Read Alladian JOAN 5 Bible Online

JOAN 5 - Alladian bible

JOAN 5

¹Méélamdem longekonem Jisu bí Jirusalemlo Judai kídílokke domanem dobosupe emla gíto.

²Depe iduem Jirusalemlo Mér yapgo anín delo Aramaik agompe Bethesda[11] emnam ekum baranda pilngoko dunggo bomnam asi paatangko kadungai.

³So deddína kina ramna mingmane, lebaane, pittempe kina kídíe keddungai[12]

⁴

⁵Delo takying angum kolang dítag píínyi kokai kina amiko kato.

⁶Edílo Jisu bí bím delo keddope kaatodí delokke deddí kokai sikepe kidope kéntodí delo bí amidem íngkíto, “No eker lídung kunía?”

⁷Kinade poyansuto, “Saare, asi si beleyém sékote ngom paatalo joolíkdope igul penayang kamang. Ngokke aape iduem, ngokke kerape akone angkam kadan dan idung.”

⁸Delo Jisu bí bím poto, “Gereptola! Nokke ketpuem bomla gíto langku.”

⁹Menang asak de amide aikaku; bí agí ketpuem bomla gíkaku. Dekepe ido longede Sabbath longeko,

¹⁰dekepe iname Judai ami kídíe ipínam amidem poto, “Silo Sabbath longe; ayone nom nokke ketpuem bomnamem luyadung.”

¹¹Idakkom bí bulum poyansuto, “Ngom ipíkuna amide ngom ‘Nokke ketpuem bomla gítola’ ” emto.

¹²Dekepe iname bulu bím tatkíto, “Séko nom ketpuem bomla gítola emla pona amide?”

¹³Ipínam amide bím ipínade sékuadí dem kénmato, kapeila Jisu bí delo yéna mibamdelo gínyok líkkai.

¹⁴Méélamdem bí kumkeng ekumlo paala bím poto, “Kaatola, no aidungkune; paab iyimapeka, demamílo mangkam yana atíko nokkíng kapelo.”

¹⁵Amide gílangkula Judai ami kídíem ngom ipí kunade Jisumin emla pokan bitoku.

¹⁶Dekepe iname, Jisu bí Sabbath longelo sikesim igalok Judai ami kídíe bím gééto.

¹⁷Jisu bí bulum poto, “Ngok Yayi bí so longepak sote agér géryardung, depe ila ngokom agér gérdung.”

¹⁸Sok legalok Judai ami kídíe pakyape bím petpe emla míítí bomkai; bí Sabbath longem ipéésunam petommang, idakla bí Shédí meteng agíke Abue emsudung, agíe Shédíme kídísupe posudung.

¹⁹Jisu bí bulum sikepe poyan suto, “Ngo nolum aruem pobidung. Oode agíe atí ilasumang; bí agí Abuke inam petomem kaalamin iladune; kapeila Abue ingkuem idudí Uekom idung.

²⁰Legade Abude Uem ayadung delokke bím bíkke inam takamem lengkandung. Arue, bí sike simpemílo botteyana atí siriem bím lengkanyé dem nolu irisinyope mííyé.

²¹Kapeila Abue sina kídíem kiirep langkula bulum turnamem bila inam kísa pakpe Uekom bíkke bipe míínamem turnamem bidung.

²²Delok teyolote, Abude séko mete bisarmang, idola bisar penam takamem Oolo melíkto,

²³depe inamde bulu Abuem mínggenam kísape takame Uem míngge dope emla iname. Sékodí Uem míngge madune, bím melíkna Abuemkom mínggemang.

²⁴“Ngo nolum arope podung, séko ngokke agomem tatla ngom melíkna bím arope míngke sududí bíkkelo turname dung delokke bím bisarmang; bí sinamlokke turnamlo aadungku.

²⁵Nolum ngo aruem pobidung, sina kídíe Shédíke Oo agomem taddíe píídak delokke píídubong delokke séko bulu taddudí bulu turyé.

²⁶Legade Abukelo turname duula, Oo kelote turname duusudope bitung.

²⁷Bí Uem bisar nana ralnamem bitung kapeila bí Tanike Ue.

²⁸Sim kapei emla míímapeka, kapeila agolo duune bíkke agomem taddíe píídak

²⁹delokke bulu darepyéku, séko bulu aina agérem itodí dekede turyéku, delokke séko bulu atímana agér itodí dekede bisar kosuyé.

³⁰“Ngokke sulok ngo atí ilamang; ngo ngokke Abuke ponam petomem bisardung, delokke ngokke bisarde jondung, kape ila ngo agí ainam legape matamang idakla ngom melíkna kepemin matadune

³¹“Ngo agíem hakii bisu dumílo ngok hakiide aromang.

³²Ngokke legape hakii bina konko kadung, delokke ngokkepe hakii binamde arodung emla ngo kéndung.

³³Nolu Joankíng ami melíkto delo bí aruem hakii bito.

³⁴Ngo tani hakiiem tomang emmang; idakla ngokke potonam kísape nolu turdo kupe emlamin podune

³⁵Joan bí dorna delokke angun bina merukuai, delokke nolu longeko bíkke angunlo yémandope emla mííto.

³⁶Joan kempemílo tebeg yana hakiiye ngokkelo kadung. Kapeila ingoo bomdunam delokke iyindope Abuke ngom melík bomnam agér susi Abue ngom melíktung emnam hakiiyem bisudung.

³⁷Delokke ngom melíkna Abude agíe ngok legangem hakii bidung. Nolu edílokom bíkke agomem tatkímang delokke bí kapenakodí demte kangkímang.

³⁸Bíkke agomete nolukelo duumang, kapeila nolu bíkke melíknam amiem arope míímato.

³⁹Nolu kénnamrupe Dooying kitab agomem poridung kapeila dekelok turyar namem paadung emla nolu míídung. Sikesina ngok legangem hakii bina Dooying kitab agome,

⁴⁰depe ilate nolu turnamem paape emla ngokkíng aalímang.

⁴¹“Ngo tani kídílok yidnamem míímang

⁴²idakkom ngo nolum kéndung. Ngo kéndung noluke aanglo Shédíke ayang kamang.

⁴³Ngo ngokke Abuke amínlok aadung, idola nolu ngom torík sumang; idakla agí amínlok aanako kamílomin, nolu torík sudune.

⁴⁴Nolu Shédí kelok lenna koyidem matamape akone akonlok koyit matana kídí nolu kape kísa míngkén suyéne?

⁴⁵Idokom nolum ngo Abuke keralo ajéng luketyé emla míímem mapeka. Nolum ajéng luket penade noluke míínam subomnam Mosi bímin.

⁴⁶Nolu Mosime arope míngke sudumílo, nolu ngom míngke sukan duai, kapeila bí ngokke legangem attung.

⁴⁷Idakkom nolu bíkke atnamem míngke sumanade, ngokke ponamem kape kísa arope mííyéne?”