkom nokke mijii yékuem nokke alage toka suyéku, delokke akone nom leemo líkla nokke gípe míímang kolo gíboyéku.”

¹⁹Jisuke sikepe ponamde kape Pitor bí sigela Shédíme yidge yédí dem lengkan nape poto. Delokrongem Jisu bí Pitorme, “Ngokkíng gímín gelangka!” emto.

²⁰Pitor bí pelkut sudo langkula kaatoname Jisuke ayanam luyilsuna akonde bulukíng gímín gedope kaato. (Akonde apim dobo sudungem geeton dola “Ruutume, séko nom míírí míínyo penade?” emna amide).

²¹Pitor bí Jisume kaayé delo, Jisume bí íngkíto, “Ruutume sok amisok legange kapedí?”

²²Jisu bí bím pobito, “Ngokke angkumang tetengem bí turla duupo yépe emla ngo míímílo de nokkepe ingkokone? Ngokkíng gímín gelangka!”

²³Sok legalok, bíro kídí aralo si luyilsuna si siyi mayé nayike emla agom agome lento. Idokom Jisu bí bím siyimayé emmangai; “Ngo bím ngokke aalat kumangem turla duuyépe emla míímílo, de nokkepe ingko kone?” emlamin bí potone.

²⁴Si luyilsuna simin sim atí takam sim hakii bitone delokke dekedem kakotlo atnade; delokke bíkke ponamde arodung dem ngolu kéndung.

²⁵Jisu bí abíd abíd atí kídíemkom ikantuai. Takamdem atyin amílo, ngo míngkíname, tani among tabung sote atnam kitabe mepeko kayimayai.