Read Alladian JOAN 9 Bible Online

JOAN 9 - Alladian bible

JOAN 9

¹Bíkke gígoo duem bí olen lokkekai mingmana amiko kaato.

²Bíkkelo luyilsuna kídíe bím íngkíto, “Saare, si ami sia demangkom bíkke ane abua paab itone, bí olen lokkekai mingmadune?”

³Jisu bí poto, “Si ami sikom paab ina amimang delokke bíkke ane abuekom paab imang, idola si Shédíke agérem bíkke turla yéduem lengkan nape emlamino depe ikane.

⁴Longe dungadape, ngom melíkna bíkke agér em iperung aido. Kaamue píídakbong, delo sékote agér gérla yimape iyé.

⁵Ngokke tani amoso duudungem, ngomin tani amosokke angune.”

⁶Sim podola bí kédengem takil sukkat geyéla, takildem kédenglo soyélsuto, delokke dem ami delokke amiglo kyam líkto.

⁷Bí amidem poto, “Gíkala Silom (depe emnamde Melíknam) paatanglo mobín sutolangka.” Dekepe iname amide gíla mosuto delokke amige kaala aalat doku.

⁸Bíkke kumrí donggong kídíe delokke bím kerape kogo dogoola magoodope kaana kídíe pokai, “Si amisi kogo dogoola duuna demangía?”

⁹Ayokone de ami demoko emkai. Abíde pokai, “Demang, bí kaaname delok ami delok kísanako.” Idola bí agíe, “Ngomino de amide” emla posuto.

¹⁰“Dekemílo nokke amige kape kísa kangka kune” emla bulu ííbomkai.

¹¹Bí pobito, “Buluke Jisu emnam amide suyunglok genla ngokke amigso kyam líkto. Bí ngom Silom Paatanglo gíla mobín sulangka emto. Dekepe iname ngo gíla mobín suname delo ngo kangkaku.”

¹²“Ingkolo de amide” emla bulu bím íngkíto. Bí “Ngo kénmang” emto.

¹³Bulu mingmana amidem Pharisi kídílo aaboto.

¹⁴Depe iduem Jisuke suyung genla ami delokke amigem dardokupe ido longede Sabbath longekuai.

¹⁵Delok legape Pharisi kídíde bí kape kísa migdar tokudí demte íngkíto. Amide poyansukai, “Bí ngokke amiglo suyungem kyam líkto, delokke ngo mobín suto kuname, supak kaadungku.”

¹⁶Pharisi ayokone pokai, “Si ami si Shédí kemang kapeila bí Sabbath longem nyomang.” Idakkom abíde pokai, “Paab gena amide kape kísa sikena irisinyo iyodem ilayéne?” Dekepe iname bulu opéé annyikope ito.

¹⁷Méélamdem bulu mingmana amidem íngkítoku, “No bíkke legangem kape luyén? Bíkke migdar moku namde nokke amigemin.” Amide “Bí kaaluna miriko” emla poyansuto.

¹⁸Judai kídíde ami delokke ane abuem tomla tatkímang tetengem amide mingma nakuai delokke migdar kaku emnamdem bulu arope míímang.

¹⁹Bulu ane abudem íngkíto, “Si ami sia noluke ue? Sia odo lokkekai mingmana embomnam amide? Supak kape kísa bí kaapa dungkune?”

²⁰Ane abude pobito, “Bí ngoluke ue emla ngolu kénsudung delokke bí odo lokkekai mingmato emla ngolu kéndung.

²¹Idola bí supak kape kísa kaapang dungkudí demangkom sékodí bím migdar moto kune, dem ngolu kénmang. Bím íngkísutoka. Bí mine kabong; bí agí legangem pobisuyé.”

²²Bíkke ane abue depe poto kapeila bulu Judai ami kídíem pesoto, legade sékodí Jisu bí Kristo emla poyédí dem kumkeng ekum lokke monpak dokupe Judai ami kídíe luyin bosutung.

²³Dekepe ilamin bíkke ane abue, “Bí mine kabong, bím íngkí sutoka” emtone.

²⁴Lennyinape bulu mingmana amidem tomto. Bulu “Shédíke keralo pésudola aruem polangka” emdola pokai, “Si ami si paab gena amiko emla ngolu berokpe kéndung.”

²⁵Bí poyansuto, “Bí paab gedudí gemadí, ngo kénmang. Agom atelko ngo kéndung. Ngo mingma tuai idakkom supak ngo kaadungku!”

²⁶Delokrongem bulu bím íngkíto, “Bí nom ingkoko ibitone? Bí kape kísa nokke amigem migdar motokune?”

²⁷Bí poto, “Ngo nolum pobitobong, nolu tatgapmang. Nolu kapeila sim lekoda tallíng dungkune? Nolute bíkkelo luyilsuna amipe yélídunía?”

²⁸Bulu bím lukaadola poto, “Nomin sok ami sokke luyilsuna amie! Ngolu Mosikíng luyilsuna kídíe!

²⁹Ngolu kéndung Shédí bí Mosime luposuto, idola sim ami simdan, bíkke lenko angkuemte ngolu kénpete kénmang.”

³⁰Amide poyansuto, “Supak de míngkí penamko! Bí ingkolok aadudí dem nolu kénmang, depe ilate bí ngokke amigem migdar motoku.

³¹Shédí bí paab gena kídíem tatbimang emla ngolu kéndung. Bí deenampe nyogapla bíkke míínamem ibina demmin tatbidune.

³²Séko mete olen lokkekai mingmana amigem migdar mokunam tatkímang.

³³Si ami si Shédí kénma mílo, bí atí ilamayai.”

³⁴Sim tatla bulu poyansuto, “Nom paabem otak sutung; depe idula no kapeila ngolum lukí sukane!” Delokrongem bulu bím monpak toku.

³⁵Bulu bím monpaktoku emnamem Jisu bí tatla, bíkke amidem ríksu dokuem, bím poto, “No Tanike Uem arope míngke sudunía?”

³⁶“Poyilne, de sékoda?” emla amide íngkíto. “Ngom pobitola, demílomin ngo bím arope míngke suyéne.”

³⁷Jisu bí poto, “No bím supak kaatobong; aropakde, nom luposuna ami simino bí.”

³⁸Delo amide, “Ruutume, ngo arope míngke sudung,” emdola Jisume kumto.

³⁹Jisu bí poto, “Mingmana kídíe migdar dokupe delokke migdarna kídíe mingma dope emla bisar penam legape ngo tani amoso aato.”

⁴⁰Bíkkíng yémín gena Pharisi ayokone bíkke ponamem tatla íngkíto, “Kape? Ngolute mingma dunaya?”

⁴¹Jisu bí poto, “Nolu mingma tuamílo, nolu paab edo kamayai; idakkom supak nolu migdardung emla posuname, nolukelo paab ajénge duudung.”