Read Alladian JOAN 4 Bible Online

JOAN 4 - Alladian bible

JOAN 4

¹Joanme bojéyape Jisu bí luyilsuna kídíem baptis idung emnamdem Pharisi kídíe tatto,

²Aropaklok poyém baptis inade Jisu mangai, bíkkíng luyilsuna kídí emin itone.

³Ruutum bí dem tayyédem, bí Judia dem megeyéla Galil lope lekoda enlat toku.

⁴Depe iduem bí Samari gooralok gípe nampe ikai.

⁵Dekepe iname bí Samarilokke Sukar emnam taonkolo, Jakobke agí oo Josephme binam among anínlo aato.

⁶Jakobke deerung aside delo dungai, delokke Jisu bí bedang enngasula apééyé ila, deerung ampedelo duunosuto. De longe raadange.

⁷Samari mimeko asi tuppe emla aana konem Jisu bí sikepe poto, “No ngom asi tíípe namko biyédí?”

⁸(Bíkkelo luyilsuna kídíe taonlo donam rekape gíkai.)

⁹Samari mimede bím poto, “No Judai amiko delokke ngodan Samari mimeko. No kape kísa ngom asi tíípe namko kodune?” (Legade Judai ami kídíe Samari ami kídíem dorík tíírík sumangai.)[10]

¹⁰Jisu bí bím poyansuto, “No Shédíke bisamnam amanem delokke nom tíípenam asi konasi sékodí dem kéntuamílo, no bím koyai delokke bí nom turgenam asiem biyai.”

¹¹Mimede pokai, “Saare, nokke tupnana kamang delokke deerung asi si eerídung. Ingkolok no sim turge nana asi sim paalayéne?

¹²No ngolum deerung sim bina delokke bíkke ookídí kelang bíkke gooru sobén kídíete tíngko asi rusok tíína ngoluke abu Jakob mete botte yadunía?”

¹³Jisu bí poyansuto, “Sim asi sim tíína mipíde tíílíyéku.

¹⁴Idokom ngokke binam asi sim tíína de asi tíílíng yimayé. Aropakpe, ngokke asi binamde bíkkíng nyokyi mana turnamem bina sirung asipe duuyaryé.”

¹⁵Mimede bím poto, “Saare, ngo asi tíílíng kumadope delokke so asi bompe emla aatí kumadope dem asidem ngom bika.”

¹⁶Bí mimedem poto, “Gíka langku, nokke miluem tomla so aalat boto langku.”

¹⁷“Ngo milo kamang” emla bí poyansuto. Jisu bí mimedem poyansuto, “No milo kamang emsu namde no emjidung.

¹⁸Agom arode no milo pilngoko katuai, delokke nokke supakke duubosunam amide nokke milomang. Nokke supakke ponamde arodung.”

¹⁹Mimede poto, “Saare, nom ngo kaaluna miriko emla kaadung.

²⁰Ngoluke abu kídíe so dííte so kumsu dungai, idola nolu Judai ami kídíe ngoluke kumsu pekorude Jirusalemlo emsudung.”

²¹Jisu bí pobeng bito, “Mime, no ngom míngke sulangka, noluke Shédíem kumpekue so dííte sokom mang demangkom Jirusalem lotemang dekepe idí longe pííyé.

²²Samari amikídí nolu noluke kénmanam atíem kumsudung, ngolu ngoluke kénnamem kumsudung, kapeila turkunamde Judai ami kídílo kadung.

²³Depe idokom arolok kumsuna kídíe aidlok lang arolok Abuem kumsudíe píídak delokke píídakbong, kapeila dekepe kumsu penemmin Abu bí matadune.

²⁴Shédí bí aide, delokke bím kumsuna kídíde aidloklang delokke arolok kumsurupe aido.”

²⁵Mimede pokai, “Messiah (depe emnamde Kristo) bí píídakbong dem ngo kéndung. Edílo bí pííyédí, bí takam legangem ngolum pobeng biyé.”

²⁶Delokrongem Jisu bí pobeng bito, “Nom pona ngomino bí.”

²⁷Depe idopagem bíkkelo luyilsuna kídíe píídoku delokke Jisume mimekolo lupo sudope kaala bulu arí anyope mííto. Idakkom sékote, “No ingkoko lupo subomdune?” emla íngkína kamato.

