Read Alladian TOMLÍKNAM 10 Bible Online

TOMLÍKNAM 10 - Alladian bible

TOMLÍKNAM 10

¹Kaisarialo Kornelio emnam amiko Itali rejiment lokke sipaying ruutumko dungai.

²Bílang bíkke erange míngkesula Shédíme peso nekíai; bí pííramna kídíem bidarla delokke Shédíme kumyar dungai.

³Longe konem doonyi yutok angum bajilo bí kaarí kaanyoko kaato. Bí berokrupe Shédíke teyong kotokiko bíkkíng aala “Kornelio” emla gokdope kaato.

⁴Korneliode bím pesue idola kaatíto. “Ruutume, kapeda?” emla bí poyansuto. Teyong kotokide poto, “Nokke kumnam elang opan kídíem aman biname Shédíke keralo míngge sudope píído.

⁵Supak Pitor emnam Simon me langa dokupe Joppalo amiko melík langka.

⁶Bí samra ina siyéng ayirlo duuna Simonke ekumlo dung.”

⁷Bím agom pona teyong kotokide gíyékudem, Kornelio bí bíkke béérang annyiko delokke bíkke míngkesunam sipaying akondem tomto.

⁸Bí bulum deke takamdem pokan pala bulum Joppalo melíkto.

⁹Longe kondem longe raadang dungadape bulu taon delo píínín yédem, Pitor bí ekum teyolo kumsukape saato.

¹⁰Bí kenue iname dolí tíílínge ito, delokke dotkédem inyu saanyu dungem, kaarí kaanyoko kaato.

¹¹Delo bí teyong eyabe siyyala atí bortak nako kéényung appilok rínla amoso leyyi bidope kaato.

¹²Delo ale appi gena atí atí simon silie, amosokke tabí tayue delokke kebung pettange yédo.

¹³Delokrongem agomko bím pokai, “Pitor darepla, petla dolangka.”

¹⁴Pitor bí poyansuto, “Ruutume, depe imaruyé! Ngo belumna demangkom deemana atí dokímang.”

¹⁵Agomde bím lennyinape pokai, “Shédíke deena atíem belume emmapeka.”

¹⁶Si lengum kokai depe ito, delo bortakna atídem teyong amope menang asak bomkaku.

¹⁷Pitor bí kaarí kaanyo delokke ortuem míítíla yéduem, Kornelioke melíknam ami kídíde Simonke ekumem paala baale delo dakto.

¹⁸Bulu Pitor emnam Simon bí delo duududí emla íngkídola gokto.

¹⁹Pitor bí kaarí kaanyo legadem míítíla dungem Aide bím poto, “Simon, midum angumko nom matadung.

²⁰Dekepe iname darepla oitolangku, bulum gíbo sugode emla míímapeka, kapeila ngomino bulum melíktune.”

²¹Pitor bí oilangkula ami kídíem poto, “Ngomoko noluke mata bomnamde. Nolu kapeila aatone?”

²²Ami kídíde poyansukai, “Ngolu sipaying ruutum Kornelio kelok aadung. Bí deena delokke Shédíme pesona amiko, bím Judai ami takame mínggedung. Deena teyong kotoki kone nom bíkke ekumlo aala nokke ponamem taddope bím políkto.”

²³Delokrongem Pitor bí ami kídídem ekumlo tomaala, bíkkíng doboto. Longekon delo Pitor bí bulukíng gílen bosuto, delokke Joppa lokke bíro ayokonete enbosuto.

²⁴Longekon delo bí Kaisarialo pííto. Kornelio bí agíke edung erang delo repesinying kídíem tomdumsula bulum kayato.

²⁵Pitor bí ekumdelo aayéname, Kornelio bí bím kaarík suto delokke bím mínggedola bíkke ale keralo kumto.

²⁶Idakkom Pitor bí darep motoku. Bí poto, “Darep tola, ngo tani emino.”

²⁷Bím luposudola, Pitor bí aralo aala amiem bojéko dumsudope kaato.

²⁸Bí bulum poto, “Ayonlok poyém Judai amide mipagem yébo sumang demangkom kaapatmang emnam agomdem nolu pebeepe kénsudung. Idakkom ngo séko mete belume demangkom deemang emla ponyodung emnamdem Shédí bí ngom lengkantung.

²⁹Dekepe ila ngom tomdope melík dagem, ngo atí atí agom kamape aato. Ngo nolum tatkí ladodí, nolu ingko legape ngom goktone?”

³⁰Kornelio bí poyansukai, “Loopi kerape supak kísaduem adeng angum bajilo ngokke ekumlo ngo kumsula duuto. Menang asak asire ina ege gena amiko ngokke keralo dakla

³¹pokai, ‘Kornelio Shédí bí nokke opanem aman binamem míípasuto.

³²Pitor emnam Simonme Joppalok tomdokupe melíktola. Bí siyéng ayirlo duuna samra agér gérna, Simonke ekumlo mibope dung.’

³³Dekepe ila ngo menang asak nom gokdope melíkto, delokke no aadobong airudo. Supak ngolu takam Ruutumke ngolum poboyépe emla nom pobinamem Shédíke keralo tatgappe emla dung.”

³⁴Delokrongem Pitor bí polento, “Aropakpe Shédí bí míngu míírang aapí gemanako

³⁵idola bím pesola delokke aina agérem ina opín opín lok amiem torík sunako emnamdem ngo supak berokpe kénsudung.

³⁶Simin Israel ami kídílo Shédíke, takamke Ruutum, Jisu Kristo kelok yépokunam aina dooying ngiitomem melíkname.

³⁷Baptis igangem Joanke poborongem Galil lokke ilangala Judia tabung lope kape ikadí nolu kéndung.

³⁸Shédí bí Deena Aid loklang delokke pauarlok Najareth lokke Jisume tosakto, delokke deddíko bí gígoola aina agérem igoola delokke uyu pauar gooralo duuna takamem ipítoku, kapeila Shédí bí bíkkíng duumínto.

³⁹Ngolu bíkke Judai kídíke doolung kídarlo delokke Jirusalemlo inam takamem hakii bine. Bulu bím esing kolo pansaato,

⁴⁰idakkom Shédí bí bím sikolokke ibum rohlo kaapa dokupe kiireptoku.

⁴¹Bím ami takame kaamang, idola Shédíke hakiipe iyépe emla kera pekai ullennam bíkke sipala gerep rongkuem bím dobo tííbosuna ngolumin kaapatone.

⁴²Bí ngolum ami kídílo dooying pogoola delokke bím Shédí bí sinemlang turnem bisardope melíktung emla hakii bidope lulíktung.

⁴³Bíkke amínlok bím arope míngkesuna mipilem maab bidungku emla kaaluna mirikídí takame bíkke legangem hakii bito.”

⁴⁴Pitor bí agom kídarem pongodungem, Deena Aide dooyingem tatna takamlo aato.

⁴⁵Pitorme enbosuna Judai ami kídíde Mipaklote Deena Aid aman binamem kaala arí-anyope mííto.

⁴⁶Legade ami kídíem bulu angu angu agomlok podope tatto. Delo Pitor bí poto,

⁴⁷“Sim ami kídí sim séko asilok baptis laamadope lutum layéne? Bulu ngoluke kísape Deena Aidem paato.”

⁴⁸Dekepe iname bulum Jisu Kristoke amínlok baptis idope bí poto. Delokrongem bulukíng longko loonyi duubo sudope bulu Pitorme roguto.