Read Alladian JOAN 6 Bible Online

JOAN 6 - Alladian bible

JOAN 6

¹Sok méélamlo, Jisu bí Galil siyéngem (depe emnamde Tiberia siyénge) koola rotkonlo gíto,

²delo ami milung ludíko bíkkíng gímín geto kapeila bulu bíkke kina kídílo irisinyo iyod sangot ibinamem kaato.

³Delokrongem Jisu bí etpang danpe saala bíkkelo luyilsuna kídíem duubosuto.

⁴Delo Judai kídílokke Gíbong gíídí domane anín dubong.

⁵Jisu bí kaaname milung ludíko bíkkíng aadakpe kaayédelo, Philipme poto, “Ingkolokyi ngolu sok ami kídí sokke donampe rotiem relayéne?”

⁶Bí sim bím aapí aang ikaanape íngkíto, kapeila bí kape ipe míídudí dem aapílo gedubong.

⁷Philip bí bím poyansula poto, “Poolo píínyi hajirangem rena tokom mipile dokí dopete rotie píímayé!”

⁸Bíkkelo luyilsuna akon, Andria, Simon Pitorke bírode polenkai,

⁹“Sina ansoona lub roti pilngo kolang améngona engo pumsu bomnako koo aménako dune, idokom kape kísa dekede deddína amiso pííbo suyéne?”

¹⁰Jisu bí poto, “Ami kídíem duumotoka.” Delo amodelo miijéb mílí idungai, delo ami kídíde éjar pilngokope dungangkai.

¹¹Jisu bí delo lub kídarem laala, yidgeto, delokrongem buluke míínampe dungana ami kídílo orgooto. Bí engo demte depe ito.

¹²Edílo bulu takame dodar kadí, bí bíkkelo luyilsuna kídídem poto, “Dongadem laadum sutolangku. Ipak siak mapeka.”

¹³Dekepe iname bulu dekedem giidum sutoku delokke de ami kídílokke dongonge lub pilngo delok aapé bíína íying kolang annyiko ito.

¹⁴Jisuke dekepe irisinyo iyodem kaala, ami kídíe poto, “Berokpe simin tani amoso aapena kaaluna miride.”

¹⁵Ami kídarke bím rojape imorupe emla míínamem kénsula Jisu bí etpadelo saanyok gekaku.

¹⁶Adenge pííyédem, bíkkelo luyilsuna kídíe sine paatang delo oitoku,

¹⁷Delo bulu etkung kolo aala delokrongem Kapernaumpe sine paatang delok kooto. Depe idodem kaamue ikabong, delokke Jisu bí bulum gíbo sumang.

¹⁸Gumnam asarko yapname delo aside kanínge irepkai.

¹⁹Bulu mail angum ngatna kope yutrodem, Jisume asi teyolok gíla etku delo píínín dope kaala delo pesue ito.

²⁰Idola bí bulum sikepe poto, “Si ngomino, pesomapeka.”

²¹Delokrongem bulu bím etkudelo laaríksuto, delo etkude menang asak buluke píípeko moopí delo pííto.

²²Longekon delo sine paatang rotkon delo yéna mibamde, etkunge atel komin duuduane, delo Jisu bí bíkkelo luyilsuna kídíem lekope koobo sumape, idola bulu petom koosu tonape emla kénkai.

²³Depe iduem Teberialok aana etkung ayoko Ruutumke yidge pala binam rotiem ami kídílokke doko amongdelo píído.

²⁴Mibamde Jisuteng delokke bíkkíng luyilsuna kídíete delo kayimang emla kénsu yédem, bulu etkudelo rengala Kapernaumlo Jisume matakape emla gílento.

²⁵Edílo bulu bím sine paatang rotkonlo paatodí, bulu bím íngkíto, “Saare, edílo no so aatone?”

²⁶Jisu bí pobito, “Ngo nolum aruem pobidung, nolu ngokke irisinyo iyodem kangkolok nolu ngom matamang, idakkom nolu rotiem dola kiidar kolokmin matadune.

²⁷Nyokmopena donam legape agér gérmapeka, idakla Tanike Oolokke bipenam turyarna yénamlope duuyarna donam legape agér gérlangka. Bíkkímin Abu Shédíke tolíknamem soktam tupket líktone.”

²⁸Delo bulu bím íngkíto, “Shédíke agérem ngolu ingkokoi iperune?”

²⁹Jisu bí poyansuto, “Shédíke agérde si: bíkke melíknam amidem arope míngke sunamde.”

³⁰Depe iname bulu bím tatkíto, “Demílo ingkona irisinyo iyod sangodkoi ngolu dem kaala delokke nom arope míngke sudope no ibiyéne? No ingkoko ibiyéne?

³¹Ngoluke abukídíe mooruklo mannem doto; de sikepe atnam kísape ikai; ‘Bí bulum teyong telok roti dope namem bito.’ ”

³²Jisu bí bulum poto, “Nolum ngo aruem pobidung, teyong telok nolum roti binade Mosimang, idakkom ngokke Abuemino nolum teyo telok roti aruem binade.

³³Legade teyong telok tokna delokke tani amongem turnam binademin Shédíke rotie.”

³⁴Bulu pokai, “Saare, supak kelokke ila ngolum dem rotidem biyar langka.”

³⁵Delo Jisu bí poyansuto, “Turmona ettíde ngomino. Séko ngokkíng aadudí bí kenola duumayé; delokke séko ngom arope míngke sududí bí asi tíílíng kayimayé.

