Read Alladian JOAN 3 Bible Online

JOAN 3 - Alladian bible

JOAN 3

¹Depe iduem Pharisi ami Nikodim emnamko, Judai amilokke solaina kebang ruutumko kato.

²Yoh konem bí Jisukíng aala poto, “Saare, nom Shédí kelok aana luyilbonako emla ngolu kéndung. Legade Shédí bí duumín gemamílo nokke inam kísana irisinyo iyod kídarem sékote ilana kamang.”

³Jisu bí poyansula poto, “Ngo nom aruem pobidung, tanie lekoda olat suku mamílo,[7] Shédíke amongem kaapa mayé.”

⁴“Tanie mijii rongem kape kísa olat suyékun?” emla Nikodim bí íngkíto. “Berokrupe bí olat sukupe emla ane kiiralo lennyinape aalang kumayé!”

⁵Jisu bí pobito, “Ngo nom aruem pobidung, tanie asiloklang Aidlok oku mamílo, Shédíke amolo aala mayé.

⁶Adínlok onamde adíne delokke Aidlok onamde aide.

⁷Ngokke nom ‘Nolu olat sukurupe aido’ emnam agom sim no arí anyope míímapeka.

⁸Asare agí míngkolok muddo, sokke muddudem no taddung, idakkom de ingkolok mudadudí demangkom ingkolo muddakdí no polamang. Dekepemin Aidlok okunam mipile idune.”

⁹“Kape kísa depe iyéne?” emla Nikodim bí íngkíto.

¹⁰Jisu bí poto, “No Israel ami kídíem luyilne idola no sim atí kídí sim tatkén manía?

¹¹Ngo nom arope pobidung, ngo ingkuem kéndudí dem podung, delokke ngoluke kaato namem ngolu hakii bidung, idakkom no ami no ngoluke hakiiem torík sumang.

¹²Ngo tani amosokke atí legangem nom pobidung, idola no aro míímang; demílo kape kísa ngo teyong legangem pomílo no arope mííyéne?

¹³Teyong telok aana Tanike Oo[8] kékondelo sékote teyong amolo gíkína kamang.”

¹⁴Mosi bí mooruk amolo arem peking adínlok pínam tabíem aséklok tungonnam kísape Tanike Uem bomon rupe aiyé;

¹⁵delo bím arope míngkesuna mipile turyar namem paayéku.

¹⁶Kapeila Shédí bí tani amongem yagorupe ayangkane, séko Jisume arope míngke suyédí bí nyokmadope, idakla turyarnamem paadope emla bí agíke Oo atelem bingumsuto.

¹⁷Legade Shédí bí tani amongem bisar dope emla bíkke Oo atelem melíkmang idola Bíkkelok mosingkupe emlamin melíktone.

¹⁸Séko arope míngke suyédí bím bisarmang, idakkom séko arope míngke sumadí bím bisar tubong kapeila bí Shédíke Oo atel amínem arope míímato.

¹⁹Bisar igade sikepe idung; Angune tani amoso pííto, idokom tani kídíe angun empemílo kaamuem mííyato kapeila buluke inam saanamde atímang.

²⁰Atímape ina amide angunem kanggot dung, delokke bíkke inam saanamem kénpelo emla pesuem angunlo anggemang.

²¹Idola séko arolok yédudí, de bíkke inam saanamde Shédí kelok lenne dem apíípe kaabedope emla angunlo aadung.

²²Sok méélampe, Jisulang bíkkíng luyilsuna kídíe Judia doolung danpe gígooto, delo bulum bí oolko yébosula irongem baptis isuto.

²³Delo Joanteng Ainon doolulo Salim anínlo amiem baptis ila yéduai, kapeila delo asi mílí kato, delokke ami kídíe baptis isupe emla aatíto.

²⁴(Dekepe idodelo Joanme pateklo líkmangada).

²⁵Joankelo luyilsuna kídí elang Judai amiko dormolo pídéésunam legalo akmínsuto.

²⁶Bulu Joankíng aala poto, “Saare, Jordan rotkonlo nokkíng yémín gena nokke ainako emla yidnam amide baptis idung delokke takame bíkke danpe gídung!”

²⁷Sim Joan bí poyansuto, “Tanie teyong telok binam petom emmin paadune.

²⁸‘Ngo Kristomang,[9] idola bíkke kerape mege name’ emla ngokke ponamem nolu hakiipe yége sudung.

²⁹Nyamede makboke. Makbuem igulna ajonde makbuem igulla delokke bím tatbidung, delokke makbo agom adudem tayyém bí ashérunge idung. De ashéde ngokkíng dung, delokke supak de apíngkai.

³⁰Bí botte yaperung aido ngo amé yaperung aido.”

³¹Séko teyong telok tokdudí bí takamem botte yalumne, séko among sokkepe idudí bí tani amongke delokke tani among legangem podung. Séko teyong telok tokdudí bí takamlokke kedon yane.

³²Bí bíkke kaanam tatnamem hakii bidung, idakkom sékote bíkke hakii binamem torík sumang.

³³Sim toríksuna tanide Shédí bí aronako emla kéndung.

³⁴Kapeila sékom Shédí bí melík dudí bí Shédíke agomem tatdung; bím Shédí bí Aidem birí kayimape bidung.

³⁵Abue Uem ayadung delokke atí takamem bíkke teyolo melíkdung.

³⁶Séko Uem arope míngke sududí bí turyar namem paadung, idola séko Uem tomadudí bí turnamem paamayé, kapeila Shédíke aklínge bíkkíng duuyé.