Read Alladian TOMLÍKNAM 11 Bible Online

TOMLÍKNAM 11 - Alladian bible

TOMLÍKNAM 11

¹Tomlíknam kídí elang Judai tabunglokke bíro kídíe Mipak kídí ekom Shédíke agomem toríksuto.

²Dekepe iname Pitor bí Jirusalemlo pííyédem míngkesuna Judai ami kídíe bím lukaato

³delokke poto, “Nolu dínbíng iyod isumana ekumlo gíla bulum dobosuto.”

⁴Kape kape itodí dem atí takamdem andepe Pitor bí bulum pobeng bito.

⁵“Ngo Joppa taonlo kumsula duuduem, ngo kaarí kaanyoko kaato. Bortakna atíko kéényung appilok rínla teyong telok leyyi bidope ngo kaato, delokke de ngokke dungko delo aanínto.

⁶Ngo dem kaasuto delokke kaaname amosokke ale appina simone, monkíre, tabí tayue delokke kebung pettange yédo.

⁷Delokrongem ngo tattoname ‘Pitor darepla, petla dotola’ emla agomko poto.

⁸Ngo poyansuto, ‘Ruutum demang. Deemana demangkom belumna atíde ingkuete ngokke nappalo aamang.’

⁹Lennyinape agomde teyong telok pokai, ‘Shédíke deena atíem belume emnyodung.’

¹⁰Dekepe lengum kokai ito, delokrongem dem takam teyong telo laasatoku.

¹¹Depe irongem Kaisarialok ngokkíng melíknam ami angumde ngokke dungko ekumdelo dakto.

¹²Aide bulukíng gíbo sugode emla míímape gíbo sudope ngom políkto. Si bíro akké sikom ngokkíng enbosuto, delo ngolu amidelokke ekumlo aato.

¹³Bím bíkke ekumlo teyong kotokiko aala, Joppalo enla ‘Pitor emnam Simonme tomto langku

¹⁴nolang delokke nokke ekum erang takame turku nana agomem bí pobiyé’ emla ponam agom dem ngolum bí pokansuto.

¹⁵Ngo polen yéname, kerape ngolukíng inam kísape, Deena Aidde buluke teyolo angkai.

¹⁶Delokrongem Ruutumke sikepe ponam agomem ngo míípang sutoku, ‘Joan bí asilok baptis ito, idakkom, nolum Deena Aidlok Baptis iyé.’

¹⁷Shédí bí ngolum aman binam atelem Ruutumme arue emla míngkesuna bulum bidumílo, dekemílo ngo Shédíme lutum penade sékoda!”

¹⁸Bulu dem tayyédem, anguyape lupeyana kayimang delokke Shédíme sikepe yidgeto, “Dekemílo, Shédí bí Mipak kídíem turku pekolo míílat sukunamem bitung.”

¹⁹Depe idudelo Stephanme taronang itíílok gína kídíe gígoola Phonekia, Kuprio delokke Antioklo gíla dooyingem Judai amikídí petomlo pobito.

²⁰Buluke ayokone, depe idokom, Kuprio delokke Kureni amikídí eke Antioklo gíla delo Grik ami kídílote pobola, bulum Ruutum Jisuke legang tatpona dooyingem pobito.

²¹Ruutumke igule bulukíng duuto, delokke amie bojé rungko arope míngkesula Ruutumkíng aato.

²²De koborde Jirusalem mondoli nyorulo pííto, delo bulu Barnaba me Antioklo melíkto.

²³Bíkke pííla, Shédíke ayang igulem pormanpe kaayédem, bí ashéla buluke aapí-aang tabulok Ruutumkíng arope dunggap dope bulum takam luír poírto.

²⁴Bí aina amiko, Deena Aide bíísétla míngkeng edíínako, delokke deddína amiem Ruutumkelo langaato.

²⁵Delokrongem Barnaba bí Tarsalo Saulme kaape emla gíto;

²⁶delo bím bí paayédelo, Antioklo gíboto. Dekepe iname dítag tabudem Barnaba lang Saul bínyi mondoliem kaaríksula deddína amiem luyil poyilto. Luyilsuna kídíem Antioklo kera yalumpe Kristan emto.

²⁷Depe idudelo kaaluna mirieke ayoko Jirusalem lokke Antioklo tokto.

²⁸Akonde, Agabo emnamde, dakrepla Rom among tabulo sengééna dírí kenoko kayé emla kaalu kangor agom poto. (Si Klaudioke yédu delo arope ito.)

²⁹Luyilsuna kídíde, mipile agíke mínggílok, Judialo duuna bíro kídíem iguldope luyin bosuto.

³⁰Buluke amanem mondoli miro kídílo Barnaba kelang Paulkíng melíkla bulu dem depe ito.