³⁶Idakkom ngokke potonam kísape ngom kaado lateng nolu míngke sumateteng.

³⁷Abuke binam takamde ngokkíng aadung, delokke séko ngokkíng aadudí ngo edílokom monpak mayé.

³⁸Legade ngo teyong telok tokla ngokke míínamem ipe emla tokmang idakla ngom melíkna lokke míínamem ipe emlamino toktone.

³⁹Delokke simin ngom melíkna delokke míínamde, bíkke binam takamem atelkote ngo mepak madope, idola bulum yéyin longelo gakrep dokupe inamde.

⁴⁰Kapeila ngokke Yayike míínamde Uem kaana delokke bím arope míngkesuna mipíde turyar namem paadope, delokke ngo bím yéyin longelo gakrepyéku.”

⁴¹Sim tatla Judai ami kídíe bím lugeto kapeila bí “Teyong telok tokna ettíde ngomino,” emsuto.

⁴²Bulu pokai, “Si Josephke oo Jisu manía? Kape kísa bí ‘Ngo teyong telok tokne’ emlayéne?”

⁴³“Noluke aralo luge namem melangka” emla Jisu bí poyansuto.

⁴⁴“Ngom melíkna Abude bím ruulíkma tetedem sékote ngokkíng aalamang, delokke ngo bím yéyin longelo gakrepyéku.

⁴⁵Kaaluna miri agom kídarlo sikepe attung; ‘Bulum takam Shédí bí agíe luyilsuyé.’ Abuke agomem tatla delokke bíkkelok luyilsuna demino ngokkíng aadune.

⁴⁶Sékote Abuem kaana kamang idola Shédí kelok aana petomde Abuem kaane.

⁴⁷Ngo nolum aruem podung, séko arope míngke sududí bí duuyarna turnamem paadung.

⁴⁸Turmona ettíde ngomino.

⁴⁹Noluke buku kídíe mannem mooruk amolo doto, depe ilate bulu nyokkai.

⁵⁰Sina, tanie nyokyi madope dopenam teyong telok tokna ettínge.

⁵¹Teyong telok tokna turna ettíde ngomin. Tanie sim ettí sim domílo, bí agínpe duuyaryé. Si ettí si ngokke amíl adíne, sim ngo tani amosokke turnam legape biyé.”

⁵²Delokrongem Judai ami kídíe buluke arasulo lukí mankísula poto, “Kape kísa si ami si bíkke amíl adínem ngolum dodope biyéne?”

⁵³Jisu bí bulum poto, “Ngo nolum aruem pobidung, nolu Tanike Oo adínem domamílo delokke bíkke iyyiem tíímamílo, nolukíng turnam kamayé.

⁵⁴Séko ngokke adínem dodudí delokke ngokke iyyiem tíídudí bíkkíng turyar name dung, delokke ngo yéyin longelo bím gerep moyéku.

⁵⁵Legade ngokke adín simin dotké arode delokke ngokke iyyi simin tíípenam arode.

⁵⁶Séko ngokke adínem dodudí delokke ngokke iyyiem tíídudí bí ngokkíng dunggapdung, delokke ngo bíkkíng dung.

⁵⁷Kape kísa ngo Abukelok turla, turna Abu bí ngom melíkdudí, dekepe séko ngom dodudí bí ngokkelok turyé.

⁵⁸Teyong telok tokna ettíde simoko. Ngoluke buku kídíe mannem doto ilate nyokkai, idakkom séko sim ettí sim dodudí bí turla duuyaryé.”

⁵⁹Sikesim bí Kapernaum kumkeng ekumlo luyil bodula poto.

⁶⁰Dem tatla, bíkkíng luyilsuna kídíe bojéko, “Si bomram runam agomko, sékodí sim torík sulayéne?” emla poto.

⁶¹Sok legape bíkkelo luyilsuna kídíe luge poge namem ansula, Jisu bí bulum poto, “Si nolum míínying modunía?

⁶²Tanike Uem bíkke kerangke dungkolo saado kupe kaamílo nolu kape iyén!

⁶³Aide turnamem bidung; adínde emmumne. Ngokke nolum potonam agom kídarde aide[13] delokke bulu turmone.

⁶⁴Depe ilate nolu ayokone arope míngke sumape idung.” Kapeila Jisu bí kerango pekai buluke aralo séko buludí arope míngke sumape yédune delokke sékodí bím míírí míínyo penade dem kénsuto.

⁶⁵Bí pongunsula pokai, “Sikepe ilamin ngo nolum potone Abue ruulík madem sékote ngokkelo aalamang.”

⁶⁶Delokke ilangala bíkkíng luyilsuna kídíe bojéko bíkkíng gímape gílat sukaku.

⁶⁷“Nolute mekupe míídunía?” emla Jisu bí midum íying kolang annyidem íngkíto.

⁶⁸Simon Pitor bí bím poyansuto, “Ruutume sékokíng ngolu gípene?

⁶⁹Nomin Shédíke Deena Amide emla ngolu kénla arope míngke sudung.”

⁷⁰Delo Jisu bí poyansuto, “Nolum íying kolang annyiem ngo ullen manía? Depe idokom noluke akonde uyupe dung!”

⁷¹Bíkke depe emnamde Simon Iskariotke oo íying kolang annyi lokke akonpe ituakom, méélamlo bím mirulo yadlík pena Judas me míídola poto.