²⁸Delokrongem agíke asi pekingem mesu geyéla, mimede taonlo gílat sulangkula ami kídíem sikepe pokantoku,

²⁹“Aala kaato langka, ngokke inam saanam takamem ngom apíípe pokuna amiko kadung. Si Kristope imanía?”

³⁰Bulu taon delokke gílenla bíkkíng danpe ento.

³¹Depe idungem bíkkíng luyilsuna kídíe bím, “Saare, nokke dope namem dotola,” emto.

³²Idakkom bí bulum poto, “Noluke kénmanam dopenam ngokke dotkéye kasudung.”

³³Delo bíkkíng luyilsuna kídíe mipile pobosuto, ngoluke aralok bím dotké bombinako katonía emla bulu íímín sukai.

³⁴Jisu bí pobito, “Ngokke dotkéde ngom melíkna lokke míínamem ibila delokke bíkke agérem iyin binamde.

³⁵Nolu ‘Poolo appiko dungada delokrongem gaddíe pííyé’ emla pomanía? Ngo nolum podung, noluke amige migdarla arík kídíem kaasutola! Bulu gadbe dope mindung.

³⁶Supakkom yidne agí agérem paadubong, pidnelang gatne ashéng bosudokupe supakkom turyarnam yéta legape aliem laasidung.

³⁷Dekepe ila, ‘Akone nyiilíkdo delokke akone yiddoku’ emnamde arodung.

³⁸Noluke nyiilík manamem yiddope ngo nolum melíkdung. Ayokone ankípe agérem gérto, delokke nolu buluke nyiinamem gérmín gedope yiddungku.”

³⁹“Bí ngokke inam saanam takamem poyindo” emla mime delokke hakii binam agomlok taon delokke bosi borang amie bím arope mííto.

⁴⁰Dekepe iname edílo Samari ami kídíde bíkkíng aatodí, bulu bím bulukíng duupo dope roguto, delo bí loonyiko duuto.

⁴¹Delokrongem bíkke agom kídarem tatla deddína amie arope míngke sunape ito.

⁴²Bulu mimedem poto, “Ngolu nokke ponam petom lok arope míímang supak ngolu agí agísue tatsuto, delokke si ami si aropakpe tani amosim mopít kuna Ruutume emla ngolu kéndung.”

⁴³Loonyi méélamdelo bí Galil among danpe ento.

⁴⁴Depe iduem Jisu bí agíe “Kaaluna miride agí doolulo amín kamang emla pokanto.”

⁴⁵Bí Galil pííduem Galil ami kídíe bím yamríkto. Bulu Jirusalemlo Gíbong gíídí domanlo bíkke itonam takamem kaato, kapeila bulukom delo duuto.

⁴⁶Lekoda bí bíkke asiem onggur alangpe ikuko Galil lokke Kanalo gítoku. Delo Kapernaumlo roja rumkílo agér ina migom ookone kila kedduai.

⁴⁷Edílo Jisu bí Judia lokke Galillo píídung emnamdem tattodí, si ami si Jisukíng gíla bíkke sita simana oodem aala ipí bidokupe bím roguto.

⁴⁸“Nolu ami kídí nolu irisinyo iyod sangodem kaasu madem edílokom aro míímayé.” emla Jisu bí poto.

⁴⁹Migomde pokai, “Saare, ngokke kue simang adape aabi potoka.”

⁵⁰Jisu bí poyansuto, “No gíladoku. Nokke ue turyéku.” Amide Jisuke agomem míngge langaala gíkaku.

⁵¹Bíkke bedalo endung adape, bíkke kue turkaku emnam koborem bíkke béérang kídíe bím ríksula pokanto.

⁵²Bí edípaklo koode aikakudí emla ííduem bulu bím pobito, “Ramnamde melo doonyi tuyod paklo aikaku.”

⁵³Delo abude de moodí pakde Jisuke bím “Nokke kue turyéku” emdo page emla míípang sutoku. Dekepe iname bílang bíkke ekum erang takame arope míngkesuto.

⁵⁴Judialokke Galillo aala Jisuke lennyinape irisinyo iyod ibiname si.